----------

----------

2007年吉隆坡公幹之旅(Day 2 – Part 4)

之前講到下午3點半返到酒店之後,個天開始行雷閃電,跟住仲落埋雨添。本來打算放低野之後再出去行吓嘅,不過睇黎而家只可以被迫留係酒店等今晚大會個welcome reception啦。

 

等啊等…..,等到6點零可以換衫落去酒店個ball room參加welcome reception啦。參加welcome reception之前要先完成個registration程序,不過今次主辦機構安排得唔係咁好,攪咗好耐先攪掂。原來個welcome reception只係個大會開幕嘅儀式,跟住就係俾大家傾計social嘅時間,由於同其他地方嘅人都唔係太熟識,所以只係so咗冇幾耐就走人。

 

本來以為個welcome reception有埋晚餐食,點知原來冇,只得飲品同埋一D小食,咁唯有自己出去搵野食啦。

 

我地拿拿林返房換埋件衫大約7點半就出去食野,今晚打算去雙子塔下面個KLCC商場,順便可以影吓夜景。點知出到門口個天仲係落緊雨,本來諗住行路過去,而家唯有坐一程的士去啦。呢間酒店都幾好架,門口有隊的士車隊(可能係同出面公司合作),唔洗自己出去搵車,又唔怕俾人屈。不過呢度嘅的士一樣都係冇咪錶,問counter話要RM10。我覺得係吉隆坡坐的士最低消費可能係RM10,不過係市區之內好多地方都係RM10就可以,如果係街度截的士,大家應該開價RM10,唔好俾人屈咁多。

 

今次去吉隆坡外出主要都係坐Monorail或者RapidKL,只係來回機場同埋有兩次落大雨冇辦法坐咗的士(包括今次)。雖然坐的士可以有單據claim公數,而坐Monorail同RapidKL因為冇收據claim唔到數,不過我都係鍾意坐公交多D,一來係可以體驗吓自由行嘅感覺,二來唔想claim太多公數,話晒出街食野都唔係公幹嘅必要部分,不過話返轉頭,如果唔出街食而留係酒店食,咁餐費一定貴double以上,所以出去食一來可以同公司節省多D錢,二來自己又可以體驗一D特別美食,一家便宜兩家著。

 

KLCC總共有四層,去到先行咗個圈睇下,最後應用咗小弟一向嘅搵食原則“最多人食嘅一定係最好食”,所以去左四樓嘅Madam Kwan’s食今晚嘅晚餐。

 

成個KLCC商場呢間Madam Kwan’s最多人幫襯,網上都好多人推介

KLCC_5

 

椰漿飯係Madam Kwan’s嘅招牌菜,網上都好多人推介,不過因為唔like食椰子,所以冇order

KLCC_6

 

最後點左幾味家常小菜
KLCC_7

 

食完飯同同事又分道揚鑣,各行各,而且講定各自返酒店。因為出面仲係落緊雨,所以只可以係商場入面行下睇下嘢。點知…..,行行吓竟然遇到大陸黎嘅騙子同胞。唔係瓜……….,騙子集團都學大集團咁“走出去”?

 

話說當我食飽飽周圍行周圍睇同周圍影之際,突然有個靚女行埋黎,然後同我講:“我說華語你聽得懂嗎?”(普通話對白),由於黎得突然黎唔切反應,再加上又係靚女,咁我第一反映就講左句:“聽得懂。”(普通話對白)。跟住佢就講:“我是北京來的,我家人明天才到,我現在身上沒有錢,你可以請我吃飯嗎?”

……….,唔係瓜,身為港澳同胞,平時train咗咁多一聽就知咩事啦,以為大陸有,澳門有,同香港有姐,勢估唔到黎到馬來西亞都有呢D屎橋。以前細個見識少就話俾人呃姐(其實都唔係俾人呃左好多次,數埋都係得三次,一次廣州,兩次澳門咁大把),冇理由而家仲會上當。

 

所以我即刻同佢講我係黎旅行架,你不如試吓搵當地人或者警察幫你啦,佢一聽完就轉頭走左去。

 

見佢走咗我就行去另一度再影過相啦,點不知…..,又黎多個(吓,唔通我個樣真係成個蠢字,咁多騙子搵我埋手)。不過今次黎嘅係一個成個騙子樣嘅男人,佢行埋黎同我講:“我說華語你聽得懂嗎?”(普通話對白),吓,同一句開場白。今次我詐帝聽唔到,繼續行同影相,點知佢仲跟住黎,仲行去我面前再同我講:“我剛才問你我說華語你聽不聽得懂?”。死,今次冇得扮聽唔到,於是唯有扮唔識“煲冬瓜”,同佢講: “Sorry, I don’t understand what you say.”,跟住佢就轉身走人。

 

終於甩難,好彩之後冇再黎多件,大家都要小心D…..

 

KLCC商場內,2至4層

KLCC_8

 

KLCC商場內一角
KLCC_9

 

KLCC商場內另一角
KLCC_10

 

KLCC商場中間個電梯
KLCC_11

 

雖然KLCC夜晚10點先關門,不過9點開始已經有舖頭關門架啦,所以決定出去出面影下雙子塔嘅夜景。出到去點知仲係落緊雨,不過就唔係好大。我睇都冇機會會停,所以決定冒雨出去影返幾張相。好彩有帶到雨傘,可以唔怕俾雨淋,不過因為要一手攞傘一手影相嘅關係,所以好多張相都影得唔好。

 

先影一張雙子塔對面嘅大廈夜景

KLCC外圍_6

 

呢張係唯一一張見得吓人嘅雙子塔夜景相,其他都因手震走晒樣

雙子塔18

 

當我冒雨影緊雙子塔嘅時候,有個security哥哥行過黎,不過又冇同我講嘢喎,只係一路企係我附近,我估可能係佢見成個廣場咁大,只得我一個人係度,所以過黎睇吓我做緊咩,跟住可能又怕我俾賊仔打劫,所以企係度保護吓,不過當時仲係落緊雨,佢雖然有頂帽,但係都淋濕晒,真係唔係咁好意思。

 

影完雙子塔夜景之後,都係時候返酒店,由於行返去只需10分鐘,雨又唔係太大,自己又有雨傘,所以決定行路返去,順便可以睇下酒吧街。不過可能落雨關係,酒吧街度D酒吧唔係太多人。

 

好有亞熱帶特色嘅酒吧
酒吧街1

 

酒吧街上,都有一D外國人行
酒吧街2

 

呢間吧係正酒店對面,入面坐晒清一色馬來西亞靚女,不過太黑又怕影相俾人打,所以影得好差

酒吧街3

 

9點9左右返到酒店,沖埋涼就訓啦。

Related Posts Plugin for WordPress, Blogger...
2007年吉隆坡公幹之旅(Day 3)
2007年吉隆坡公幹之旅(Day 2 - Part 3)

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁