《2010年新春台北之旅》- 第二天(2) – 烏來老街

從烏來公車總站向前行大約150米就係烏來老街入口，街口有一間全家便利店。

由全家便利店轉入去，過左呢條橋就係烏來老街啦。

烏來老街大約只有100米左右，街道兩邊集中左好多食店、小食檔、手信店同埋平價溫泉旅館。

係烏來老街入口附近，有一間烏來泰雅博物館，就係烏來婆婆美食店隔離。裡面展出泰雅族原住民嘅生活，展品雖然唔一定會吸引到你，但係佢入面有一樣好重要嘅嘢，你可能會有需要. . . . .就係洗手間。烏來老街一帶嘅公廁並唔係好多，我見過係覽勝橋近老街嘅橋口有一間，另外係台車站內亦有一間，不過衛生只係一般，女士可能會唔慣。而係烏來泰雅博物館裡面亦有廁所供遊客使用，但衛生情況就好好多，好乾淨。博物館係免費入場架，大家可以好好利用，女廁係地下，男廁就係二樓。

烏來其中一樣出名嘅小食係山豬肉香腸，係老街靠近覽勝橋一邊有幾檔賣燒香腸嘅小食檔，不過多數冇乜人幫襯，但係唯獨以下呢檔就排晒長龍。

佢嘅山豬肉香腸真係超超好味，尤其是係層皮燒到好香，就連我一向唔中意食香腸嘅人都覺得佢好好食，我地仲前後買左三次黎食。

烏來老街嘅盡頭係覽勝橋，過左橋沿樓梯行上去就係台車車站，可以係呢度坐台車上去勇士廣場睇烏來瀑布。

台車單程車費NT$50，去勇士廣場除左坐台車之外亦可以行路上去，不過路程都唔短，所以最好都係坐台車，唔洗咁辛苦之餘仲可以試下呢種咁特別嘅交通工具。台車車速雖然只得40公里，不過因為架車冇門，所以都幾刺激架。

待續. . . . . .