----------

----------

2008年東京春季賞櫻+溫泉之旅(第一天) – 新宿太子酒店

2008326(早上有雨,下午天晴,氣溫9~16度)
行程:澳門 _ 香港機場 _ 成田空港 _ 新宿 _ 六本木山

 
計劃左成個幾月,今日終於出發,心情當然興奮啦。晨早4點零就起左身,因為要坐朝早6點船過香港,5點零就出門口坐的士囉。原來咁早call電召的士都有好多車,話咁快就到左碼頭。第一次咁早去到碼頭,有好多香港人坐係樓梯度恰緊,可能賭完等緊6點第一班船返香港

 
船公司同海關都仲未開門

澳門碼頭

 

三個人三件行李,最大果個喼係我架,返黎果陣有成30.5公斤重,好彩上到飛機,不過就拉到死死吓

行李

 

6點船等到59船公司先有人黎,由於咁早行李部仲未開工,所以件行李唔洗托運,咁大件自己攞上船都幾係野,好彩去果陣冇野好輕,回程果時就慘好多啦

 
7點過D已經到左香港上環,之後行過對面維德廣場樓下個巴士站等A11號機場巴士去機場,去到啱啱有架車走左,唯有企係當等多20分鐘,等到7:50終於有車到,第一次坐機場巴士都總算順利,太約40分鐘就到機場。

 
上環機場巴士站,果朝落雨,上車時都幾狠貝下

香港機場巴士站

 

今次旅行社出嘅機票係e-ticket,兩日前已經係網上check-in左,仲mark左左手邊窗口位,諗住可以係上空一睹富士山景色啦,點不知當然太多雲,乜都睇唔到,唉。

 
飛機途經九州時見到鹿兒島櫻島火山

鹿兒島

 

架機例牌遲左大約30分鐘起飛,10:40起飛,飛左唔洗3個半鐘,當地時間下午3點過D就到步啦。今次過海關都幾快,半個鐘多D就出到去,因為佢地好似trainD新人,所以已經慢左,如果係用D熟人嘅應該仲會快好多添。

 
成田空港Terminal 2入境大堂,一出黎左手邊落一層扶手電梯,再轉右直出就會去到JR Travel Service Center同埋Narita Express車站架啦

入境大堂

 

成田空港Terminal 2 JR Travel Service Center,對面就係Narita Express車站

JR機場服務中心

 

4點多D我地已經到左JR Travel Service Center,係呢度買左Narita Express車票同埋迪士尼換票劵。由機場去市區坐Narita Express真係幾抵,因為3,500円嘅票價除左可以坐一程Narita Express出市區之後,仲有一張價值2,000円叫Suica卡嘅儲值票,其中有1,500円可以用黎坐地鐵或者JR,另外500円可以係走果日退返錢,所以實際上車費只需要1,500円

 
而呢張Suica卡同香港八達通卡一樣,除左可以用黎坐JR火車之外,坐地鐵都可以,不過坐私鐵好似就唔用得,另外亦可以用黎買野,真係幾方便,所以之後都有再增值,唔洗次次坐車都去買飛咁麻煩

 
至於迪士尼入場劵,其實唔洗買定,因為去到通常有即日嘅一日劵買,如果買定反而限死左果日去,就算之後想更改行程都唔得

 
由成田坐火車去新宿大約一個半鐘,5:45就到左新宿駅啦。我地係東京住嘅6晚全部都book左新宿太子,之前睇左網上介紹點行,所以落車之後就由新宿駅東口出,拖住行李行去酒店。不過後來行左幾日發現,其實由新宿駅行去新宿太子,選擇由西口嘅小田急百貨出比起由東口會近一D,同埋好行好多,因為東口出要過三次馬路,而且行人路好窄,人又多,行得好辛苦。相反西口出黎嘅行人路就闊好多,人又少D,而且只係一條直路同只需要過一條馬路就得

 
新宿太子張床,小弟本來一個人住單人房,不過佢都俾左間semi-double我

酒店房

 

聽好多人講都話新宿太子幾好,點知入左房真係好失望,真係好……細啊。真係未住過咁細間房,相比之下上次公幹果間真係大好多,而對上一次係大阪住嘅Cross Hotel雖然平過佢,但都闊落好多,而呢間新宿太子真係超細,想搵個位開喼都有D難度。最失望嘅係佢個沖涼房,一入去仲以為入左飛機上嘅洗手間。不過話時話,佢個沖涼房係成個用膠板倒模造成,入到去感覺就好似係飛機或者火車上嘅洗手間一樣,所以每次入親去企係度都有D以為坐緊飛機同火車,有種搖下搖下嘅感覺

 
從酒店望出去嘅街景,條路左邊直去新宿駅西口,中間對住斑馬線頂層有紅色招牌嘅係六歌仙所在嘅大廈

酒店房外望1

 

從酒店望出去嘅街景,呢間係由箱根回來之後再check-in時嘅房,呢邊對住歌舞伎町,下面條馬路係靖國通,因為之前住另一邊對住火車軌,一到好靜個陣就會聽到火車行過嘅聲,所以第二次check-in時特登要求住呢邊,點知原來都係一樣聽到,而且呢邊向東,朝早好曬,所以建議都係住另一邊好D

酒店房外望2

 

酒店每層都有一個自動售賣機,同埋免費熱水供應機,因為房內冇水煲,只得一個水壺,要自己攞出黎裝水

酒店自動售賣機

 

新宿太子算係區內最近地鐵站同JR站嘅酒店,不過由落車到行到返酒店門口最少要行800~ 1,000,每日咁行都幾辛苦下。如果坐地鐵丸之內線,係新宿三丁目站落車會比係新宿站落車較近酒店。

 
今次住新宿,發現新宿日日都有人派紙巾(當然係有廣告果D啦),所以如果住呢區,基本上係可以唔洗帶紙巾去架啦

 
酒店check-in之後抖左一陣,就出發去第一站行程,本來計劃係去涉谷先,不過見時間早左,於是改左去六本木山先。不過去到六本木山真係有D失望,原來朝日電視台冇乜野睇,而毛利庭園亦都好細,得幾棵櫻花樹,而且夜晚亦唔係太靚,最後上左Mori Tower 52樓展望台睇夜景,不過亦唔係太得,1,500円真係唔值。雖然係咁,不過成個六本木山地區真係俾人感覺好高級下,街邊有好多雕塑幾有藝術feel。

 

Mori Tower 52樓展望台見到嘅東京鐵塔

東京夜景

 

行完六本木山我地再係附近搵左間壽司站食左個晚餐,之後就返酒店沖涼抖抖。半夜去左新宿南口出面嘅車仔檔食拉麵,不過唔抵食,一碗麵得一塊肉,仲要收700円
第一日其實主要都係坐船坐車,就咁就過左。

Related Posts Plugin for WordPress, Blogger...
2008年東京春季賞櫻+溫泉之旅(第二天[1]) - 築地市場
2008年東京春季賞櫻+溫泉之旅(總結篇)

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁