2011年沖繩快閃觀禮之旅(Day 2[上篇] – 那霸波上宮、泊いゆまち魚市場)

係萬士得租車店取車之後，我地就將兩部車駛返酒店門口停低，上埋行李同乘客之後就開始三日兩夜嘅沖繩自駕之旅喇。

那霸除左國際通之外，仲有幾個景點值得遊覽，所以今日上午我地會先去呢幾個景點，包括波上宮、泊いゆまち魚市場(泊Iyumachi魚市場)同埋世界遺產首里城。上面張圖就係我地今日上午行程嘅路線，詳細D可以睇下面呢個Google Map。

在較大的地圖上查看2011年沖繩自駕之旅行車路線和景點位置

好啦，第一站我地先去波上宮。波上宮係一個位於那霸北邊海傍嘅神社，距離國際通只有大約1.5公里，由酒店開車過去只需要5分鐘就到，如果行路應該15分鐘都可以到達。

波上宮只係一個好細嘅神社，神社前面有個細細地嘅室內停車場，可以泊到幾部車，我地去果陣冇咩人，所以兩架車求其泊都可以。

自駕遊參考：

波上宮Tel.: 098-868-3697 | 波上宮Mapcode: 33 155 863

由呢度上去就係波上宮，私家車可以駛上去架

呢個先係神社門口，左手邊係停車場仔。

神社內淨手嘅地方，參拜前洗乾淨隻手先。

神社主殿，準備定5円大餅喇

都有好多人黎許願喎

每間神社都總有一個賣神符嘅地方，今次買左兩個交通安全平安符掛係兩架車度，點知還車果陣唔記得攞走

波上宮隔離仲有一間護國寺，不過冇時間，所以唔入去囉。

波上宮出面街道

離開波上宮下一站係去那霸泊いゆまち魚市場(泊Iyumachi魚市場)，魚市場係市區北邊嘅那霸港海邊嘅漁船碼頭隔離，由波上宮開車過去大約12分鐘左右，如果行路都幾遠，起碼要行半粒鐘。

那霸港景色

那霸港內嘅漁船碼頭

漁船碼頭旁邊係一個魚獲拍賣市場，不過去到果陣太晏已經拍賣完啦。

呢度就係泊いゆまち魚市場嘅正門，出面有好多車位免費任泊，如果full左可以泊去後面。

自駕遊參考：

泊いゆまち魚市場Tel.: 098-868-1096 | 泊いゆまち魚市場Mapcode: 33 216 117

同第一牧志公設市場相比，泊いゆまち魚市場大好多，而且呢度賣嘅魚生好新鮮，價錢亦都平好多。不過我地去果陣有一半檔販冇開，唔知係太晏已經收檔定係太早未開檔

呢度賣嘅刺身正好多，睇到流晒口水

雖然食左早餐冇幾耐，但係一場黎到D刺身又咁吸引，點都有食返夠本。魚市場入面有枱椅可以買左之後坐係度食，筷子、wasabi同豉油碟可以問檔販攞，支豉油就要另買，不過都只係200円。

係泊いゆまち魚市場刷完餐刺身之後，又係去下一個景點嘅時間喇，呢個景點就係沖繩必到嘅景點：世界遺產 – 首里城。

To be continued…