----------

----------

2008年秋季京阪神紅葉+白浜溫泉之旅(第四天)I – 白浜自駕、ToreTore市場

20081128
梅田 > 白浜 > ToreTore市場 > 圓月島 > 海舟

 
今次關西之旅既重頭戲出場啦…..,就係自己由大阪開車去140公里外既和歌山縣白浜町浸溫泉囉。

 
今次計劃係白浜停留兩日一夜,原本個計劃係打算由大阪坐明光巴士去白浜,並冇自駕車既計劃。最後決定自己開車,係係出發前一個星期作出既決定,事緣係出發前睇左好多人既Blog,發覺好多人都係日本自駕車,有D仲係第一次去日本就自己開車添,睇左人地介紹,感覺係日本開車並唔因難,最緊要既係日本同澳門一樣都係右鈦,完全冇適應上既困難。不過因為自己一直揸開棍波車,而日本出租既車全部都係自動波,都有D擔心適應上會唔會有問題,好彩揸落又真係完全冇問題喎

 
另一個決定自駕車既原因,係因為係租車代理ToCoo既網頁見到日產租車咁啱做緊promote,只需要7,980円就可以租日產March兩日一夜,個價仲係包埋保險添,比正常起碼平左2至3千円。

 
其實同坐其他交通工具去白浜相比,自駕車都唔算係貴,下面係三種交通工具費用既比較。

 
自駕車:租車7,980円+油費3,000円+高速公路費8,000円 = 大約19,000円
JR:(JR來回車票10,000円+白浜巴士乘車券1,300円)x2人 = 大約22,600円
明光巴士:(明光巴士來回車票5,000円+白浜巴士乘車券1,300円)x2人 = 大約12,600円

 
如果兩個人去,自駕車費用仲平過坐JR,雖然同坐巴士比貴左6千幾円,但係因為係白浜町內巴士班次唔係咁密,坐車比較困難,自己開車會方便好多,貴D都值得架,而且對於澳門人黎講,冇咩機會可以揸長途車,而且仲係郊外添,所以可以試下係日本開車都算係一項好好既節目黎架

 
係日本租車,通過ToCoo真係又方便又抵,ToCoo係一間租車代理,通過佢租車,比起直接向租車公司租一般都有一定折扣架,而且ToCoo既網頁係英文,操作好方便。租車步驟大致如下:
1. 進入ToCoo主頁,Click入你租車的城市;
2. Click入你打算取車的租車公司分店;
3. 選擇要租的車輛型號,Click右邊紅色的“Rental charge & Reservation”按鈕;
4. 選擇租車Season輸入取車和還車日期和時間;
5. 按下“Simulate”按鈕計算租車費用【系統會計算出三個費用,分別是Calendar System(按日租計算)、Time System(按時租計算)和Normal Rental Price(沒有折扣的費用)】;
6. 比較Calendar System和Time System的費用,然後按下費用較低的按鈕(通常按Calendar System計算的會較低);
7. 輸入各項資料【取車和還車地點、日期和時間,人數,是否需要GPS(一定需要)、CD Player,是否要非吸煙車(日本租車no smoking車好似比somoking少好多),其他設備要求,姓名,電話,日本酒店名稱和電話,通信電郵(不能是hotmail或yahoo),國際車牌編號,信用卡資料,日語程度,其他特別要求等等】;
8. 確定資料無誤後,按“Send”按鈕寄出租車Booking

 
通常第二個工作日就可以收到電郵,回覆是否有車,如果confirm你有車,租車過程就算完成。填寫租車Booking時可以唔填國際車牌先,我今次都係等佢覆左有車先去交通事務局申請國際車牌,一個工作日就有架啦。不過出左國際車牌之後,記得用電郵通知ToCoo你個國際車牌Number啊。

 
一切完成之後,就要將ToCoo Confirm你租車Booking既電郵Print出來帶去日本,到取車時需要出示張電郵Print-out、護照、本地車牌、國際車牌。租車費用需要在取車時一次過俾晒,可以用cash或信用卡。另外,如果係取車日的一個星期內取消租車,係需要按規定charge一定費用架。

 
講左咁耐租車手續,都係時間講返今日行程啦。

 
今次計劃係白浜玩兩日一夜,即係今晚會係白浜住一晚,所以需要先係格蘭比亞酒店Check-out先。而且約左今朝8點半去租車公司取車,所以要一早起身,Check-out後將大件行李寄存係酒店之後,就行去日產租車公司取車。因為尋晚已經搵定位置,所以由梅田地下街行過去好快就到。

 
位於大阪第一酒店既日產租車公司Counter

日產租車Counter

 
去到俾張租車Bookinge-mail Print-out佢,跟住佢地係電腦度Check完就會問你要埋護照、國際車牌同澳門車牌去影印。攪掂之後就會Print張單出來收租車費用,兩日一夜租車盛惠7,980円。

 
然後個職員會同你解釋幾樣重要事項,包括還車前要入滿油,入D咩油,附近油站地址,同埋遇到交通意外要點做等等,其實都唔洗點聽,因為佢講既野都有張用英文寫既資料單張俾你,你可以之後慢慢睇都得。OK左之後個職員就帶我地落去停車場取車。

 
租車公司既車場位於大阪第一酒店地庫停車場,有好多架日產March

日產租車停車場

 
將會陪住我地兩日既March,不過對於黑色車身唔係太鍾意囉,問佢可唔可以換其他Colorful一D既車,佢話可以不過其他顏色既都係吸煙車,最後冇法子都係要呢部。部車雖然只得1000cc,不過行咁長途都絕冇問題,但係上斜路就冇乜力囉。
日產March

確定左要部車之後,就先睇下車身有冇花,睇左一陣都發現有兩處小小花,跟住佢會係本簿度記低佢,果部簿之後會放係部車度架。不過其實還車時佢地都唔會Check部車有冇花,所以如果冇發生交易意外,我估即使有整花小小佢地都唔會點理架啦。

 
之後佢會教你點用個GPS,其實都好易,一學就識,而且車上仲有張用英文寫既使用說明,可以慢慢參考。有左個GPS,基本上都唔洗再用地圖架啦,不過Plan行程既時候最好睇下地圖先,咁起碼可以對之後既行車路線可以心中有數先。下面個地圖網幾詳細架,係Plan行車路線既好幫手:http://www.mapion.co.jp/

 
由去到Counter到攪掂開車走人大約用左半小時。

 
開車啦!第一次係外地開車,真係有D緊張。我地第一站係白浜ToreTore市場,係GPS輸入電話號碼之後,好快就有條行車路線出黎,跟住行就OK架啦。不過啱啱開始時真係唔係太順利,一來唔係咁習慣睇個GPS,二來唔知係唔係返工時間,大阪市內D車都開得幾快下,攪到有幾個街口都轉唔切線,最後兜左好多路先搵到個上阪神高速既入口。係入口度又攪左一輪,同兩個阿伯雞同鴨講左一輪之後,先知原來上阪神高速係要係入口俾左錢先,我地上呢段路收費700円。

 
第一次行高速公路,本來諗住行阪神高速沿住海岸行可以睇下海景,點知原來海邊真係好大風,幾驚我地架車仔會被吹走

 
阪神高速,好驚前面架貨車D車跌落黎,好彩最後佢轉左去神戶方向

阪神高速

 
想試下係阪神高速行車既感覺,可以上佢網站玩下。

 
頭先俾既700円路費,只係去到泉大津為止,由泉大津去到泉佐野仲要再俾多500円架。去到泉佐野要出返一般公路,再轉上阪和自動車道。阪和自動車道既俾錢方法,係先係入口既閘口(一定要行一般閘口)按一張飛,就好似入停車場咁,再係出口俾張飛職員,然後俾錢就得架啦。想知道高速公路收費,可以用下面兩個網頁黎Check下。只需要係地圖上選擇出發地同目的地,就可以計算行車時間同埋路費架啦。
日本高速公路:http://www.driveplaza.com/dp/SearchTop
西日本NEXCOhttp://search.w-nexco.co.jp/

 
阪和自動車道,沿途山上既紅葉好靚

阪和自動車道

 
紀川SA,阪和自動車道上有幾個停車休息站(叫SA),其中紀川SA算係較大既一個,佢位於和歌山市附近,可能因為位於大阪與田邊既中間位置,所以好多人都選擇係呢度停車休息架

休息站
過左和歌山市之後,南紀地區基本上都係山地,所以阪和自動車道由和歌山市至南紀田邊之間,有大大小小10幾座隧道,最長既有3千幾米架,而且隧道每邊只得一條行車線,路面又窄,兩條行車線中間又使用鐵柱隔開,以時速80100公里行駛都咪話唔驚……
 

因為一來想體驗下行國道既滋味,二來一直行高速公路精神太緊張,三來想俾少D高速公路費,所以我地係去到有田就離開阪和自動車道,改行42號國道去白浜。國道一般車速限制為60公里,部分多人既地區會限制40公里,不過係郊外由於車唔多,又冇咩人,所以好多時行80公里都冇問題。雖然行國道路程會遠D,再加上車速慢D既關係會用多左時間,但個人覺得行國道比行高速公路舒服好多,壓力都少D

 
40號國道上

IMG_2077_resize
接近白浜既40號國道上大部分路段都沿海邊行駛,風景好靚架。

IMG_2092_resize

 
進入田邊市區,好快就到白浜啦。

田邊

 
終於到達白浜ToreTore市場啦,呢度有大片停車場免費任泊。

ToroToro市場1

 
由於係大阪行錯路,用左差唔多20分鐘先上到高速公路,再加上中間改行國道,同埋係田邊又行錯路,所以最後用左4個小時先到達白浜第一站ToreTore市場,比預計慢左成1個鐘。

 
ToreTore市場正門

ToroToro市場2

 
ToreTore市場並唔算大,入到去一眼睇晒,大致可分為三部分,包括海鮮市場、手信、食店。

 
ToreTore市場海鮮檔

ToroToro市場3

 
ToreTore市場吞食魚檔,好似11點鐘有劏吞食魚表演架。

ToroToro市場4

 
ToreTore市場內既食店

ToroToro市場6

 
今日午餐,係海鮮檔買左之後可以坐係食店度食

ToroToro市場7

 
係白浜各個景點賣既手信基本上都差唔多,只係包裝花紙唔同,不過價錢最平既應該都算係ToreTore市場入面既手信店。我地係ToreTore市場已經買左一袋二袋手信,好彩有車,如果要坐巴士都真係唔知點算,所以自駕車真係好正啊

 
食完野又買左手信,係時間起程去溫泉酒店啦。我地今晚會住既酒店叫海舟,不過可能間酒店只係開左一年太新,輸入電話號碼之後個GPS都搵唔到佢既位置,好彩佢只係梅樽酒店附近,所以輸入梅樽既電話之後跟住GPS去左梅樽先,再向前行冇幾耐就搵到海舟啦。
未去白浜之前以為白浜係海邊既平地,點知去到發現同想像好唔同,原來白浜主要係山地,而且都幾偏僻下,市鎮之內真係唔係太多店鋪。 

Related Posts Plugin for WordPress, Blogger...
2008年秋季京阪神紅葉+白浜溫泉之旅(第四天)II - 浜千鳥の湯.海舟、白浜
2008年秋季京阪神紅葉+白浜溫泉之旅(第三天) - 嵐山、心齋橋

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁