2007年東京公幹之旅(Day 1)

由於而家仲未有澳門直航日本東京嘅班機,所以只可以經香港飛去東京(不過就算有都唔一定夾得啱時間)。今次公司同我地買左下午3點幾嘅機票(點解唔買早D?),而且仲買埋中午12點半從澳門碼頭直去香港機場嘅機場噴射飛航船飛。

 

11點前到達碼頭,然後攪埋飛機check-in同行李寄倉,再係碼頭乾等個幾鐘,終於上得船。今次因為要提早買船飛,所以只可以買到頭等位,普通位俾旅行社hold住左,要等到船期10日前先會賣俾散客。

 

機場噴射飛航頭等位嘅早餐
船上早餐

 

由澳門坐船去香港機場只需要45分鐘,1點3就到左香港機場嘅海天碼頭,攞返HK$120機場稅退稅之後,就坐接駁巴士去候機大樓等上機。

 

下午3點35分飛機準時起飛,飛行時間大約3個半小時,去到日本成田空港大約係日本時間夜晚8點,不過成田空港真係好大,架飛機降落左之後行去停機位都足足行左10分鐘。

 

飛機上面

飛機上

 

從飛機底部閉路電視影到地勤人員開始做嘢
飛機降落

 

8點15分落機之後,要再坐一段無人架駛小火車去入境大樓。去到見到好多人,而且外國人入境櫃位又少,D日本仔留返晒D櫃位俾自己人,我見D日本人一黎到好快就過左海關,而我地就排左成一個鐘先入到境。而且而家又要打手指模同埋影相,影相時好多人都唔識睇位,影得唔好又要再影過,我都影左兩次,而且有D機仲神神地,唔係咁work。出到去取行李時,D行李已經放晒係地下等人認領,搭咁多次飛機今次係第一次行李等人。

 

領取行李大堂

入境

 

由於同事已經係網上book左一架七人車的士,所以一到接機大堂就有個司機接機,跟住出去坐車去酒店。由機場去到位於日本橋嘅酒店只需要一個鐘車程,不過去到都已經係夜晚10點45分。

 

酒店大堂

酒店大堂

 

國泰D食物真係唔係好掂,唔好食份量又少,所以係酒店check-in完就出去附近食dinner醫肚先,不過因為唔係旺區,冇咩食店,最後入左去間拉麵店食拉麵。

 

東京第一餐就係呢度攪掂

麵店門外

 

麵店地方狹窄,只得十個坐位

麵店2

 

麵店內煮湯嘅大鑊
麵店1

 

我自己碗大大碗叉燒拉麵,好好味,都係700円

拉麵

 

食完麵之後俾錢時,個煮麵師傅竟然同我講廣東話,原來係廣東人,我初時都已經覺得佢唔似日本仔,似係中國人,不過就估唔到佢講廣東話,好彩食麵果陣冇講佢壞話。
食完麵都差唔多12點,之後去左對面間ampm便利店掃左D飲品同小食,就返酒店沖涼訓覺啦。

 

我住果間酒店房
酒店房1

 

張床都算幾大
酒店房2

 

沖涼房

酒店房3

 

用電插座,有埋三腳方型插座,唔洗用自己嘅轉換器
酒店房4

 

呢間酒店係用鎖匙開門,唔係用磁卡,真係復古
房門鎖匙

 

由酒店望出去嘅景色(第二朝影)
酒店房外望

 

沖完涼之後發現原來部電視係一部電腦黎架,可以作為電視同電腦兩用,仲可以有得免費上網添,咁正當然要試下先。

 

電腦鍵盤

房內電腦1

 

部電腦仲有得打機
房內電腦2

fb share

如果喜歡這篇文章,請點個「讚」吧!

fb share

發佈留言

發佈留言必須填寫的電子郵件地址不會公開。 必填欄位標示為 *

收到您的留言後,小弟會盡快回覆。如果您在留言中提供的電郵地址正確,且已勾選同意接收電郵通知,當您的留言通過審核並有回覆時,系統會寄出電郵通知您。回答您留言所查詢的問題有時候需要一些時間研究,請耐心等待。另外,如果您還未讚好過本Blog Facebook專頁,可以請給我一個讃嗎?!就當作是我花時間和精神解答您問題的一點支持吧。謝謝!

fb share

如果喜歡這篇文章,請點個「讚」吧!

fb share