2008年東京春季賞櫻+溫泉之旅(總結篇)

八日日本東京箱根之旅終於結束啦,係43零晨2點,拖住疲累嘅身軀同埋超重嘅行李,終於平安返抵家門。屋企嘅感覺真係好正,住完東京超細嘅酒店,返到屋企感覺間屋變得又大又舒服…..

 

雖然只係八日短短嘅行程,但係已經感覺到相當疲累,特別係回程果日,由踏上機場巴士開始,直至踏入屋企足足用左12小時,超辛苦,返黎之後抖左兩日都仲未恢復元氣。

 

 

自由行顧名思義就係可以好“自由”咁旅行,但自由嘅背後有一個好大嘅代價,就係“行”喇。跟鴨仔團雖則係冇乜“自由”,但係就勝在唔洗點“行”,旅遊巴車你去到景點附近,到步落車參觀是也,都咪話唔舒服。相反,自由行雖然可以自己話晒事,但係就一定會“行”到你死下死下,不過我就覺得自由行先可以體會到真正嘅旅遊,辛苦D都值得。

 

去到好似東京呢D大都市,雖然交通工具四通八達,地鐵同JR可以通往城市任何角落,但係其實正因為咁,行路嘅機會同路程先至又多又長。由於地方大,地鐵站往往會好大,由目的地行去地鐵月台往往需要幾百至一二千米路程,而且又經常需要轉線,由一個月台行去另一個月可能都需要幾百甚至過千米路,再加上車站樓級多,行上行落都幾係野。雖然冇正式計過,但相信係東京每日行路嘅路程一定比平時係澳門一個星期加埋行嘅路仲要多,所以自由行對腳骨力真係一個好多嘅考驗。

 

講返今次東京之旅,都總算一切順利,起碼冇凍病先。原定計劃去嘅地方大部分都有去到,亦去左幾個櫻花名所,睇到滿開嘅靚靚櫻花,不過唔知係唔係同富士山冇乜緣,去東京程機雖然坐到左邊窗口位,但係天氣唔好,睇唔到富士山。而去箱根果兩日仲落埋雨,連富士山個影都見唔到

 

今年日本嘅天氣有D反常,本來預測天氣比上年凍,預計櫻花會比上年遲開,點知東京嘅櫻花未到4月已經滿開晒,不過就啱啱好符合晒我地個行程,俾我地睇到滿開嘅櫻花,到我地42走嘅時候,已經開始見到花落嘅情況啦。但係箱根就相反,因為天氣太凍,山上嘅櫻花一棵都仲未開

 

至於天氣方面,春天嘅東京都真係幾難著衫下,我地去果一個星期都係9度至16度左右,中午有太陽時會有16度,都幾熱下架,一定要除左件褸,但係朝早同夜晚都係9度左右,如果有風嘅話都幾凍,若然去台場呢類海邊地區就更加凍,所以一日之內有時熱有時凍,都幾麻煩

 

另外,原來到左春天大部分室內地方(包括酒店、商場、百貨公司同埋地鐵等等)都唔會再開暖氣,所以唔怕去到室內會出現好似冬天時好焗嘅情況。

因為返黎之後仲未整理好D相,所以照片同遊記,可能要等多幾日得閒D先會post出黎。下面係今次旅程嘅使費(三個人),俾大家參考下先

                                                                                                        港幣

1. 機票+酒店                                                                              24,557

2. 機場稅+燃油附加費                                                                1,773

3. 來回澳門至香港機場交通費                                                  1,170

4. 日本交通費                                                                               4,170

5. 入場劵及遊樂設施                                                                   1,750

6. 早午晚三餐                                                                               5,685

7. 小食、飲品及其他雜項                                                              925

旅行支出(三人,不包括購物)                                                  40,030

fb share

如果喜歡這篇文章,請點個「讚」吧!

fb share

發佈留言

發佈留言必須填寫的電子郵件地址不會公開。 必填欄位標示為 *

收到您的留言後,小弟會盡快回覆。如果您在留言中提供的電郵地址正確,且已勾選同意接收電郵通知,當您的留言通過審核並有回覆時,系統會寄出電郵通知您。回答您留言所查詢的問題有時候需要一些時間研究,請耐心等待。另外,如果您還未讚好過本Blog Facebook專頁,可以請給我一個讃嗎?!就當作是我花時間和精神解答您問題的一點支持吧。謝謝!

fb share

如果喜歡這篇文章,請點個「讚」吧!

fb share