2008年東京春季賞櫻+溫泉之旅(第四天 [2]) – 原宿、竹下通、明治神宮、千鳥淵公園、靖國神社夜櫻
去到原宿先發現選錯時間來,原來諗住星期六原宿會多D野睇,點不知星期六嘅原宿真係超多人,可以話水洩不通,原宿駅又鬼死咁細,落車之後迫出車站出面都迫左好耐先到。
東京最古老嘅原宿駅,地方真係好細
去到原宿真係被D人潮嚇親,跟住我地先行去明治神宮參觀先。由原宿駅行去只需要過左神宮橋就到明治神宮入口,不過由入口去到神宮裡面要行差唔多10分鐘嘅石仔,當做腳底按摩都幾好架。
神宮橋上,免費擁抱,唔敢試
明治神宮入口
終於到左明治神宮啦
明治神宮入面
入到明治神宮咁啱見到有兩對新人係度行婚禮,係日式架,好得意,個個都爭住影佢地,我都唔執輸。
日式婚禮
大合照
明治神宮大約行左一個鐘時間,出返去之後就去竹下通見識見識。
超多人嘅竹下通,見到都唔想行
竹下通入面D舖頭真係冇咩好行,可能我唔夠in,不過D野我覺得香港澳門都係差唔多姐,冇咩特別,特別嘅反而係行竹下通嘅人,有人男扮女裝,又有D著成咁…..
男扮女裝嘅唔敢影佢,靚女就影左幾張
去完竹下通其實都幾累下,所以都唔想同人迫,最後係竹下通口嘅一間班cake店買左班cake黎食,我覺得都幾好味架。食完班cake抖左一陣之後,就離開原宿呢個咁多人嘅地方,向另一個賞櫻聖地千鳥淵出發。
坐地鐵係九段下駅落車,出左地鐵站就係千鳥淵,呢度係皇宮護城河嘅其中一段,兩邊種左好多櫻花樹,而家係千鳥淵公園,入面有個為舉行1964年東京奧運會而建嘅體育館叫武道館,好多大型柔道、劍道賽事都係度舉行,亦都係東京主要嘅音樂會場地黎架。
千鳥淵公園內嘅武道館附近
千鳥淵
去千鳥淵主要係想睇下佢夜晚係燈光下嘅櫻花景色,因為我地去到嘅時間尚早,所以決定先去對面嘅靖國神社睇下。靖國神社對於中國人黎講真係有D敏感,中日兩國成日因為參拜靖國神社嘅問題而有爭辯,所以今次去參觀心理上都有D壓力架。不過因為係每年3月尾至4月初櫻花季節,係靖國神社都有櫻花祭舉行,所以我地都主要係去見識下櫻花祭,純粹旅遊,與政治或者民族恩怨無關。
由千鳥淵公園過一條天橋就係靖國神社
靖國神社外嘅靖國通
靖國通夜景
櫻花祭其實係係靖國神社外圍嘅廣場同空地度臨時搭建左好多小食檔,等人可以係櫻花下食野飲酒,即係類似美食嘉年華咁,好似間中仲有D表演,不過我地去果陣冇。
櫻花祭會場
櫻花下食野,好好feel
小食檔
靖國神社入口
靖國神社入面嘅櫻花
我地係靖國神社同埋櫻花祭會場行行食食,大約6點左右見個天開始黑,而且靖國神社亦都關門,不過出面嘅櫻花祭會場就繼續進行,於是我地就決定行返去千鳥淵睇夜櫻啦。
點知行返出靖國通之後,發現成條馬路都係人,而且係千鳥淵果邊嘅行人路上實行左單向潮水式行人管制,只可以由入口單向行走,但係行左好耐都見唔到龍尾,最後行都地鐵站入口附近先見龍尾位置,但係因為人太多,移動速度又慢,所以最後都係打消同人迫去睇夜櫻嘅念頭,索性返酒店沖個涼抖下先。然後再係新宿歌舞伎町一帶食飯同行下,就咁就結束呢日豐富嘅行程。
因為第二日要一早check-out出發去箱根,所以今晚要用D時間執下行李。
人氣文章:
Klook / Kkday最新優惠碼
Agoda最新10%折扣代碼
Hotels.com最新折扣代碼
Trip.com最新優惠碼
永安旅遊最新推廣碼
樂天旅行最新住宿折扣券
樂天旅行最新租車折扣券
日本樂天市場最新優惠券
Klook.com
如果喜歡這篇文章,請點個「讚」吧!