《2010年新春台北之旅》- 第一天(1) – 丹迪旅店天津店(大堂篇)

[ 2010年2月14日 (星期日，年初一)；日間天晴，晚上微雨；氣溫：around 15度]

終於等到虎年大年初一啦，因為要坐朝早7:35飛機，所以年三十晚食完團年飯之後，就返屋企訓覺，連賭場都唔去。

係澳門坐飛機既好處就係唔洗咁早去機場，我地坐7:35飛機，6:15先出門口，6:30已經到機場，check-in完都未到6:45。

年初一晨早嘅機場都有好多人，係我地之前有兩班機起飛，一班機去長沙，另一班去胡志明市。見有咁多人以為我地果架機都好多人坐，點知去長沙同胡志明市果兩班機走左之後，成個機場只剩返幾丁友。

總於上機，睇下. . .架機只有20幾個乘客，每人霸一排訓覺都仲得。

由澳門去台北唔洗兩小時機程，因為當時冇其他機降落，冇其他旅客爭，所以話咁快就入左境，可以即時去坐機場巴士入市區。因為要係台北車站坐的士去丹迪旅店，所以今次都係選擇坐國光巴士。雖然由桃園機場去台北車站嘅機場巴士會駛經丹迪旅店中山店附近，不過因為唔係咁熟路，為免麻煩所以都係選擇去到台北車站總站落車。

係買巴士飛嘅時候個賣飛阿嬸話買來回票一張可以平NT$10，由原價NT$125減至NT$115，來回就平左NT$20，雖然唔多，但係橫掂回程都係打算坐國光，所以就聽佢講買來回票。回程票上面係冇乘車日期同時間既，幾時坐都可以架。

國光巴士係台北車站落車嘅地方就係的士站，好方便，坐去丹迪旅店中山店幾分鐘就到，車費都只係NT$95。到達旅店時只係10:30左右，離3:00pm check-in時間仲有好耐，所以先放低行李，等夠鐘再返去check-in。係網上訂房嘅時候系統會send份confirmation去你email，出發前最好print份email出黎帶去，不過就算冇都唔緊要，因為佢有你個名，斷估都唔會有兩個同名同姓嘅人係同一日去同一間酒店掛。

下面先黎介紹間旅店，因為我地分別住兩晚，而且兩晚房間類型唔同，所以係呢度一次過介紹晒，方便查閱。

先睇下旅店外型，呢張係從街口影過去嘅旅店外貌，間旅店連埋地下果層其實只有四層，不過係旅店入面你會發現有五樓同埋六樓 係唔係好珍奇呢 其實係因為台灣人都一樣咁迷信囉，佢係冇四樓架，第四層變左五樓，而六樓其實只係天台，上唔到去架。

地下果層叫一樓，係大堂同埋飯廳，客房只有二、三、五樓三層，所以客房數量有限。先黎show下大堂，地方都好細架，不過設計簡約。

大堂行入去係電梯隔離就係飯餐，房價已經包埋早餐，就係呢度食，自助餐形式，款式唔多，不過味道都OK。

飯餐出面有部Apple，可以上網，如果需要打印可以問reception攞A4張，不過每日每間房只供應4張。

如果唔需要搬行李，其實返上房行樓梯都唔錯架，佢每層嘅裝修同裝飾都有D唔同，幾特別。

> 查看酒店資料、房價及住客評價

酒店資料：

地址：台北市中山區天津街70號

電話：886-2-2541-5788

網址：http://www.dandyhotel.com.tw/DandyT/index.aspx

交通位置：捷運中山站3號出口步行約6分鐘

房間總數：30間

房間面積：16.5~33平方米

平日房價：NT$2,100~2,700/一間房

提供此酒店訂房的主要訂房網站：酒店官方訂房系統 | Agoda | HotelClub | 樂天旅行 | 樂天旅行英文網站

>> 建議先使用HotelsCombined比較不同訂房網站的價格

>> 查閱酒店在TripAdvisor的住客評價

因為每個post只可以放20張圖，房間介紹就留係下個post啦。

待續. . . . . .