《2009年聖誕首爾之旅》- 第一天(2) – 景福宮烤肉店

食完野周圍行下，行到兩點幾終於可以去酒店check-in啦。入到房第一時間做D乜？當然係上床訓覺啦。坐夜機真係好辛苦，試過上次去北海道同埋今次去首爾之後，以後都要盡量避免坐夜機。可能年紀大左，成晚冇訓第二日真係會完全冇晒精神。

就係咁，我地係酒店度冇較鬧鐘，訓左四粒鐘，一直訓到七點先起身。再沖埋個熱水涼，成個人精神晒先至正式出動遊首爾。

* * * * *

夜晚嘅明洞真係同日間完全唔同，唔知係唔係臨近聖誕節關係，成條街都係人。由於已經係八點幾食晚飯時間，所以決定先醫左個肚先。對於唔食得辣嘅人係韓國食野，燒烤似乎係少數可供選擇嘅其中必然之選。今晚我地就決定去豪一豪，去左一間比較貴嘅烤肉店 – 景福宮。

景福宮雖然位於明洞，但係就離開明洞街購物區較遠。照住地圖沿明洞街向明洞教堂方向行，再過埋一條大馬路(三一路)向前行少少就到，由明洞站去大約行15分鐘。

可能係平日，入面並唔係有太多人客，不過連埋我地就有三枱港澳遊客，睇黎大家都係跟住同一本旅遊書嘅指引而來。

因為唔識佢餐牌上寫D乜，所以按照旅遊書介紹，要左一個兩人份量嘅拼盤(₩6x,xxx)，再加多一份頂級牛肩肉(₩4x,xxx)。

先來好多前菜，一來由於太辣，二來唔想食飽左食唔落主菜，所以唔係食太多。左邊碟菜係用黎包住牛肉食嘅。

呢間烤肉店係有專人幫你燒架，唔洗自己動手，燒完夾黎食就得架啦。

其實牛肉份量並唔係太多，兩人食都只係啱啱夠。味道方面，個人覺得只係麻麻地。

今餐食左大約₩12萬，因為之前print左張coupon，有9折優惠，找數時盛惠₩10萬鬆D。

韓國並唔係好似日本咁有好多消費折扣券可以使用，不過仍然有兩個日文網有一D首爾商店嘅折扣券可以download。

SEOUL NAVI網折扣券

Konest韓國旅遊情報網 (並唔係所有列出嘅店舖都有折扣券)

食店折扣券 (可按食物種類或地區搜尋，Click入你想食嘅食物種類或者地區之後就會列出店舖list)

商店折扣券 (可按商店類別或地區搜尋，Click入你想買嘅商品類別或者地區之後就會列出店舖list)

更新：關於韓國折扣券的資料，可參考<韓國折扣券大搜集>呢篇文章。

* * * * *

食完飯之後我地決定先去位於首爾站嘅樂天超市。原本係冇計劃去行超市架，不過因為係澳門買錯左插蘇轉換器，去到酒店先發現用唔到，但係明洞又搵唔到買呢類產品嘅地方，所以焗住要去樂天超市搵下有冇。

去韓國之前只知道佢地用嘅插蘇係兩腳圓腳果種，並冇留意原來佢嘅插座全部係圓形凹入去嘅，一定要用圓形插頭先可以插到入去，而我地帶左一個方形圓腳插頭過去，所以根本用唔到，唯有被迫去超市買啦，好彩係樂天超市都買到一個，可惜只得一隻款，而且仲要係超貴。

由明洞去首爾站只有兩個站，係標示樂天超市嘅出口出到地面行冇幾耐就係超市所在。睇旅遊書介紹，講到首爾嘅超市好似好大好多嘢買咁，而且仲將首爾站呢間樂天超市排名第二位。但係去到發覺呢間超市真係唔多大，貨物種類又少，完全冇嘢啱買，所以我地買完插蘇轉換器就打道返回酒店休息。

第一天行程完結