2014年環瀨戶內海自駕遊(Day 5)上篇 – 宮島一日遊(上)

到廣島最大嘅目的係想去遊覽日本三大景之一嘅宮島。宮島位於廣島西面，距離市中心大約只有20公里。從市中心有電車可以直接去到宮島對岸嘅宮島口渡輪碼頭，交通比自己開車仲方便，所以今日俾駕車休息一日，改坐電車。

雖然酒店附近嘅八丁堀一帶係廣島主要購物區，又有市內最長最熱鬧嘅有蓋步行街，不過食店數目就少D，尤其食早餐嘅地方唔多。

最後都係選擇食包

食完早餐行出大街嘅電車站坐車

電車係廣島市內嘅主要交通工具，路面行駛嘅車種有幾款，有D外型新式D，有D懷舊D。

車站有指示牌可以睇到下班車到達嘅時間，我地要坐嘅係紅色2號線。2號線嘅起點係JR廣島駅，終點站就係坐渡輪去宮島嘅宮島口，不過並唔係所有2號線嘅車都會去到宮島口，有D只係去到中間嘅西廣島站，所以上車前睇清楚車頭係唔係寫明去宮島口，不過其實上錯左只係去西廣島站嘅車都唔緊要，可以係西廣島站落車之後等返去宮島口嘅車再上返車就可以。參考>>廣島電車路線圖

廣島電車車廂，電車係市區嘅行車速度超慢，接近龜速，不過從西廣島站到宮島口站屬於郊區，行車速度就會回復返一般火車嘅速度。

電車一般會有兩個或者四個出入口，一半上車一半落車，落車出口會有乘務員站崗。如果你係用cash俾車費，冇散紙的話可以搵乘務員唱散佢。

廣島電車嘅俾錢方式好似有好多種，除左俾cash之外，仲可以用下面介紹嘅一日乘車券，另外本地人仲有幾款唔同嘅卡，甚至一D好似超市coupon嘅都有，所以落車出口旁邊嘅收銀機設計都好似幾複雜。

廣島電車嘅車費係市內劃一收費160円，但從西廣島站到宮島口站呢段宮島線就需要另外按段收費，如果從市內坐2號線直接到宮島口落車，車費係260円，但如果先坐到西廣島站，再由西廣島站坐另一架車到宮島口，就需要分別俾市內嘅160円車費，同埋西廣島站到宮島口嘅120円車費，加埋係280円，比直接從市內坐2號線直接到宮島口貴20円。參考>>廣島電車車費表

如果好似我地咁行程計劃係由市區去宮島再返市區，可以買以下呢張”一日乗車乗船券“，呢張一日券可以在當天之內任坐廣島電車同來往宮島口同宮島嘅渡輪，價錢係840円。如果單獨買飛，從廣島市區到宮島口嘅電車車費係260円，來回就要520円，而來往宮島口同宮島嘅渡輪船飛單程180円，來回就要360円，電車同渡輪加起黎要880円，所以買張一日乗車乗船券起碼可以平40円，如果你係市區仲會坐多幾程電車就更加抵。另外，如果你係宮島會坐纜車上彌山，買纜車飛果陣出示一日券可以平450円。

一日乗車乗船券可以係市內幾個銷售點買到，亦可以在自助售票機買，不過最簡單嘅方法係上車之後直接同乘務員購買。

用一日乗車券坐車嘅時候，上車果陣要將一日券插入綠色插卡口，而落車果陣就插入紅色插卡口，不過有時唔插張卡乘務員都唔會理。

有少數車站設有閘口，好似宮島口站，入閘嘅時候要插入張一日乘車券。

由於市區架車行得慢，所以由市中心去到宮島口用左差唔多9個字時間。廣島電車嘅宮島口站對面就係渡輪碼頭，行過斑馬線就係。

由於係世界遺產，宮島上對車輛嘅行駛有唔少限制，所以雖然有汽車渡輪可以直接開車上島，但係島上開車並唔方便，而且島上多山路，而主要景點都好集中，開車上島反而仲不便。所以好多人即使自駕，都會將架車泊係宮島口嘅渡輪碼頭周圍嘅停車場，再坐渡輪過去，呢度嘅停車場泊一次一般1,000円左右。

經營宮島口到宮島渡輪服務嘅公司有兩間，一間係宮島松大汽船，另一間係JR西日本宮島渡輪，如果用廣島電車嘅一日乗車乗船券只可以乘搭宮島松大汽船，唔知係唔係咁嘅原因，多數人都係坐松大汽船，JR宮島渡輪好少人搭。

JR西日本宮島渡輪嘅賣點係架船會駛得比較接近大鳥居，如果你想坐呢隻船，就唔好買廣島電車嘅一日乗車乗船券啦。

宮島口碼頭有幾個投幣式locker，如果有大件行李可以係呢度寄存。

渡輪每15分鐘有一班，我地搭10:50呢班。因為張一日券已經包括船票，所以係入口出示張一日券就可以上船。

架渡輪除左載人，仲可以載車，不過上島嘅車都係島民或者島上商店嘅車，好少外來車上去。

乘客座位係2樓同3樓，如果要睇景同影相，當然係坐3樓最好。

船程只有短短十分鐘，睇下風景影下相話咁快就到。

宮島碼頭嘅候船室，呢度有洗手間同觀光案內所。

宮島碼頭外面

碼頭旁邊嘅日本三景碑同埋世界遺產標記

原來係宮島上面都養左一批鹿，可以係街度自由活動。

呢隻鹿大哥真係大整蠱，訓左係人地舖頭大門口，攪到冇人敢入去。

宮島上嘅主要景點都集中係碼頭南面，出左宮島碼頭之後轉右直行就可以去到最重要嘅景點嚴島神社。

碼頭同神社之間嘅街道係表參道，即係商店街。

表參道上用左好多帆布遮太陽，所以行起黎唔怕曬，好舒服。

唔知點解飯勺係呢度嘅吉祥物，有大大小小好多做成飯勺形狀嘅手信。

表參道上仲其他得意公仔

表參道盡頭就係嚴島神社

過左呢個石鳥居就係嚴島神社嘅範圍

又見到鹿仔朋友

嚴島神社係宮島最重要嘅景點，而嚴島神社最有名嘅就係佢果個浸係水中嘅紅色大鳥居。係退潮嘅時候大鳥居所在嘅地面會露出水面，遊客可以行出去大鳥居下面，而係漲潮嘅時候，大鳥居就係被海水包圍，好似起左係海上咁。如果想睇唔同環境下大鳥居嘅風采，就要記得係出發之前上官方網站睇下當日潮漲同潮退嘅時間啦。參考>>宮島每日潮汐情報

今日退潮嘅時間係上午10:53，我地到達神社果陣已經係11點半，雖然遲左一個鐘不過都仲係干潮期。

係干潮期潮水退返落大海，所以可以行落去原本俾海水覆蓋的海灘。

可惜大烏居周圍已經俾水浸住，行唔到過去，不過都仲有人間水過去影相。

退潮嘅時候嚴島神社嘅底部都會露出水面

– Day 5 未完，待續 –

返回遊記主目錄 >> 2014年環瀨戶內海自駕遊 – 序章

↓ 在Google地圖上查看今日行車路線和景點 ↓

往年日本關西遊記：

• 2013年日本關西、北陸賞櫻自駕遊
• 2012年京阪之旅
• 2008年秋季京阪神紅葉＋白浜溫泉之旅
• 2007年大阪、京都五天自由行