----------

----------

《2010年新春台北之旅》- 訂房篇

最近幾年每年農曆新年嘅指定節目都係去新開嘅賭場、酒店觀光,已經開始有D。所以今年趁住有連續5日假期,決定出去走一走。

 

本來經過上次聖誕節首爾之旅之後,已經打算唔再係大時大節嘅日子出遊,但係到有長假期時又再心思思,所以最終都係決定照去。雖然機票酒店樣樣都比平時貴幾成,但係旅行社照樣人山人海,年三十同初一去日本已經冇晒機位,去台灣都只得年初一有機位,而且仲要23百幾蚊。本來打算唔去架啦,但係又有D心有不甘,所以試下去嘉盛問下,一問之下原來air macau係年初一朝早有班加班機,來回機票連稅同埋燃油附加費都只係MOP1,870,於是即係拍板買左機票先

 

ps: 相信去開台灣旅行嘅澳門人好多都知道嘉盛呢間旅行社,佢專做大陸同埋台灣機票,亦有賣package,雖然係“up up dup dup”,但係佢嘅價錢就算唔係澳門最平,都應該第二平架啦,所以去台灣好多人都幫襯佢,另外佢亦有台幣換,而且兌換率比任何一間兌換店都高。

* * * * * * * * * *

 

由於唔係第一次去台灣,而且今次嘅目的亦只係打算主要去台北輕輕鬆鬆玩幾日,所以買機票時心入面仲未有任何行程嘅planning。買左機票返屋企上網搵左D資料,發現原來台灣2月中已經有櫻花,而日月潭係其中一處較多櫻花嘅地方,所以本來打算去日月潭,可惜搵唔到酒店,唯有取消。不過都好彩,因為之後係台灣睇新聞,原來新年假期好多台灣人都湧去日月潭,攪到大塞車,好彩我地冇去到,唔係就慘

 

去過兩次台灣都未試過佢嘅溫泉,所以今次都好想試下浸溫泉,既然去唔成日月潭,咁就係台北附近搵一個有溫泉嘅地方去啦。北投、陽明山、烏來以及宜蘭嘅礁溪都係台北附近比較著名嘅溫泉鄉,但係既然2月中台灣有櫻花,所以亦想搵一處既有溫泉,又有櫻花嘅地方,而符合呢兩個條件嘅地方就只得烏來。所以最終決定係台北住兩晚,烏來住一晚溫泉旅館,決定左之後即時上網搵酒店。

 

之前兩次去台灣都係買package,由旅行社訂房,今次係第一次自己上網訂。台灣好多酒店都有自己網頁,而且好多都有提供網上訂房服務。透過網上訂房一般都會即時係你信用卡度扣錢,唔似得日本果D可以等到入住果陣先俾cash,不過自己係網上訂房嘅價錢一定會平過通過旅行社訂。

 

如果自己已經有心水酒店,可以直接上佢網頁訂房,亦可以上呢個香港嘅台灣酒店網,睇下有邊間酒店啱心水,再入酒店網頁訂房,同時亦可以比較到上網訂與透過agent訂嘅價錢差別。(更新:建議先到HotelsCombine.com或者Wego.com查下最低房價)

 

另外,台灣有幾個大嘅旅遊網站都有提供網上訂房服務,操作同係酒店網頁訂房差唔多(應該都係同一套系統)。呢D網站除左提供訂房服務之外,亦提供好豐富嘅台灣旅遊資料,不過因為冇咁好心機去睇咁多資料,所以呢D網站我都冇詳細研究過

台灣觀光資訊網(官方網站)

大台灣旅遊網(TTNews)

旅遊資訊王

* * * * * * * * * *

 

雖然只係一月中,離開新年仲有成個月時間,但係熱門嘅酒店都已經full晒。首選嘅烏來璞石麗緻同次選嘅春秋烏來(現稱:馥蘭朵烏來渡假酒店)係農曆年後嘅成個星期都冇房,最後選擇左三好米溫泉會館。咁好彩年初二果日仲剩返有一間客房,叫和風雙人套房,房入面有私人溫泉架,雖然房租要NT$7,200,不過旺季都冇辦法,即時confirm訂房。(p.s. 房間介紹留係第二日行程再寫)

 

三好米溫泉旅館(3)

 

攪掂烏來住宿下一步就係搵台北市內嘅酒店。去台灣好中意住佢嘅精品旅館,貪佢夠靚又好有時代氣息,房租又唔貴。其實如果唔需要用到酒店嘅其他設施,住精品旅館真係好過住正式酒店。

 

有一間叫丹迪旅店嘅精品旅館係網上好多人讚,上年去台北嘅時候本來都想住,可惜冇機會,所以今次first choice就係佢丹迪旅店係台北有兩間,一間叫丹迪旅店天津店,位於捷運中山站附近天津街近南京東路一段嘅街口,另一間係丹迪旅店大安森林公園店,位於大安森林公園附近。我地住嘅係天津店,因為交通會方便一D。由旅店行去捷運中山站好近,出左街口沿南京東路一段向新光三越方向行,大約300左右,中間只需過一條馬路(中山北路一段)。

 

唔知係唔係真係咁好彩,上到丹迪旅店嘅網頁一睇,竟然係初一同初 三兩 晚各有一間房剩,啱晒我地schedule,中間果日可以係佢度寄存行李,輕裝去鳥來。(p.s. 房間介紹留待第一天行程再寫)

丹迪旅店(3)

 

 

唔知係因為我跳左一日連續訂兩晚房,定係佢嘅服務真係咁好,當我係丹迪旅店網頁訂完房之後冇耐,佢就打長途電話過黎同我confirm,而且係入住果日又再打多次黎問我地幾點到旅店。其實我一訂房就已經係信用卡扣左錢,就算我唔到都冇得退款架啦。所以我覺得佢嘅服務真係唔錯,入住之後亦覺得佢地好helpful好有禮貌

 

 

我將這次台北之旅的訂房經驗,總結在預訂台灣酒店經驗分享這篇文章內。另外,也按區域提供台北各區的酒店推介:西門町附近 / 台北車站附近 / 中山區 / 忠孝東路沿線 / 捷運文湖線復興路沿線

* * * * * * * * * *

 

另一樣需要出發前準備好嘅係申請入台證,因為之前已經去過兩次台灣,所以申請入台證手續好簡單,一係等到係台灣機場入境時即時申請,一係就係透過網上申請。透過網上申請只須填寫簡單個人資料,等電腦核實後就可以到澳門台北經濟文化中心取證。入台證費用今年加左價,舊年去仲係收緊HK$50,而家已經加到$75

準備完成,等待出發

Related Posts Plugin for WordPress, Blogger...
《2010年新春台北之旅》- 第一天(1) - 丹迪旅店天津店(大堂篇)

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁