----------

----------

《2009年聖誕首爾之旅》- 第一天(1) – 明洞百濟蔘雞湯、購買南怡島車飛

20091222(星期二),天晴,氣溫:around零度

 

一向以來都好少會係聖誕新年呢D大時大節嘅日子去旅行,因為好怕人多同人迫嘅環境,而且呢D日子去旅行,機票、酒店都會貴好多,唔化算。但係今年聖誕節,竟然忘記左呢條戒律。

 

原本嘅計劃係打算去日本白川鄉,只可惜到落實計劃時,發覺果段時間日本嘅機位通通full晒,原來呢D日子外遊嘅人真係咁多架。所以最後只好退而求其次,選擇左短短地去幾日韓國首爾。

 

今次首爾之行選擇由澳門出發,貪佢方便。不過澳航去首爾嘅航班時間非常之差,如果下次有機會再去,都唔會再坐佢。

* * * * *

 

由澳門去首爾嘅航班係零晨2:10起飛,去到首爾大約係當地時間上午6:30。韓國海關都幾有效率,好快就過左關,取回行李出到大堂都只係7:30

 

人人都話換錢係仁川機場會抵D,所以出到大堂第一件事就係要換錢。係韓國換錢需要收手續費,之前係網上print左張coupon,換錢手續費有discount

 

韓國最大面額嘅紙幣係5萬元,不過未見過,兌換店都只係全部俾1萬元面額嘅我地,一張大約等於MOP70,我地只係換左HK20,000,等於大約3百萬韓國元,足足有成差唔多300張,日日要帶住成舊銀紙出街,好慘。

* * * * *

 

換完錢第二件事就係去買機場巴士車飛。我地今次book左位於明洞嘅酒店,由仁川機場去,坐6015號巴士。

 

機場巴士售票處就係大堂裡面,好容易搵到,只需要向counter職員講要買嘅巴士number,以及人數就可以架啦,跟住佢會話你知係邊個門口出去坐車,6015號巴士嘅乘車處係12號門外。

 

你可以係大堂counter買埋回程車飛,不過其實冇咁嘅必要,因為所有車飛上都只係有巴士number以及購買日期,並冇標示乘車日期、班次,亦唔會有劃位。所以張車飛只代表你已經俾左錢,攞住張車飛係購買日起15日內任何時間都可以乘車,使用車飛坐車同上車俾錢係完全一樣,所以冇需要買定回程。

* * * * *

 

由仁川去明洞車程大約70分鐘,巴士到達下一個站前會有韓文同英文廣播站名,但係佢D英文好難明,唔識聽,不過都唔洗怕,因為當巴士進入南大門、明洞一帶之後,廣播會有埋普通話,雖然發音都係怪怪地,不過起碼可以get到佢意思。

* * * * *

 

我地住嘅酒店叫Prince Hotel Seoul,就係明洞世宗酒店嘅對面馬路。當初以為係世宗酒店落車行過去好方便,點知去到先知實際環境同想像好唔同。

Prince Hotel

 

 

Prince Hotel Seoul算係一間細酒店,大堂好細,不過房間都幾大,地板係木地板,裝修得幾有現代感,住落真係幾舒服。不過如果大家去首爾,我唔會建議大家住呢間酒店,最主要嘅原因有兩個:

 

第一,Prince Hotel Seoul雖然話係位處明洞,不過佢係係明洞購物區對面馬路,一路之隔氣氛就好唔同,明洞購物區人山人海,商店林立,非常熱鬧;但係對面馬路嘅Prince Hotel Seoul嘅周圍就極之冷清,感覺上非常之唔爽。

 

第二,Prince Hotel Seoul與明洞購物區之間嘅馬路係冇路面過路設施架,要過對面只可以行行人隧道,而韓國嘅行人隧道係唔會有扶手電梯,亦冇升降機,上落隧道要行幾十級樓梯。所以當你坐機場巴士係世宗酒店落車,拖住個喼去Prince Hotel Seoul,以及回程由Prince Hotel Seoul拖住個喼去世宗酒店門口等巴士時,你就會發覺住Prince Hotel Seoul係一個錯誤嘅選擇。

 

如果要以位置嘅方便作為標準係明洞搵一間酒店,我覺得Savoy Hotel係最佳嘅選擇,呢間酒店就係明洞購物區之內,對於主打shopping嘅人士係最佳嘅選擇。Royal Hotel亦都唔錯,呢間酒店距離明洞街與中央通交界處只有廿幾步路。另外,位於地鐵乙支路入口站附近嘅ibis酒店以及樂天酒店位置都好好,呢兩間酒店好接近樂天百貨,方便shopping,而且亦近地鐵站。其實明洞主要嘅購物區係由退溪路、南大門路、乙支路以及三一路所圍成的四方形地帶,而最旺嘅地方就係明洞站與乙支路入口站之間嘅地帶,係呢個地帶之內嘅酒店位置都唔錯。

* * * * *

 

坐零晨機真係好辛苦,上次去北海道領教過,今次又再試多一次,超眼訓,真係好想即係入房訓返幾粒鐘。可惜酒店要等到下午兩點之後先可以check-in,唯有暫時寄存行李,等夠鐘再返來。

 

air macau去首爾果程機只係每人派左個包,食完都唔飽。再加上天氣咁凍,真係有D饑寒交逼嘅感覺。所以放低行李之後,首要任務係去醫左個肚先。

 

可能係購物區嘅關係,上午10點嘅明洞仲係水靜河飛,D舖頭都仲未開門,想搵個地方食D嘢都唔容易。

明洞1明洞2明洞3

 

 

最後去左呢間百濟蔘雞湯食人蔘雞,每份₩13,000。如果只打算食一次人蔘雞湯,咁最好留返個肚去土俗村先食,因為土俗村嘅味道會好好多,不過亦有朋友話“百濟蔘雞湯”好味過“土俗村”,所以味覺呢家嘢有時真係見仁見智。

百濟蔘雞湯1百濟蔘雞湯2百濟蔘雞湯3

 

 

食完熱辣辣嘅人蔘雞湯之後總算回復返D體力同精神,可以出去行下街。因為明洞未有舖頭開門,所以第一站選擇去仁寺洞。

 

2006年尾時曾經去過首爾公幹,當時地鐵仲係用緊人手賣票,但今次黎到,發現全部換晒自動售票機。自動售票機好易用,步驟如下:

 

1.選擇語言,2.按橙色嘅一次性按鈕,3.按目的地車4.選擇人數,5.按照所顯示嘅金額入錢,攪掂攞飛。

地鐵

 

 

如果往來首爾市內各主要車站,一般每程車費都係₩1,000,較遠嘅站可能要₩1,100₩1,200。用自動售票機買單程車票飛時,要收取₩500按金,出閘後需要將車票放入退款機退返按金。

 

按照旅遊書介紹,可以買張T-Money,方便搭地鐵。不過其實買T-Money並唔係太化算,一張T-Money要用₩2,500購買,冇得退返,但係之後每程車費可以平₩100,即係話要坐超過25程地鐵先可以回本。其實如果行程唔緊湊,一般一日只會坐到3~4程地鐵,就算5full day都係首爾市內,乘坐地鐵嘅次數都唔會超過20程,所以除非長住,否則買T-Money一定回唔到本。其實每次購買單程車票並唔會好麻煩,所以絕無需要去買張T-Money

 

如果距離短坐的士亦唔會太貴,係光化門、明洞、仁寺洞一帶嘅主要旅遊區,日間車費都只₩4,000左右,如果有四個人share費用同坐地鐵一樣。

* * * * *

 

韓國嘅栗子真係好大粒,不過可能因為咁嘅原因,所以街邊炒栗子好多都炒得唔熟,如果買記得睇清楚先。

仁寺洞4

 

仁寺洞街主要賣各種有韓國特色嘅手信。

仁寺洞1仁寺洞2仁寺洞3仁寺洞5仁寺洞6

 

 

去仁寺洞除左買手信之外,係要買定去南怡島嘅車票。係仁寺洞塔洞公園旁邊有去南怡島嘅巴士,每日一班,早上9:30由首爾去南怡島,下午4:00由南怡島返回首爾。如果遊客少可以去到上車先買飛,不過如果怕到時冇位,亦可以係附近嘅旅遊服務中心買定飛。南怡島套票₩23,000,包括來回車費₩15,000以及入場劵₩8,000,套票同單買相同價錢。係旅遊服務中心買套票時,佢只會用A4print一張收據俾你,上面有你個名、人數、坐車日期,睇落好簡陋,不過佢唔會呃你嘅,到坐車時俾張紙個司機,佢會係張list度對返你個名,之後就會俾正式車票同入場券俾你架啦。

 

呢度就係南怡島係首爾嘅旅遊服務中心,位於仁寺洞街靠近塔洞公園附近,由紅色招牌門口入去上二樓就係。

仁寺洞7

 

 

塔洞公園向仁寺洞街呢邊就係上車嘅地方,巴士number1029

仁寺洞8仁寺洞9

 

* * * * *

 

行完仁寺洞差唔多lunch時間,決定先返明洞食午飯,再去酒店check-in

中午時間嘅明洞,人流明顯多左D

明洞4

 

 

按照旅遊書介紹,午餐去左食明洞餃子,去到見到好多當地人排隊,諗住味道一定唔錯啦,點知食落感覺味道麻麻。

明洞餃子

 

 

待續. . . . . .

Related Posts Plugin for WordPress, Blogger...
《2009年聖誕首爾之旅》- 第一天(2) - 景福宮烤肉店

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁