2007年大阪、京都五天自由行(Day 2–遊覽京都嵐山 [Part 1])

行程:(10月1日,天晴,氣溫26度)

 

[6:00]起身梳洗 >> [6:45]從酒店出發坐地鐵去梅田阪急車站 >> [7:51]從梅田阪急車站坐電車去京都嵐山 >> [8:41]到達嵐山,遊覽嵐山公園、渡月橋、天龍寺、竹林之道 >> [10:55]坐嵯峨嵐山小火車欣賞嵯峨野風景 >> [11:15]小火車到達龜岡車站,步行至JR馬堀車站 >> [11:52]馬堀站乘坐JR火車去京都站 >> [12:19]到達京都站,食lunch,遊覽京都伊勢丹空中走廊 >> [13:30]坐巴士去清水寺 >> [13:45]遊覽清水寺、地主神社、三年坂、二年坂、八坂神社、祇園、花見小路通、河原町 >> [19:30]食dinner >> [20:38]坐阪急電車去梅田 >> [21:22]到達梅田 >> [21:30]坐地鐵回酒店 >> [22:00]返回酒店休息

——————–

由於今日行程比較緊密,所以6點就起身,跟住連酒店嘅早餐buffet都唔食就係6點9出發去京都啦。

 

第一次去日本搭地鐵,真係唔係咁識點買飛 ,攪左一輪先至明白,開頭仲以為要好似香港咁選擇去邊個站先,原來係唔洗架。買飛嘅步驟係:(1)先係自動售票機頭頂個好大嘅路線圖度搵出你要去個站,然後睇下個票價(係大銀碼果個啊,另一個半價果個係小童票);(2)入錢(紙幣或者coin)落去部自動售票機,跟住有幾個按鈕會著左燈(每個按鈕代表不同嘅票價);(3)按下顯示你要買嘅票價嘅按鈕;(4)攞飛同攞返找返嘅錢。其他電車同JR火車嘅買飛步驟都係一樣。

 

因為唔識買飛,所以原來只需約20分鐘嘅路程攪左成大半個鐘,7點半左右先去到梅田阪急車站,跟住又搵左一輪買飛嘅地方,終於入到車站等坐7點51分開出嘅特急列車,途中仲買左d面包同三文治做早餐添。

 

阪急電車,其實同地鐵、JR火車差唔多樣
京都1

同搭地鐵一樣,坐阪急電車或者JR火車唔洗指定買邊班車,買左飛入到月台有車就可以上。不過要留意,有d車係站站停,叫普通車,而有d車只停大站,係快車,有好多種,例如通勤特急、快速急行、準急行等等。普通車比快車慢好多,例如由梅田去桂站,普通車要1個鐘,而快車只需要36分鐘,差唔多快一倍,所以上車前記得睇清楚,搵架快車黎坐。

 

由梅田去嵐山冇直通車,要先坐阪急京都本線去桂站,然後轉嵐山線去嵐山,全程大約45分鐘(坐快車,唔計等車時間)。其實去嵐山仲可以選擇坐JR火車去京都站,然後由京都站坐JR火車去嵐山,時間加埋都係大約45分鐘,不過票價比坐阪急電車貴一倍有多(470円)。

 

阪急電車桂站月台,趁未有車黎係呢度食埋個三文治早餐
京都2

大約8點8左右終於到達嵐山車站,一落車感覺空氣好清新,好正!

 

阪急電車嵐山站
京都5京都6


出左嵐山站直行大約10分鐘就到嵐山公園,周圍風景好靚,唔識點形容,大家睇相啦。

 

嵐山公園兩傍嘅櫻花樹,可惜唔係櫻花季節

京都7
京都14

 

嵐山公園內山村小溪

京都8

大堰川

京都9京都11

大堰川,前面係渡月橋

京都10

嵐山公園,前面係渡月橋

京都12京都13

渡月橋,原來行得車架

京都18京都16

渡月橋近鏡

京都15

嵐山街頭

京都17京都20京都21

京都人力車

京都19
人力車夫,個個都好有型靚仔架,女士一定好冧
穿過嵐山公園再過埋渡月橋,向前行就係世界文化遺產之一嘅天龍寺。入面風景同建築好靚,特別係中間個水池,好優雅,大家繼續睇相啦。

 

天龍寺入口

京都22

 

 

天龍寺入面

京都23京都24京都25京都26京都27
天龍寺法堂,入去要除鞋換拖鞋

京都28京都29

天龍寺法堂入面

京都30京都34

天龍寺法堂傍邊水池

京都32

天龍寺法堂傍邊水池,如果係紅葉季節坐係度欣賞紅葉一定好正

京都31

天龍寺內堂
京都33京都35京都36

 

穿過天龍寺內堂,好快就到左北門出口。出左北門,左手邊就係有名嘅竹林之道。再走過竹林,行5分鐘就到嵯峨小火車嘅嵐山站。

 

竹林之道

京都37

常寂光寺,係小火車嵐山站附近,因時間關係只係門口影兩張相就走 京都38

常寂光寺

京都39

嵯峨小火車嵐山站
京都40京都41

 

遊覽嵐山公園、渡月橋、天龍寺、竹林加埋大約要用2個鐘時間,去到嵯峨小火車嘅嵐山站啱啱好係10點9左右,去埋洗手間等車就啱啱好。嵯峨小火車行走嵯峨站至龜岡站之間,全程要25分鐘,你可以由嵯峨站坐到龜岡站落車,亦可以倒轉由龜岡站坐去嵯峨站,視乎你嘅行程安排同買到邊班車車飛。嵐山站係小火車從嵯峨站出發後嘅第二個站,因為遊覽完天龍寺同竹林之後可以順路黎到呢度,所以係呢度上車就最啱,而且嵯峨站至嵐山站之間冇咩風景睇。

fb share

如果喜歡這篇文章,請點個「讚」吧!

fb share

發佈留言

發佈留言必須填寫的電子郵件地址不會公開。 必填欄位標示為 *

收到您的留言後,小弟會盡快回覆。如果您在留言中提供的電郵地址正確,且已勾選同意接收電郵通知,當您的留言通過審核並有回覆時,系統會寄出電郵通知您。回答您留言所查詢的問題有時候需要一些時間研究,請耐心等待。另外,如果您還未讚好過本Blog Facebook專頁,可以請給我一個讃嗎?!就當作是我花時間和精神解答您問題的一點支持吧。謝謝!

fb share

如果喜歡這篇文章,請點個「讚」吧!

fb share