----------

----------

2008年東京春季賞櫻+溫泉之旅(第五天 [2]) – 箱根町、蘆之湖、海賊船

因為已經係午飯時間,去到箱根町開始肚餓啦。箱根町海賊船碼頭出面有間賣手信嘅專門店,樓上有間幾大下嘅食店架,我地就係呢度食左係箱根嘅第一餐。呢間野真係好多遊客食,仲見到有個旅行團係度食添,不過有個男侍應就真係冇乜禮貌。我地入到去以為係就咁坐低然後叫野食,但原來係要先係個Counter度寫低個名同人數,再等佢地同你安排坐位架,第一次去鬼知咩,但個男侍應就表現得好唔耐煩咁,可能太多野做做到好燥

 

我叫左呢個豬扒(豚)飯,雖然受到唔好對待,但個飯真係好好味

箱根町午餐

 

食完個Lunch之後個天仲係落緊毛毛雨,不過因為離下一班船仲有幾長時間,所以決定先去附近嘅箱根關所參觀。

 

箱根町

箱根町

 

箱根關所係以前江戶時代嘅海關,地方都好細,不過都參觀左成個鐘,由箱根町港碼頭行去都要行5分鐘時間。購買箱根Free Pass時會有一本小冊子,入面有一頁係優惠券黎架,去到指定景點買入場券時,用優惠券可以有8折至9折優惠架

 

箱根關所城門

箱根關所5

 

箱根關所入面

箱根關所1箱根關所2箱根關所3

 

由山丘上嘅瞭望台影落黎嘅箱根關所,一眼見晒就係咁多

箱根關所4

 

行完箱根關所返到箱根町港碼頭時間啱啱好,我地坐240分班船,有箱根Free Pass唔洗買飛,就咁入去就得。其實係箱根無論係船、吊車、纜車同電車,入閘嘅時候都冇乜人理,有D閘有入閘機,你可以插張箱根Free Pass入去,但其實插唔插都冇所謂架,一樣入到,有D就會有工作人員係度,不過有時佢地都費事睇你張Pass

 

箱根町港候船室,地方好細架

箱根町港1

 

係箱根町等上船嘅遊客並唔係太多,不過有個旅行團有30幾人,令到人數睇落好似幾多,個團應該係馬來西亞華人團,因為佢地有D講普通話又有D講廣東話,不過原來佢地只係坐一陣,跟住就要係元箱根落船坐返旅遊巴走,鴨仔團真係好趕

 

雨中等上賊船

箱根町港2箱根町港3

 

從船上望返箱根町碼頭

箱根町港4

 

因為隻船係由桃源台開出,先停箱根町再去元箱根,而係桃源台黎嘅乘客大多數都係去元箱根落船,所以係箱根町就只有上客冇落客。我地一上到船見到架船滿晒,仲以為全程都要企。好彩架船行左10分鐘就到元箱根,跟住嘩嘩聲D人上晒岸,而係元箱根上船嘅人又唔多。所以之後由元箱根去桃源台果程架船冇乜人,大把位任坐,而且影相仲冇人同你爭位,只可惜落住雨

 

海賊船上

海賊船1海賊船4

 

海賊船控制室

海賊船2

 

船內座位,除左一般船艙,仲有個VIP房,不過要俾幾百円先入得,冇乜必要

海賊船3

 

元箱根港

蘆之湖1

 

蘆之湖景色

蘆之湖2蘆之湖4蘆之湖7蘆之湖9

 

蘆之湖上另一隻遊覽船

蘆之湖5

 

由元箱根行左大約30分鐘就到達桃源台,可惜天氣唔好冇機會見到富士山嘅真面目

 

桃源台港

蘆之湖6蘆之湖10

 

係桃源台上岸之後,可以有兩條路線去仙石原一之湯,一條係直接坐巴士去仙石原,另一條係先坐吊車同登山纜車去強羅,再轉巴士去仙石原。因為時間尚早,而且想早D試下坐吊車同登山纜車,所以我地選擇左第二條路線。

 

如果天氣好係吊車上係有好大機會見到富士山架,可惜今日天雨,能見度好差。登山吊車係分開兩段黎行架,一段由桃源台去大涌谷,中間會經過姥子站,可以上落客架,去到大涌谷就一定要落車,之後再坐由大涌谷去早雲山嘅另一段吊車,全程加埋都要超過半小時。

 

大涌谷登山吊車車站

登山吊車

 

因為我地計劃第二日先去大涌谷參觀,所以今次就冇係大涌谷停留,直接去早雲山轉搭登山纜車去強羅。

 

早雲山登山纜車車站

登山纜車

 

由早雲山去強羅嘅登山纜車係一條直路,路程唔算長,路軌兩邊有好多櫻花樹,如果開滿櫻花一定會好靚,可惜當時一朵都唔見有開。

Related Posts Plugin for WordPress, Blogger...
2008年東京春季賞櫻+溫泉之旅(第五天 [3]) - 仙石原一之湯
2008年東京春季賞櫻+溫泉之旅(第五天 [1]) - 小田急火車、箱根、箱根神社

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁