----------

----------

2008年東京春季賞櫻+溫泉之旅(第五天 [1]) – 小田急火車、箱根、箱根神社

2008330(天陰,下午有雨,氣溫7~13度)

行程:箱根湯本 _ 箱根神社 _ 蘆之湖 _ 仙石原一之湯溫泉旅館

 

今日好興奮啊,因為接住兩日會離開東京去箱根遊覽,其實小弟對郊外地方比較有興趣,反而大城市就麻麻地,所以對接住呢兩日嘅行程好期待,可惜天公不造美,係東京嘅時候好地地,但係一去到箱根就落雨,仲係要落到我地上火車離開果陣就停,咁玩野,係唔係唔歡迎

 

去箱根一般都係坐小田急浪漫特快列車,大約需時一個半鐘。而坐浪漫特快除左可以只買單張車飛外,亦可以用箱根Free Pass。因為用箱根Free Pass除左可以坐來回兩程小田急浪漫特快之外,仲可以任坐箱根地區之內嘅所有交通工具,因為箱根D交通工具都幾貴下,所以計落用Free Pass都好抵,不過抵幾多就冇計過啦。

 

雖然攞住箱根Free Pass就可以上車,不過如果想有指定座位坐,就要用多870円買埋個指定席。其實唔買指定席一樣都可以上到車,不過就唔一定有位坐,除非有D位冇人坐你先可以坐架,唔係就要企囉。

 

我地係2月底已經用e-mail訂左呢日上午9:00去箱根嘅浪漫特快嘅指定席,雖然咁早訂,但係都只係得第4卡車廂嘅位,坐唔到第一卡展望席,而全架車好似只有8卡車,即係我地坐中間。原來9點鐘果班車真係所有座位都full晒,可能星期日關係,好多日本人會即日來回去玩一日。

 

其實用email訂左位之後只需要係開車前45分鐘去到小田急旅遊服務中心攞飛就可以,不過我地之前幾日好多時都會經過,所以係前一日趁住有時間就先去左小田急旅遊服務中心攞飛同買定箱根Free Pass

 

小田急旅遊服務中心就係新宿駅西口小田急百貨地下果層,係行人路小田急百貨入口一入去就見架啦,好易搵,而JR站就係再落一層,所以如果由西口行去坐JR都會經過小田急旅遊服務中心。

 

小田急旅遊服務中心開8: 00a .m5:00p.m,我地前日朝8點幾去到好彩唔係太多人,去到只需要俾返張訂位嘅email printout佢,就可以攞到所訂嘅坐位嘅車飛架啦。用email訂位嘅時候會要求你俾信用卡資料做確認,不過就唔會Charge你張卡,車飛嘅錢會等你去攞飛果陣先用現金俾架。

 

箱根Free Pass有分“兩日Free Pass”同“三日Free Pass”兩種,價錢分別係5,000円同5,500円。Plan行程果陣係佢網頁睇到“兩日Free Pass”只可以用係星期一至星期四出發,如果係星期六日就只可以用“三日Free Pass”,但去到小田急旅遊服務中心,佢地話冇分架,三日Free Pass”可以三日內任搭箱根交通工具,而“兩日Free Pass”就可以兩日內任搭,星期六日同假期都一樣,所以我地買左“兩日Free Pass”,比budget用少左500円

 

從箱根返東京果程我地就冇買定指定席,因為回程時間未決定。由於小田急火車班次都唔少,而且我地又係星期一先由箱根返東京,所以可以等到到時回程先買都仲有位。

 

左邊係箱根兩日Free Pass,右邊係指定席車飛

小田急火車3

 

小田急浪漫特快月台就係小田急旅遊服務中心右邊(如果你面向服務中心個counter),直去入閘就係。

 

因為我地由箱根返東京之後都會住返係新宿太子,所以朝早Check-out後只須將行李寄存係酒店,等回來再攞返就得啦,而去箱根就只係帶左好少野,同平時出街差不多,因為一來唔想係箱根遊覽時太多負擔,二來由於只係住一晚冇必要帶咁多野去啦。

 

因為一早已經摸清楚搭車地點,所以我地係酒店Check-out後亦好脂油咁係對面間M記享受返個早餐先,到差唔多時間先慢慢行去小田急月台等浪漫特快。

 

我地坐果班小田急浪漫特快列車

小田急火車1

 

車廂之內

小田急火車4

 

沿途風景

小田急火車5

 

本來諗住坐小田急途中會有機會見到富士山,點知今日天氣真係麻麻,天陰陰,冇辦法見佢一面10點半火車準時到達箱根湯本。

 

從車廂上影箱根湯本

箱根湯本8

 

箱根湯本附近,對面座Building係箱根湯本富士屋

箱根湯本7

 

箱根嘅行程點Plan一般要睇你住嘅酒店所在位置黎決定,箱根嘅主要景點(箱根湯本 >> 小涌谷 >> 強羅 >> 大涌谷 >> 蘆之湖 >> 箱根町 >> 箱根神社)基本上順住行係圍成一個圓圈架,如果只係去一日可以順時針或反時針走都得,行一圈可以坐暉晒包括登山電車、纜車、吊車、海賊船、巴士等交通工具,再回到箱根湯本坐小田急返東京。

 

如果會住一晚,就要睇你住邊度黎安排行程啦,我地今次Book左呢間叫仙石原一之湯,位於仙石高原,我估叫得高原都應該係箱根最高嘅地方掛。一之湯係一間連鎖溫泉旅館,係箱根有幾間一之湯,而每間都唔係好大,只有10至20間房左右,不過口碑都唔錯架。

 

因為旅館要等到3點先可以Check-in,所以去到箱根第一日會先行左一D景點再返旅館Check-in同浸溫泉。我地計劃第一日先去箱根神社同箱根町,再坐蘆之湖海賊船遊覽蘆之湖,然後就返旅館浸溫泉

 

箱根神社係蘆之湖傍邊,附近係元箱根,由箱根湯本去箱根神社可以直接係火車站外坐登山巴士去,車程大約要45分鐘時間。但係我地選擇先坐登山電車去小涌谷站,再係果度轉坐巴士去箱根神社,車程加埋大約都係差唔多。選擇先坐登山電車係諗住會沿途見到櫻花架,因為睇過書同網頁嘅相真係好靚,點不知今次真係好失望。可能天氣凍嘅關係,係箱根山上一朵櫻花都未見過,可能要到4月中先有櫻花睇。

 

小田急浪漫特快落車之後,對面月台就係登山電車月台,唔洗走出車站架。

 

箱根登山電車,呢張係係小涌谷車站影架

登山電車1

 

登山電車車廂內,唔好以為咁少人啊,呢張相係第二日由強羅坐返箱根湯本影架,所以先咁少人,由湯本開出嘅真係超多人架,車廂入面好似沙丁魚咁迫實晒架

登山電車2

 

由窗口影出去登山電車轉彎個樣

登山電車3

 

登山電車行走箱根湯本至強羅嘅山路,不過條路軌唔係一條過架,要斬開幾段黎行,好似之字型咁行走,行完一段就要係轉軌處等信號,然後再反方向由另一邊繼續行,所以行下停下咁都用左好耐時間先到小涌谷,呢度係中途站,我地就係呢度落車轉搭登山巴士

登山電車小涌谷站附近都幾靜下,只得我地三個人係度落車,可能已經係山上,一落車真係比山下凍左好多。係車站行出路口就見到有巴士站,不過上車前要攪清楚方向,唔好等錯車啊。其實只要睇下車站個牌上面寫住嘅下一站嘅站名,再同路線圖對照下就好清楚架啦

 

小涌谷駅巴士站

小湧谷巴士站

 

我地等左一陣已經有架巴士黎左,架巴士係由箱根湯本開出,途經小涌谷再去箱根町總站,睇佢車頭寫住箱根町就知架車啱啦。箱根嘅巴士上落都係前門,落車先俾錢,有箱根Free Pass當然唔洗俾啦,只需要落車時Show俾司機睇就可以架啦,不過上車前要等落車嘅人落晒車先。好彩呢個站有幾個人落,啱啱好有幾個位俾我地坐

 

之前坐登山電車只係見到車兩邊嘅樹林,而家坐巴士先可以欣賞到箱根嘅景色,其實箱根主要係山地,D公路都係山路,其實同台北嘅陽明山差唔多。

 

巴士途經一間酒店,好似幾靚

箱根2

 

巴士上每到一個站之前都有顯示站名,不過有D站相隔好近,所以一路行一路睇住張路線圖就唔怕會坐過站啦。同澳門巴士一樣,到站想落車只需要按鐘就可以。

 

去箱根神社最近係元箱根落車,再行10分鐘就到神社入口架啦。

 

由元箱根行去箱根神社途中嘅鳥居

元箱根

 

箱根神社入口

箱根神社1

 

從入口行到箱根神社都仲有一段路程

箱根神社2

 

想去到箱根神社就要行埋呢段石級先啦

箱根神社4箱根神社3

 

終於到左箱根神社

箱根神社5箱根神社6

 

其實日本D神社都大同小異,箱根神社都冇咩特別野睇。唔知點解,雖然係箱根湯本見到好多遊客,但當去到其他景點時遊人就只得小貓三幾隻,唔知D人走晒去邊?

 

箱根神社對開嘅蘆之湖傍邊嘅鳥居

蘆之湖3

 

從海賊船上影到嘅鳥居,因為果日落雨,好有煙雨濛濃嘅感覺

蘆之湖8

 

大約1點鐘左右我地行完箱根神社,原先計劃係會順路去杉木並林同埋箱根恩賜公園,但係因為箱根嘅櫻花未開,所以取消去箱根公園,而至於杉木並林,因為坐巴士時見到箱根山上好多地方都係好高大整齊嘅杉木林,所以睇過覺得一般冇乜好睇,而且個天開始有D想落雨咁,所以亦都決定取消。

 

於是我地去返元箱根,係返落車個巴士站坐車直接去箱根町,準備坐海賊船啦。

 

好彩冇按原先計劃行,因為坐巴士由元箱根去到箱根町都唔係近,如果行路都幾辛苦架。巴士去到箱根町時個天真係開始落雨,MY GOD

Related Posts Plugin for WordPress, Blogger...
2008年東京春季賞櫻+溫泉之旅(第五天 [2]) - 箱根町、蘆之湖、海賊船
2008年東京春季賞櫻+溫泉之旅(第四天 [2]) - 原宿、竹下通、明治神宮、千鳥淵公園、靖國神社夜櫻

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁