----------

----------

2008年秋季京阪神紅葉+白浜溫泉之旅(第五天) – 海舟早餐、三段壁、千疊敷、ToreTore市場

20081129
海舟 > 三段壁 > 千疊敷 > ToreTore市場 > 梅田

 
第二朝起身之後,先浸個晨早溫泉先,然後就係早餐時間啦


早餐有日式和西式兩款,日式好食好多,而且仲好大堆頭

海舟早餐1海舟早餐2海舟早餐3
西式早餐,無日式咁多野食

海舟早餐4
食完早餐之後,又再浸多次溫泉,玩到11點夠鐘先Check-out走人。臨走時係佢個手信店買左一袋二袋手信走,其實同旅遊點既手信店比,係海舟度買既仲平一D架

 
其實白浜都唔係太多地方好行,離開左酒店之後我地分別去左三段壁和千疊敷兩處景點。由於自己開車,所以都好方便,如果要等巴士就真係幾麻煩囉

 
三段壁,不斷有團客阻住影相

三段壁1
下面個山洞就係三段壁洞窟,上面欄杆都冇支架,行埋去都好牙煙

三段壁2
下面就係千疊敷啦

千疊敷1千疊敷2千疊敷4
由於千疊敷既石頭冇咁堅硬,所以周圍都見到好多到此一遊既刻字

千疊敷3
去完三段壁和千疊敷兩處景點之後,順路亦去左海中展望塔影返張相,不過冇入到去。

 
遠處就係海中展望塔啦

海中展望塔1
海中展望塔就係梅樽酒店隔離,入去酒店停車場就係架啦

海中展望塔2
同日本其他旅遊景點一樣,白浜各個旅遊點都有印章可以俾人蓋章,記得周圍搵下蓋齊D印章做個留念

 
遊完幾個景點之後時間都已經一點幾,係時候食dinner啦。因為係白浜町內好似見唔到有合心水既食店,所以都係再次去返ToreTore市場。可能係星期六既關係,ToreTore市場明顯比起昨日熱鬧,唔單止人多左好多,而且海產既數量和種類亦多好多。而且今日亦俾我地發現係市場出面有一個可以租爐BBQ既地方,按人頭計每人俾300円就可以租佢個爐黎BBQ,食材當然要自己係市場入面買啦,不過就唔俾帶飲品入去,要飲野就唯有同佢買囉。

 
生蠔150円一件,好新鮮

ToroToro市場9
咁大隻蟹都係2000円左右一隻

ToroToro市場8
燒左好多貝殼類海鮮

ToroToro市場10ToroToro市場11
食完BBQ之後大約三點鐘,我地就起程開車返大阪。今次行行下覺得路牌指示同個GPS導航指示有出入,所以跟左個路牌指示黎行,點知就出事,最後兜左幾條路先行得返正途,下次都係信個GPSD

 
因為想趕係天黑前返到大阪,而且因為昨日行阪神高速好大風,所以決定回程時全程都行阪和自動車道。由田邊至和歌山市之間既阪和自動車道大部分路段只係得一條線,而且路面又幾窄,行得慢阻住後面既車又唔好意思,行得快又好危險,真係幾大壓力。而且因為係山區既關係,呢段路需要經過差唔多15條隧道,仲要係過完一條接住又一條,而且多數都係超過1千米 長既,最長果條有成3千幾米,行完呢段路真係身心疲勞

 
由田邊至大阪行高速公路大約用左兩個半小時,包括阪和自動車道同一段係大阪市內既阪神高速,路費加埋大約要4千幾円。去到大阪出返一般路面時已經係六點半,因為租車時約左七點半還車,諗住仲有大把時間啦,點知…..
因為還車時要入滿油,而係取車時工作人員俾左係梅田附近一間油站既地址同電話我地,所以輸入GPS諗住佢會帶我地去啦,點知我地用左半個鐘都仲未搵到。唔知係大阪市既道路改得快定係架車個GPS資料好耐冇update,我地照住佢行但就成日俾佢點左去D冇既路,有次GPS叫我地轉入一條路,但係果條路明明係一條火車軌,唔通叫我地追火車咩。之後當我地架車行走係大阪駅附近條大路時,個GPS只顯示我地係一片空地上,真攪笑。

 
最俾佢激死既係當我地幾經辛苦去到GPS指示既位置時,個GPS顯示已經到左,但周圍所見並冇油站既蹤影。最後因為怕遲左交車,所以決定唔入油就咁返去還車。由於冇入滿油,所以要由得租車公司黎計。其實佢都只係用目測既方法,睇一睇個油錶支針去到邊黎估你用左幾多油。我地兩日總共行左294公里 ,大約用左五分之三缸油。去到Counter計數要成4千1百幾円,我估如果去油站入都唔洗3千。

 
因為係大阪會住返同一間酒店,所以還完車就去返格蘭比亞酒店Check-in同攞返行李,然後就出去食dinner啦。而今晚既dinner係去位於梅田既堂山町本陣食和牛,由酒店行去都好近。呢間野上次去大阪時食過覺得好味又抵食,不過可能係自然規律,同魚心壽司一樣第二次食總係覺得冇咁好食。如果大家有興趣去,記得print返張免費贈飲既coupon帶埋去啊。

 
我地只係叫左呢個套餐,盛惠5200円

堂山町本陴
食完和牛之後仲有時間,於是入去Hep Five行下作為今日最後一項節目,因為時間已經幾晏,其他店鋪都已經關門,就只得最高果層既食店有開。

 
係Hep Five樓上一間甜品店食既人氣雪糕,盛惠900円
IMG_2631_resize

Related Posts Plugin for WordPress, Blogger...
2008年秋季京阪神紅葉+白浜溫泉之旅(第六天) - 奈良公園、春日大社、東大寺
2008年秋季京阪神紅葉+白浜溫泉之旅(第四天)III - 海舟:溫泉&晚飯

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁