2014年環瀨戶內海自駕遊(Day 6)上篇 – 廣島賞花行(上)：世羅町花夢之里芝櫻、せらふじ園紫藤

位於廣島縣東北部嘅世羅町有唔少種植花卉嘅觀光農場，雖然規模唔及北海道嘅富良野同美瑛，但都係一個賞花嘅好地方，我地今日嘅行程就係去呢度賞花。不過由於時間有限，我地只係選擇左去其中比較值得去嘅三個農場，之後會去埋隔離岡山縣嘅一個紫藤公園，然後係岡山縣嘅赤穗溫泉住一晚溫泉旅館。

酒店附近搵早餐食唔係咁易，所以今朝係附近間星巴克攪掂。

計劃行程嘅時候主要係世羅町觀光協會嘅官方網站搵資料，選擇左西日本最大嘅芝櫻公園花夢の里、主要種植紫藤嘅せらふじ園，同埋世羅町最大嘅觀光農場世羅高原農場，尋日係酒店見到嘅一本觀光指南都推薦呢幾個地方。

世羅町距離廣島市大約70公里，開車時間大約要一個半鐘。

第一站首先黎到花夢の里 [GPS設定：電話0847-39-1734]

農場出面有免費停車場

沿斜坡行上去就係入口

入場費會根據開花狀況而有所不同，滿開嘅時候(大約係4月底)入場費係800円。

呢度就係花夢之里入口啦，睇落好簡陋下。

因為已經過左芝櫻盛開期，呢日開花狀況只得4-5成，所以入場費只收600円。

同入場券上張相比較，呢日嘅開花狀況似乎冇4成咁多，地上好多空位，不過就下鏡頭有D地方影落都覺得好似成片粉紅色嘅。

離開花夢之里開兩三個字車程就到下一個景點せらふじ園，呢度泊車同樣係免費。[GPS設定：電話0847-22-0020]

せらふじ園入口

呢度嘅入場費要800円

せらふじ園主要係種紫藤，不過睇落去品種同前日係大三島藤公園睇嘅有D唔同，同埋呢D嘅面積大D。

除左紫藤せらふじ園仲有種植一種叫牡丹櫻嘅櫻花，呢種櫻花開花時間好似比較長，通常去到五月頭都仲有花睇，不過我地黎到呢日係5月9號，只係見到滿地花瓣同埋只得D葉嘅樹，完全唔覺佢係櫻花樹囉。

雖然係咁，樹上面仲有一D頑強嘅小花仲未散落。

行完兩個景點之後已經黎到中午要食晏嘅時候啦，係せらふじ園裡面有兩間食堂，一個係以下呢間食一般和式飯麵定食嘅食店。

另一間就係隔離呢間幾有田園風味食燒烤嘅食堂

搵個位坐底之後，就可以去呢度買你想食嘅食材返去燒。食材雖然只有日文，但睇D日文漢字基本都知係D乜，內類有牛、豬同雞，另外仲有野菜。

係呢度碗碟、筷子同飲用水都係自己動手出去攞嘅。

仲有最緊要攞呢張圍巾圍住上身，如果唔係燒野食果陣D汁會彈到成件衫都係架。

買好食材之後有工作人員會幫你開呢個爐

我地買左牛肉、雞肉同田園蔬菜，唔好睇個樣冇乜特別，食落真係超好味，肉同菜都好好食。

食完之後記得要自己執好D垃圾同埋分類放入去佢地應該去嘅收集箱啊

最後再係隔離食堂買左個軟雪糕做飯後甜品

– Day 6 未完，待續 –

返回遊記主目錄 >> 2014年環瀨戶內海自駕遊 – 序章

↓ 在Google地圖上查看今日行車路線和景點 ↓

往年日本關西遊記：

• 2013年日本關西、北陸賞櫻自駕遊
• 2012年京阪之旅
• 2008年秋季京阪神紅葉＋白浜溫泉之旅
• 2007年大阪、京都五天自由行