2015年韓國首爾+釜山賞櫻之旅(Day 3) – 釜山南浦洞BIFF廣場黑糖餅、富平巨人炸雞

第三日至第五日呢三日我哋會去釜山同鎮海睇櫻花，頭兩日喺首爾完全見唔到有櫻花，希望去到釜山真係有櫻花睇啦。

喺釜山返嚟首爾之後我哋會繼續住返Loisir Hotel Seoul Myeongdong，所以將其中一個行李喼寄存喺酒店，只帶一個去釜山。

今朝早餐又係食Isaac，不過買咗之後攞去火車站先食。

今日由首爾去釜山同埋三日後由釜山返首爾嘅KTX車票本嚟喺仁川機場個Travel Center換KR Pass果陣已經買好咗，不過回程車票買咗下午兩點半，後尾諗諗下不如晏D返，等第三日喺釜山有多D時間去多個景點，所以去到首爾站先去售票處cancel原來張回程車飛，重新買過下午四點半果班KTX。因為我哋用KR Pass，所以cancel同買過另一班車都唔需要再俾錢。

改完車飛仲有時間，係大堂坐低食埋個Isaac三文治先。

係時候上火車啦。火車嘅上車月台可以喺大型顯示屏見到。

坐KTX感覺好求其，因為冇任何閘口，亦冇人查車飛，自己行落去月台上車就得。

火車上面可以放大行李喼嘅行李架其實唔多，如果從首爾出發，最好早D上車以防冇位放行李，如果行李架真係Full晒，可以將行李喼塞入最後一排座位後面嘅空位，背囊之類就可以放喺座位上面嘅架度。

開車啦，下面係幾張沿途風景。

去到南部，路邊開始見到有櫻花啦。

KTX上面雖然話有免費WiFi，但係信號好弱，完全上唔到網，好彩自己有租WiFi蛋。

坐咗差唔多三個鐘終於去到釜山啦，落車同上車一樣又係冇閘口同查車飛，就咁落車行出去就係。

KTX釜山站同地鐵釜山站唔係相連，如果要坐地鐵要先行出火車站，再入去地鐵站。由於落緊雨，我哋出咗火車站見到的士就即上。我哋喺釜山住嘅酒店叫Hotel Aventree Busan，中文叫亞雲樹酒店，或者叫阿文樹酒店，就喺南浦洞離釜山站唔遠，坐的士都只係5,000幾won。呢間酒店真係很正，詳細介紹可以睇下呢篇《住@釜山Hotel Aventree Busan(亞雲樹酒店)》。

下面係酒店附近嘅地圖

酒店Check-in完先落街搵嘢食，酒店附近就係BIFF廣場，有好多小食檔，不過今日落雨有唔少攤檔都冇開。

呢度最出名係黑糖餅，真係好好味。

BIFF廣場對面馬路就係札嘎其市場，不過今日未去住。

今日下午嘅行程原本係Plan咗去海雲台，但係由於落大雨決定取消，留喺南浦洞行下街。南浦洞最主要嘅購物街就係呢條光復路，可惜今日落雨路上顯得好冷清。

附近嘅國際市場

喺光復路向東行到督就係樂天百貨，百貨公司同地鐵站入面條地下街相連，落雨絲濕最好入去呢D地方。

樂天百貨天台係個展望台，可以睇晒成個釜山港。

冇嘢做先食個甜品攝時間

地下街由南浦站通到去札嘎其站，由地下街行返酒店唔使淋雨。

返酒店休息下到夜晚雨勢好似轉細咗

出發去食晚餐啦，今餐去食富平市場嘅巨人炸雞。

下面張地圖係巨人炸雞嘅位置

喺光復路向西行，會去到富平洞豬腳街，呢度有好多食店架，而且開到好夜。喺右圖掛住welcome招牌嘅小巷入去。

一直行就會見到富平市場

穿過富平市場右手邊就會見到呢間唔起眼嘅舖頭，就係巨人炸雞啦。

餐牌只有韓文，不過呢度食嘅嘢只係獨姑一味，指住人哋枱上面果碟order就得啦，唯一唔同係人哋張張枱都係啤酒餸炸雞，我哋係汽水。碟炸雞16,000won，再加兩支汽水，Total 19,000won。

食唔晒可以打包，打包嘅膠掛咗係墻上，可以自己攞嚟用。除咗打包D炸雞之外，沿路仲喺便利店買D生果返酒店食。

Day 3 完，返回2015年韓國首爾+釜山賞櫻之旅目錄。

相關文章：

• 住@首爾明洞Loisir Hotel Seoul Myeongdong
• 住@首爾明洞天空花園酒店
• 住@首爾明洞王子酒店
• 住@釜山Hotel Aventree Busan(亞雲樹酒店)
• 首爾明洞酒店推介
• 韓國外國人專用火車通行證KR Pass
• 韓國MobilePOP Pocket WiFi Router使用分享
• 如何網上預約首爾昌德宮秘苑導賞團門票