2008年東京春季賞櫻＋溫泉之旅（第二天[2]） – 淺草寺、隅田川遊覽船、台場

由築地去淺草要行返去原來個地鐵站，先坐日比谷線去上野，再轉銀座線。

仲見世通嘅入口 – 雷門

通往淺草寺嘅手信街 – 仲見世通

淺草寺正門

淺草寺內

淺草寺大殿

淺草寺都真係幾商業化，除左賣手信仲有好多小食大排檔。行完淺草寺我地就過去位於隅田川吾妻橋傍邊嘅遊覽船碼頭，準備坐遊覽船去台場，順便暢遊隅田川。

隅田川，兩邊開左好多櫻花，好靚架

由淺草去台場嘅船飛，票價1,220円，不過由淺草去台場冇船直去，要先坐去日之出棧橋碼頭，再轉另一隻船，全程大約一個鐘，船飛係冇定時間架，開船有位就上得

遊覽船，有幾種唔同款式，最多係呢款

係隅田川上坐船賞櫻花真係幾正架，夜晚係酒店見電視都有播。我地3點半左右已經到左台場，一上岸就係台場海濱公園，隔離就係商場Aqua City Odaiba，商場後面就係富士電視台。

台場海濱公園，後面係富士電視台，前面矮D嘅係Aqua City Odaiba

從船上影彩虹橋

去到台場因為時間仲早，我地就先去左富士電視台參觀，由地下坐扶手電梯上到去有個展覽館，展出嘅野好似係佢地製作嘅節目資料，不過對日劇冇乜認識，行左一陣就走人囉。

之後去Aqua City Odaiba行，同樣冇乜野啱，但係為左等入夜睇彩虹橋變色，焗住行左一粒鐘，最後決定先去位於Aqua City Odaiba嘅拉麵國技館食dinner，不過果度D拉麵真係好難食。

彩虹橋夜景，聽講會轉色，不過等左好耐都冇野睇

可能係海邊風大關係，入夜之後台場非常之凍，所以我地食完dinner就坐車返酒店啦，今次要坐一程私鐵去新橋站，再轉地鐵返新宿，返到新宿都只係7點過D，聽人講D大百貨公司係關門前會有壽司大平賣，所以我地都去左伊勢丹地庫嘅美食廣場睇下有冇乜野正野，原來日本百貨公司真係好多食物賣架，有糕點、魚生、壽司，總之就乜都有，不過D價錢冇乜點平。

行完百貨公司之後再去埋藥房shopping，不過原來東京嘅藥房係冇家屋清潔用品之類嘅野賣架。之後行左去百果園睇下有乜生果做消夜，不過呢度D生果一D都唔平。