《2010年新春台北之旅》- 第二天(1) – 前往烏來

[ 2010年2月15日 (星期一，年初二)；天陰有雨；氣溫：around 13度]

今日會由台北去烏來，因為唔洗趕時間，所以打算11點先chech-out。丹迪旅店嘅房租係包埋早餐架，所以起身之後先落地下飯廳食早餐。早餐係自助餐形式，不過食物只有幾款，味道過得去咁啦。

因為第三晚會再返丹迪旅店住多晚，所以我地將大件行李寄存係旅店，只帶少少嘢入去烏來。

出發之前係澳門上網搵過資料，好多人話由台北去烏來最慳時間嘅方法係先坐捷運到新店站，然後由新店站坐公車到烏來。由於係假期關係，我地估計會有好多人去烏來，如果係新店上公車一定唔會有位坐，所以決定直接係台北車站附近嘅公車總站坐公車。

公車站就係公園路中央健康保險局嘅馬路邊，由台北車站捷運站八號出口行出路面（下圖1），然後向住同車站大樓相反嘅方向直行就係，距離大約只有250米。首先會經過台北市政府警察局中正第一分局（下圖2~3），警察局斜對面馬路有一個巴士站（下圖4），綠色牌果個門口就係中央健康保險局其中一個門口，呢個站係公車由總站開出之後嘅第一個站，可以係度上車，不過總站只係前少少，所以最好行去總站上車。係警察局過馬路繼續向前直行，就會見到中央健康保險局另一個門口（下圖5），係呢度向前行10幾米就係公車總站啦，車站前面有間M記。

我地11點3到公車站，當時除左我地只有另外3個人上車。坐公車可以用悠遊卡，上車時拍一次卡，到落車時要再拍一次扣錢。

(更新: 由台北車站去烏來的公車NUMBER已經由1601號改左做849號，只係改左個NUMBER，其他野冇變。)

因為係年初二假期嘅關係，所以台北市區路上唔係好多車，架公車除左停站同埋紅燈訂車之外，都行得好順暢，由台北車站去到新站捷運站用左45分鐘時間，如果坐捷運，由台北車站到新店站大約25分鐘，快一半左右。

雖然係總站只得5個人上車，不過一路上都不斷有人上車，到達新店站之前已經冇晒座位，而且亦已經企左好多人。公車停靠新店站嘅時候，已經見到好多人排緊隊等上車，好彩我地選擇係總站上車，唔係都幾慘。由新店站到烏來嘅車程大約35分鐘，不過全程山路，又上又落，企足全程腳都軟。

公車係烏來嘅總站係烏來老街附近，如果入住烏來璞石麗緻或者春秋烏來(現稱：馥蘭朵烏來渡假酒店)，可以係總站之前個車站落車，呢兩間酒店就係公路旁邊。如果坐公車返台北，就要去返總站等車，因為係路邊車站上車係旺季應該好難有位坐。

可能係因為落雨關係，烏來山腰上漂浮住好多雲霧，空氣好清新，一落車即係吸多幾嗒。而且又見到又清又綠嘅河水，不過第二日走嘅時候發現河水由墨綠色變左做泥黃色。

待續. . . . . .