----------

----------

2007年吉隆坡公幹之旅(Day 4)

今日嘅主要活動依然係參加研討會,不過今日好少少,研討會係朝早9點先開始(可以訓多個鐘…),到下午5點結束,中午同樣有一餐由大會提供嘅自助午餐,不過下午研討會結束之後,夜晚果餐就要靠自己。

 

因為係last night,所以研討會一結束,我地就係5點3左右出去。不過出到門口好大雨,比起之前去雙子塔果晚仲大雨,而且又行雷又閃電,仲係冇停嘅跡象添。不過都冇辦法,唯有先坐的士去星光大道嘅Times Square行住先,希望晏D會停雨。

 

唔知係落雨嘅原因定係放工時間嘅原因,星光大道一帶超塞車。係的士上塞左好耐終於到左Times Square,好彩唔係睇錶收錢,塞幾耐車費都係RM10。因為出面仲係好大雨,唯有入去商場行吓先。呢間Times Square都真係幾大,入面仲有個好似係全馬來西亞最大嘅室內遊樂場,仲有埋過山車,不過就冇咩人玩。而呢度D舖頭好似都係D中低檔嘢,同商場個名同門面好似有D唔夾。

 

Times Square入面,初初係大門口入去之後以為個商場得三層,原來穿過第四層之後先發現別有洞天,個商場total有十層架

Time Square_1Time Square_2

 

Times Square入面個遊樂場,好大架,由五樓一直延伸到十樓,入口係五樓,同埋佢係商場後座架

Time Square_3Time Square_4

 

由於之前買咗太多拉茶,所以係澳門帶黎嘅馬幣唔係咁夠,所以決定再換多HK$200。之前係網上聽人講金河廣場(Sungei Wang)嘅兌換店最抵,不過我睇過咁多間發現其實係星光大道一帶嘅商場裡面兌換店嘅匯率都差唔多,最抵好似係Low Yat Plaza入面嘅兌換店,不過其實都係差好少。最後我係Times Square入面嘅兌換店換,HK$100=RM42.7,當時澳門係換緊HK$100=RM42.4左右,都係相差無幾。

 

係Times Square行左大半個鐘,跟住再行埋對面個商場仔之後,D雨好似細左少少,於是決定行去食晚飯先。其實今日主要係想去食新峰肉骨茶,因為網上D人好似話肉骨茶係呢間最正。新峰肉骨茶係星光大道附近嘅Medan Imbi路,不過地圖上搵唔到有標示呢條街,好彩早兩日經過時已經搵到佢嘅位置,如果唔係今日要落住雨搵就慘啦。

 

其實Medan Imbi路就係條大街Jalan Imbi同另一條街Jalan Punai(地圖上通常有標呢條路)之間,如果係Times Square門口個Monorail Imbi站行過去,應該向東面行(即地圖右邊),去到十字路口(條架空路軌係呢度會90度轉向北面去金河廣場)之後,繼續向前行,經過第一個T字路口再向前行,冇幾耐就會見到第二個T字路口,路口度間食西米撈嘅糖水店,對住路口有間舖頭叫阿順哥魚翅,係呢個路口行入去20米就會見到個公園仔,新峰肉骨茶就係正佢對面。

 

呢度就係新峰肉骨茶
新峰肉骨茶1

 

新峰肉骨茶入面

新峰肉骨茶2

 

一人份量嘅肉骨茶,價錢係RM13,主要材料係排骨同豬肚,不過個人覺得味道太淡

新峰肉骨茶4新峰肉骨茶5

 

本來打算買返D包裝嘅肉骨茶返去做手信,不過食完之後,覺得味道麻麻,所以打消左買返去嘅念頭,而且價錢亦都太貴,一盒十包要RM60,唔係咁抵。

 

食完飯之後,再次同同事分開行,我先去左附近嘅林明記買左幾包龍蝦肉乾做手信。由新峰肉骨茶去林明記,可以行返出去西米撈糖水店條大路,然後再向東行到下個路口轉右行一陣就到;亦可以行過公園仔,沿左邊行人路行一陣,再轉左直行一陣就到,兩條路線嘅路程都差唔多,只需2分鐘就到。其實林明記係亞羅街都有間分店仔,就係街頭嘅龍記肉乾對面。

 

林明記,幾年前跟團好似都黎過

林明記

 

買左三包龍蝦肉乾,每包RM35,好好味…

收獲2

 

買完肉乾之後就行去last一個想去嘅地方 – 亞羅街(Jalan Alor),亞羅街就係BB Plaza對面,同Jalan Bukit Bintang平衡,如果係Monorail Bukit Bintang行去,應該從十字路口向西方向行,大約行10幾20米就會見到路口,轉入去果條同Jalan Bukit Bintang平衡嘅街就係Jalan Alor。

 

呢度就係從Jalan Bukit Bintang入去亞羅街嘅路口

亞羅街1

 

路口有間旺國酒店,一睇就認得
亞羅街2

 

亞羅街街口嘅龍記肉乾店

亞羅街3

 

呢條就係亞羅街,兩邊有好多大排檔

亞羅街4

 

呢間係我幾年前跟星馬團去吉隆坡果陣同D團友一齊食過午餐嘅舖頭,影返張相留念下先

亞羅街5

 

黃亞華小食店,差唔到去到亞羅街街尾,網上好多人話佢嘅燒雞翼好味,所以入左去試

亞羅街6亞羅街7

 

黃亞華燒雞翼,兩隻加一杯西瓜汁RM7.4,不過味道真係好麻麻,黑沙海灘果度D燒烤檔求其一間都好食過佢好多…

亞羅街8

 

食完燒雞翼亞羅街之旅就結束啦,見有時間身上又仲有D錢未洗晒,就決定行去商場睇下有咩買,最後去左Low Yat Plaza,呢度專賣電腦產品同電話產品,款式多,價錢都OK。

 

最後買左一隻星加坡出嘅2G手指仔,RM55
收獲3

 

行完商場身上D錢已經用得七七八八,而且時間亦都唔早,於是坐Monorail返酒店,9點半返到酒店,沖埋涼拾埋行李準備明天回程啦。

Related Posts Plugin for WordPress, Blogger...
2007年吉隆坡公幹之旅(Day 5)
2007年吉隆坡公幹之旅(Day 3)

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁