2008年東京春季賞櫻+溫泉之旅(第五天 [3]) – 仙石原一之湯
我地去到強羅大約係4點40分,出左強羅車站就有個巴士站,不過去到都未黎得切睇路線圖架巴士已經到左,咁唯有上車問個司機去唔去我地想去個站啦。
強羅車站,左邊係纜車月台,右邊係電車月台
仙石原一之湯網頁度教人搭巴士去到”仙石原文化センター前”站落車,然後再行6分鐘路就可以去到,不過之前係網上見有去過嘅人介紹係”大原”站落車會比較方便,所以我地都諗住坐去大原站。問左司機原來架車唔去仙石原文化センター前,但就會去大原,咁當然啱晒我地啦。
大原站位於一個三叉路口,因為之前已經Print左大原站同一之湯附近嘅衛星圖片出黎,所以好快認得D建築物,落左車搵啱條路直行唔洗3分鐘就到啦。
仙石原一之湯出面條馬路
呢間就係我地Book左嘅仙石原一之湯啦
仙石原一之湯近鏡
仙石原一之湯好細架,就得果兩層,有十間和室,五間樓上五間樓下
我地間房係樓上,房名叫岡崎宿
房入面嘅被爐,個暖爐係台下面,而且係凹入去架,放對腳落去就好似坐係度咁,暖立立好正架
第一次住和室,感覺真係幾新鮮,不過間房並唔係太大,住三個人都迫迫地,如果要住四個人真係唔多夠位。間房入面原來都有個洗手間,仲有個沖涼缸,不過就好細,而且冇沖涼用品架,所以沖涼一定要去溫泉果度個浴室沖。
由於旅館嘅食堂唔係好大,所以要分開食晚飯,Check-in果陣會同你安排大約嘅食飯時間,我地安排左係7點3先食。本來想係食飯之前浸返次溫泉先架,不過去左幾次,都有幾個人係度浸緊,所以最後都冇浸到,係房到休息到食飯時間就去飯堂食晚飯啦,飯堂就係二樓,著住和服拖鞋去食飯,真係有一種家嘅感覺。
因為係平價旅館(一間房包三人早晚兩餐都係HK$2,490),所以都冇預到D野好食得去邊,不過食落D食物都幾唔錯,主菜係呢煲野
仲有呢條鯛魚,甜甜地幾好味架
食到最後原來仲有個雪糕甜品,不過我地食完飯拍拍個羅由就想走,行到出門口好彩個侍應叫住我地,不過佢又唔識英文,講左一輪都唔知佢想講乜,後來講講下佢走去廚房,我地咪企係度你眼望我眼囉,跟住佢就攞住三杯雪糕走出黎,咁我地先知原來有飯後甜品。不過個飯後雪糕係用柑桔做架,好酸,但係見個侍應咁有心欄住我地都要攞俾我地,點都要俾面食D啦。
食完飯之後,因為出面落緊大雨,而且附近亦冇地方好去,咁唯有留係房度。原來坐係被爐上面一邊沖茶一邊睇電視係好舒服架,唔怪得睇電視見D日本人咁Enjoy啦。
不過黎呢度主要目的都係浸溫泉,所以冇理由成晚留係間房度架,但係又唔想同其他人一齊浸喎,可以點呢?其實一之湯嘅規矩係夜晚11點至早上6點可以包起個溫泉半個鐘黎浸,不過等到11點都已經訓左囉,所以我地耐不耐都走落去溫泉睇下有冇人,好好彩,未到9點男湯果邊已經冇晒人,入到去只得我一個人浸,可以包晒個場黎浸。其實佢個溫泉好細架,最多只可以5個人一齊浸。
大浴場(溫泉)就係樓下
溫泉係分開男湯同女湯架,因為唔好意思攞部相機入去影,所以只係影左個門口
入到去浴場度,會先有個地方俾你搵衫,除晒所有衫褲後可以放係個籃度,之後就要光脫脫入去浸囉。其實小弟今次係第一次浸溫泉,入到去見到有個池,池附近有D登仔同花洒,開頭傻傻地以為個水池就係溫泉,後來先發現仲有度門出去室外嘅,個溫泉原來係係出面露天果個先係,真係失禮。
第一次浸唔敢浸太耐,不過浸一陣已經覺得好舒服啦,幾日來嘅疲勞都舒緩左好多。浸完溫泉之後覺得好舒服好想訓返個好覺,第一次訓他他米感覺都好正,可能因為出面落緊雨,聽住雨聲又咁近大自然訓覺真係好舒服。
人氣文章:
Klook / Kkday最新優惠碼
Agoda最新10%折扣代碼
Hotels.com最新折扣代碼
Trip.com最新優惠碼
永安旅遊最新推廣碼
樂天旅行最新住宿折扣券
樂天旅行最新租車折扣券
日本樂天市場最新優惠券
Klook.com
如果喜歡這篇文章,請點個「讚」吧!