2012年雙颱風夾擊下的台灣之旅(計劃與訂房篇)

今次已經係第六次去台灣旅行，所以打算到台北以外嘅地方，原本嘅計畫係到台灣中部山區嘅清境同日月潭，感受一下台灣嘅湖光山色，仲打算黎個三日兩夜嘅台灣中部自駕遊。點不知，買好機票之後，台灣就接連發生地震、洪水等天災，而且係出發前一個星期，仲傳黎颱風壓境嘅惡耗，天啊！

被迫改行程

機票已經買好，想改期都唔得啦，不過又唔可以唔理颱風嘅威脅，最後唯有臨時變陣。首先當然係cut左自駕果part啦，因為颱風之下必有暴雨，而且又傳聞呢個係十年難得一見嘅超級颱風，咁嘅天氣之下係人生路不熟，仲要係左軚車嘅環境下開車，真係搵命黎搏。其次就係連清境嘅行程都要被迫取消埋，因為清境位處高山，每逢暴雨必會出現山泥傾瀉，分分鐘上得去落唔返黎。

雖然係清境嘅民宿已經一早係Agoda訂好左，又已經俾埋錢，不過好在酒店嘅policy規定入住前嘅兩日之前取消唔會有罰款，仲可以黎得切取消，最後只係蝕左少少匯率差價，都總算執返身彩。

本來仲想取消埋日月潭嘅行程，不過日月潭間酒店(Spa Home)黎唔切取消，因為policy規定要係7日前取消先可以免罰款，過左期限取消要收一晚住宿費用作為罰金，唉，我地都只係book左一晚房，咁嘅規定即係去唔去住都冇左呢晚錢啦。心諗冇理由咁蝕抵，照去。

所以最後只係cancel左去清境嘅行程，同埋唔自駕，改坐公車去日月潭。今次台灣之旅嘅最終行程變為：

第一日：由澳門飛台灣桃園機場，坐公車到桃園站轉乘高鐵去台中，入住台中碧根行館，重點遊覽台中逢甲夜市。

第二日：坐公車前往日月潭，入住日月潭Spa Home，遊覽日月潭各景點。

第三日：坐公車返回台中轉乘高鐵去台北，入住台北inHouse Hotel。

第四、五日：係台北hea，入住台北Airline Inn。

第六日：返澳門

以下Google地圖mark左今次旅程嘅住宿酒店同主要景點位置：

在較大的地圖上查看2012年雙颱風夾擊下的台灣之旅：酒店和主要景點位置

台灣訂房新經驗

今次台灣之旅訂房嘅時候，再次考察左通過唔同渠道訂房嘅價錢，發現根據以前經驗得出訂台灣酒店係酒店官方訂房系統比較平嘅經驗，而家已經唔再正確。今次嘅比較結果發現，係Agoda同Hotels.com呢D訂房網站嘅價錢，反而比酒店官方訂房系統更平，而且又有積分回贈，計落仲著數，而且訂房手續比係官網訂更加簡單方便。

另外，今次因為要訂清境同日月潭嘅民宿，本來以為呢類住宿一定要向民宿訂，又要打長途電話過去又要匯錢，想起都麻煩，不過原來係Agoda都可以訂到唔少台灣民宿，超方便。所以今次旅程嘅五間酒店，包括之後cancel左果間清境民宿，有四間係Agoda訂，另一間就係Hotels.com訂。係邊度訂平D？咁就一定要用HotelsCombined.com比較過先知啦。

唔識點係呢D訂房網站訂房？冇問題，睇下以下訂房教學照住做就得啦，好Easy。

• Agoda訂房教學
• Hotels.com訂房教學

今次旅程入住嘅四間酒店我都各自寫左住宿評價同介紹，有需要可以參考下。

• 住@台北西門町頭等艙飯店(Airline Inn)
• 住@台北西門町薆悅酒店(inHouse Hotel)
• 住@台中碧根行館(Beacon Hotel)
• 住@日月潭Spa Home

以下係今次旅程嘅遊記目錄：

1. 2012年雙颱風夾擊下的台灣之旅(Day 1[上篇] – 乘高鐵往台中)
2. 2012年雙颱風夾擊下的台灣之旅(Day 1[下篇] – 台中一中街商圈、台中火車站、干城車站、逢甲夜市)
3. 2012年雙颱風夾擊下的台灣之旅(Day 2[上篇] – 從台中到日月潭)
4. 2012年雙颱風夾擊下的台灣之旅(Day 2[下篇] – 日月潭)
5. 2012年雙颱風夾擊下的台灣之旅(Day 3 – 返回台北)
6. 2012年雙颱風夾擊下的台灣之旅(Day 4 – 台北故宮博物館、華西街夜市)
7. 2012年雙颱風夾擊下的台灣之旅(Day 5 – 台北成人博覽會、老乾杯)
8. 2012年雙颱風夾擊下的台灣之旅(Day 6 – 旅程完結)