補充資料:澳門到珠海長隆海洋王國交通指南

今次去珠海長隆海洋王國由於係坐中旅套票包埋嘅旅遊巴,所以係《珠海橫琴長隆海洋王國試業試玩體驗》中冇詳細介紹坐公共交通工具去長隆海洋王國嘅資料,不過因為有網友問到,所以係呢度補充整理一下交通嘅問題,等大家可以參考。

澳門到珠海長隆海洋王國交通指南

 

從澳門坐公共交通工具去珠海長隆海洋王國(包括長隆橫琴灣酒店以及珠海長隆馬戲城),基本上可以有以下兩種走法:

 

方法1:經關閘、拱北口岸到橫琴長隆

 

第一種走法係由關閘過關到拱北,係拱北口岸廣場地下負二層嘅拱北口岸站坐K10路公交車到長隆總站落車,車程大約40分鐘。坐車時要留意從拱北到橫琴長隆方向嘅公交車要係行落負一層之後,過對面車站上車,車會由海邊方向駛過來,唔好坐錯方向,唔清楚可以睇下車站路線牌。

珠海K10路公車

 

前往路線:

(1) 在澳門市區坐巴士到關閘總站落車,經澳門關閘口岸出境、珠海拱北口岸入境;

(2) 在拱北口岸廣場負二層嘅拱北口岸站坐10K路公交車到長隆總站落車。

 

呢個走法唔洗去到路氹蓮花口岸咁麻煩,比較簡單方便,而且拱北口岸一帶嘅環境對大多數人黎講亦較為熟悉,但缺點係只得K10一條路線可以坐,等車時間可能比較耐。

 

更新:根據官網資料,現在在拱北口岸已經有專線巴士直達橫琴長隆,乘車地點在拱北地下商場負一層的歧關巴士總站,大約半小時有一班車。另外,在九州港、城際輕軌珠海站、珠海機場、香港汽車總站等地點亦有專線巴士直達橫琴長隆。

 

另外,如果你係從氹仔出發,經蓮花口岸去會比經拱北慳時間。如果係從香港坐船到澳門外港碼頭再到橫琴長隆,亦可以行呢條路線,比經路氹蓮花口岸去少D轉車次數。從澳門外港碼頭可以坐以下巴士路線到關閘總站,然後過海關出到珠海拱北。

 

要留意AP1, 3A同10B去程同回程都經過外港碼頭,上車前要睇清楚車頭寫明係去關閘先好上車。而3號巴士雖然都係去關閘,但係由於路線係行新馬路再經提督馬路去關閘,所以路程會長好多,不過外港碼頭係3號車總站,所以唔怕上車冇位坐。

 

回程時如果要從關閘返外港碼頭坐船,除左可以坐以上四條路線嘅巴士之外,仲可以坐10同埋10X,同樣3號路程會較遠,其餘5條線路程較短。

 

到達長隆公交車總站之後,可以參考《珠海橫琴長隆海洋王國試業試玩體驗 – 上篇》嘅介紹前往長隆海洋王國入口。

 

 

方法2:經路氹蓮花口岸、橫琴口岸到橫琴長隆

 

橫琴就係澳門嘅氹仔同路環對岸,從澳門路氹蓮花口岸過去對岸嘅珠海橫琴口岸之後,只需要坐10-15分鐘車就可以去到橫琴長隆,比起從拱北去路程短好多,時間上應該都可以慳一D。不過經蓮花口岸同橫琴口岸去長隆需要嘅轉車次數比較多,過程稍為麻煩。

 

前往路線:

(1) 在澳門市區坐巴士到路氹邊檢大樓站落車,經澳門蓮花口岸出境;

(2) 坐接駁巴士過蓮花大橋到對岸的珠海橫琴口岸入境;

(3) 在橫琴口岸廣場坐的士或者K10, K11, 14或86路公交車到長隆總站落車。

 

(1) 前往澳門路氹蓮花口岸

 

以下是從澳門市區前往路氹蓮花口岸路氹邊檢大樓站的巴士路線:

  • 21A – 從媽閣開出,途經新馬路、亞馬喇前地(即葡京對開的轉乘站)、氹仔孫逸仙馬路、新濠天地
  • 25 – 從關閘總站開出,途經水坑尾、亞馬喇前地、氹仔孫逸仙馬路、澳門運動場、望得聖母灣馬路、新濠天地
  • 26 – 從筷子基開出,途經提督馬路、媽閣、旅遊塔、賽馬會、北安客運碼頭、澳門機場、新濠天地
  • 26A – 從筷子基開出,途經提督馬路、新馬路、亞馬喇前地、氹仔孫逸仙馬路、澳門運動場、望得聖母灣馬路、新濠天地
  • 50 – 從亞馬喇前地開出,途經氹仔孫逸仙馬路、澳門東亞運體育館
  • MT4 – 從下環凱泉灣開出,途經媽閣、旅遊塔、賽馬會、澳門運動場、望得聖母灣馬路、澳門威尼斯西門
  • 15 – 從氹仔海洋花園開出,途經賽馬會、花城、新濠天地

 

從香港坐船到北安客運碼頭再到橫琴長隆嘅朋友,可以係碼頭坐26號巴士直接到路氹邊檢大樓站落車。但如果想從澳門外港碼頭到路氹邊檢大樓站,就冇巴士直接去到,需要先坐3A, 10A, 10B, 10X, 28A, 28BX或者32號巴士到亞馬喇前地,再轉21A, 25, 26A或者50到路氹邊檢大樓站落車。另外,威尼斯人、銀河、新濠天地、金沙城中心亦有免費巴士前往路氹邊檢大樓。

 

更新:根據官網資料,現在已經有專線巴士從澳門直達橫琴長隆,巴士會從葡京酒店附近的富濠酒店開出,然後到氹仔北安碼頭上客,再經蓮花口岸和橫琴口岸到長隆,大約半小時至兩小時有一班車,不同時段不同。

 

 

(2) 蓮花大橋接駁巴士

 

澳門路氹蓮花口岸同珠海橫琴口岸之間被一條水道相隔,兩岸由一條蓮花大橋相連,大橋要坐車先可以通過,係過左澳門海關之後,會有收費嘅過橋接駁巴士,每位收費三蚊,車費俾澳門幣、港幣或者人民幣都可以,但不設找贖。

珠海橫琴長隆海洋王國_中旅專車_04珠海橫琴長隆海洋王國_中旅專車_05

珠海橫琴長隆海洋王國_中旅專車_06珠海橫琴長隆海洋王國_中旅專車_07

 

 

(3) 從橫琴口岸坐的士或公交車到長隆

 

過左珠海海關之後就係橫琴口岸廣場,由呢度去橫琴長隆只係需要10至15分鐘車程,路程唔遠坐的士都唔會太貴,口岸前亦有唔少的士等客。

IMG_9921

 

如果想平D坐公交車,亦可以到橫琴口岸廣場站等車,但要留意橫琴口岸廣場站距離橫琴口岸差唔多有500幾米遠,要行5-7分鐘先到,而且去長隆嘅車站係馬路對面,過馬路時要小心一D。

 

從珠海市區開出,經過橫琴口岸廣場站去長隆嘅公交車有K10, K11, 14同86四條線。

珠海K10路公車

珠海K11路公車

珠海14路公車

珠海86路公車

橫琴口岸到長隆海洋王國

 

到達長隆公交車總站之後,可以參考《珠海橫琴長隆海洋王國試業試玩體驗 – 上篇》嘅介紹前往長隆海洋王國入口。

 

 

(4) 從香港到橫琴長隆的方法

 

更新:由於橫琴長隆現在增設了多條專線直達巴士,所以從香港去橫琴長隆比以前方便了,以下介紹從香港去橫琴長隆的比較方便的三種方法,專線巴士的班次和票價可參考官網資料

 

方法1 – 從尖沙咀中港碼頭或上環港澳碼頭坐船到珠海九州港,再轉坐專線巴士到橫琴長隆。

方法2 – 從上環港澳碼頭坐船到澳門氹仔碼頭,再轉坐專線巴士到橫琴長隆。

方法3 – 在香港市區乘坐永東旅行社或中港通旅行社巴士經深圳直達橫琴長隆。

 


在較大的地圖上查看珠海橫琴長隆國際海洋度假區位置

 

 

繼續閱讀 >>

fb share

如果喜歡這篇文章,請點個「讚」吧!

fb share

21 comments

  • 匿名訪客

    長龍海洋王國到富豪酒店怎麼搭公車最近

    • Dilbert MO

      中旅社有巴士, 如果坐不到中旅社的巴士, 可以坐任何公車到橫琴口岸, 過海關到澳門蓮花口岸後坐25號巴士到”十月一日前地”站下車.

  • Joe

    親友已訂酒店…購票從香港出發 香港→氹仔北安12:30pm→長隆
    我們在澳門出發 欲搭同一班車 應在何處購車票。。在澳門可有銷售点、預售車票?
    謝謝..08-07-2015

    • Dilbert MO

      我不太確定澳門開往長隆的巴士是不是由澳門中旅社經營, 你可以打去澳門中旅問一下, 如果是他們經營可能可以預先購票, 如果不是就只可以在上車點購車票.

  • Terry Ng

    您好, 請問如果係香港坐船到氹仔碼頭落船, 之後要點去到珠海長隆呀? 我地諗住搭的士, 由澳門氹仔碼頭落船開始要多少時間到珠海長隆呀?

    另外如果由香港去珠海九州港, 再到珠海長隆, 時間係咪比較長呀?

    thank you very much

    • Dilbert MO

      係氹仔等客的的士數量不多, 要坐的士可以比較難等車. 但如果上到的士, 從氹仔碼頭去蓮花口岸只需要5分鐘車程, 車費也不算貴.
      如果坐不到的士, 可以坐26號巴士到蓮花口岸落車, 不過班次不算太密. 另一個比較轉接的方法是先坐賭場巴士去金沙城中心, 再轉坐去蓮花口岸的賭場巴士.

      去到蓮花口岸之後, 先過澳門海關, 出左關之後要坐接駁巴士過對岸的橫琴口岸, 過完關就係橫琴, 係橫琴可以坐的士去長隆, 車程大約15分鐘.

      如果從九州港去, 路程會遠D, 不過過關次數同轉車次數就少好多.

      另外, 而家係長隆已經有幾條專線巴士由不同地點入長隆, 氹仔頭頭、九州港都有專線車直達長隆, 亦可以直接由香港市區坐專線車經深圳到長隆.詳細可以參考官網內以下網頁:
      http://zh.chimelong.com/Plan/traffic.shtml

  • Dilbert MO

    如果你想直接從香港去珠海長隆, 可以在香港港澳碼頭或者中港城坐船到珠海九州港, 再坐的士去長隆, 不過航班不多, 所以最好還是取道澳門, 坐船到澳門再到拱北或者到橫琴口岸轉坐的士去長隆.
    我沒有住過珠海的酒店, 所以這方面沒有意見可以提供給你啦.

  • Anonymous

    你好, 我們是香港出發的, 想入珠海,玩完長隆一天,在珠海住,第二朝過澳門,在澳門回港.請問可以提供路線嗎?還是有更好的建議.
    住珠海的話,能夠建議比較企理的酒店. THANKS

  • Dilbert MO

    路環市區果個碼頭並唔係澳門正式出入境口岸, 可能用黎做特別出入境用途. 蠔園我都冇去過, 唔知貴唔貴啊.

  • Anonymous

    我喺路環見過有人排隊過關,有個海關,隔離有個碼頭喺海關隔離有條路行入去飲手打咖啡
    橫琴蠔生態園晚餐貴嗎?謝

  • Dilbert MO

    橫琴碼頭就係長隆同橫琴口岸中間, 有巴士停, 不過橫琴同路環碼頭之間冇船通行架喎, 呢個唔係海關口岸.

  • Anonymous

    請問近唔近橫琴生態蠔園?好似喺橫琴碼頭斜對面,碼頭又近唔近蓮花口岸?上網搵唔到資料,我會帶個2歲小朋友去,想搵定資料。另外想問邊度有橫琴至路環碼頭既船期表?

  • Dilbert MO

    橫琴口岸廣場周圍仲係好冇咩商店, 冇餐廳食嘢架, 你一係去返珠海市區食, 一係返過澳門食.

  • Anonymous

    請問如果我唔喺長隆入面食晚飯,橫琴口岸廣場有餐廳嗎?

  • Dilbert MO

    視乎你想坐船還是坐車, 如果坐船去深圳, 需要去九洲港坐船, 從長隆去九洲港沒有直接公車到, 需要轉一次車, 詳細轉車安排可以參考這裡http://bit.ly/1ttWnn2

    如果是坐巴士從虎門大橋去深圳, 可以先坐K10巴士到拱北, 再在拱北車站坐巴士去深圳.
    http://www.i-busnet.com/china/busroute/zhuhai/zhuhai-shenzhen.php

  • Anonymous

    你好,請問如我第一日玩完,第二日想去深圳玩..可以在那坐車.謝謝

  • Dilbert MO

    多謝您提供的資料.^-^

  • Anonymous

    10X 係星期一至六7:30-9:00先有。

  • Dilbert MO

    你可以先係氹仔碼頭坐的士去蓮花口岸[需時大約10分鐘], 跟住過海關去到横琴(呢度要坐一程好短的接駁巴士過橋)[過關連坐接駁巴士時間加埋大約15分鐘], 係橫琴出關之後坐的士去長隆[需時大約10分鐘]. 時間加埋大約35分鐘, 預鬆D的話由氹仔碼頭落船開始到珠海長隆大將45分鐘左右.

    如果從九州港去珠海長隆, 路程遠D, 由於冇巴士直去, 要坐的士, 不過由於唔洗轉車同過關, 所以時間差唔多, 可能仲會快D添.

  • Anonymous

    您好, 請問如果係香港坐船到氹仔碼頭落船, 之後要點去到珠海長隆呀? 我地全部約有14-16人, 因有兩個老人, 我地諗住搭的士, 由澳門氹仔碼頭落船開始要多少時間到珠海長隆呀?

    另外如果由香港去珠海九州港, 再到珠海長隆, 時間係咪比較長呀?

    不好意思, 咁多問題…

    希望回答, 謝謝!

發佈留言

發佈留言必須填寫的電子郵件地址不會公開。 必填欄位標示為 *

收到您的留言後,小弟會盡快回覆。如果您在留言中提供的電郵地址正確,且已勾選同意接收電郵通知,當您的留言通過審核並有回覆時,系統會寄出電郵通知您。回答您留言所查詢的問題有時候需要一些時間研究,請耐心等待。另外,如果您還未讚好過本Blog Facebook專頁,可以請給我一個讃嗎?!就當作是我花時間和精神解答您問題的一點支持吧。謝謝!

fb share

如果喜歡這篇文章,請點個「讚」吧!

fb share