2008年秋季京阪神紅葉＋白浜溫泉之旅（第二天）I – 金閣寺、銀閣寺

2008年11月26日
梅田 > 京都駅 > 金閣寺 > 銀閣寺 > 清水寺 > 梅田

 
秋天關西既天氣都幾清爽下，呢幾日氣溫都係介乎7度至15度之間，除左早晨較凍之外，其實大部份時間都可以唔著褸。不過開頭幾日就冇乜陽光，個天陰陰地，都有D影響影相既質素架。另外，最唔好既地方係日落時間太早，下午5點之後就開始天黑，5點半周圍已經係黑媽媽，大大減少左遊覽既時間。

 
今日既行程主要係參觀京都寺院，而重頭戲就係去清水寺參觀夜間參拜。今朝本來打算一早起身，不過最後都係摸到9點半先去食酒店早餐，去到發現西式早餐9點半close，只可以選擇食日式啦。

 
酒店既日式早餐，真係好睇唔好食，食完之後果朝仲攪到有D肚痛添

食完早餐就開始京都之旅啦，首先由大阪駅坐JR去京都駅，本來預計唔洗30分鐘就到，點不知…..上錯普通車，站站停，最後用左50分鐘先去到京都駅。到左之後再係駅前巴士站坐巴士去金閣寺，點不知等左好耐先有巴士到，而且仲要係行左成大半個鐘先去到金閣寺。

 
京都巴士。今次坐巴士發現左兩樣野，第一樣係巴士停站時會向門果邊傾側，方便乘客上落，開頭仲以為果邊人多架巴士受重力側埋一邊添；第二樣係巴士係紅燈前停車會息匙，真係好環保喎，不過唔知會唔會好傷engine呢。

呢度就係金閣寺表參道入口啦

金閣寺表參道

紅葉啊!!

跟住就到金閣寺正門

金閣寺入場券，每人400円

今次去日本發覺佢D景點門券收費真係好似亂咁定，有D好有價值既地方，例如金閣寺、姬路城呢D世遺景點，只係收400~500円，但有D冇咩睇既地方，好似白浜既三段壁洞窟就要1200円，而京都寺院夜間參拜既收費亦相差好遠，最出名最多人去既清水寺只收400円，但係隔離既高台寺就要900円，唔通多野睇D？

 
呢度就係金閣寺入面既主角金閣啦

從後面影既金閣，近睇冇咩特別，仲以為係油左層金油

 

金閣寺入面既投幣式求簽機，真係求簽都自動化，唔知準唔準架呢

出門口之前有成排手信店，仲可以試食架，我地就食左好多，不過冇買

行完金閣寺之後，我地就行返過剛才落車個巴士站斜對面既反方向巴士站，係呢度可以坐巴士去銀閣寺。不過由金閣寺坐巴士去銀閣寺都用左大半個鐘，乜京都真係咁大架咩？定係佢行得慢又多紅燈位？

 
銀閣寺附近既哲學之道，點解呢度D葉咁快落晒…..

感覺好掉零既哲學之道

前往銀閣寺既路上，同清水寺一樣都係好多手信店

終於到左銀閣寺門口啦

呢度就係銀閣寺入口，入場費要600円，貴過金閣寺，唔知係唔係佢堆沙成本太高既關係

銀閣寺入面

從銀閣寺後山上面遠眺京都

參觀完銀閣寺差唔多係3點半左右，但係感覺上就好似平時5點幾咁，好似有D就黎天黑既感覺，因為仲未正式食過野，所以我地決定先坐巴士去河源野搵野食先。