2007年东京公干之旅(Day 2)- Part 1

今日嘅schedule系9点半开始开会,中午有个半钟lunch时间,下午又再开会,然后坐车去食dinner。由于逗留系东京嘅时间无多,所以想抓紧一D空档时间去多几个地方睇下,好为下次自己黎自由行探路。

 

所以今朝一早6点半(即系澳门时间5点半)就起身,然后由酒店附近个地铁水天宫站坐左一个站去三越前站,睇下日本桥同东京车站附近景点。由于时间尚早,街上未有太多人,不过都已经有学生坐地铁返学,而且有好多仲系5~6岁嘅小妹妹,单独或者两三个一齐坐地铁返学,本来想影下佢地个得意样架,不过怕俾人以为我想做咩,所以都系冇影佢地。

 

酒店门外
酒店外

 

酒店出面条大街,好干净

酒店外大街

 

地铁购票机

地铁购票机

 

买地铁飞嘅方法同大阪一样,系呢度讲一讲俾未买过嘅朋友知,已经系日本通嘅朋友可以跳过。

 

首先系购票机上面嘅路线图睇下你想去嘅站显示嘅价钱,然后入银仔或者纸币,当你要买嘅价钱著灯就可以按下佢出飞同找钱。

 

东京地铁最低消费一程160円,就算一个站都要咁贵,而最贵系270円。通常市中心都系160円或者190円,由西面嘅上野或者浅草去到东面嘅新宿或者涉谷都系190円。

 

如果买单程飞又需要转车的话,要留意系边个站转车,有D站转车要行一段好长嘅路,有D就会短D。同埋系东京地铁转车一般需要先出左原来条路线嘅出口闸,再行去另一条线嘅入口闸入返车站上车。所以出闸果阵要睇清楚,一定要由写有另一条线嘅闸口出闸,如果由普通闸口出,佢会以为你已经到站而唔系转车,咁就会食左你张飞架啦,咁嘅话你就唯有再买多次飞。

 

除左JR之外,东京地铁由两间公司经营,分别系Tokyo Metro同都营,其实市区主要嘅景点坐Tokyo Metro都可以去到,最多系兜远D路转车,所以如果只系去市中心,最着数系买返张Tokyo Metro一日券或者两日券,唔一定要坐都营或者JR。Tokyo Metro一日券710円,只要坐到4程以上已经抵返。

 

Tokyo Metro一日乘车券,系酒店买只需要600円,平左110円

地铁一~1

 

地铁入闸机

地铁站1

 

地铁月台,好多都好窄,人又多,好难行

地铁站2

 

电车埋站

地铁站3

 

地铁车厢内

地铁车厢

 

由水天宫前坐去三越前只需3分钟,一出地铁站就系三越百货公司,同埋日本桥。

 

三越百货公司
三越百货

 

三越百货公司对面嘅日本桥

日本桥

 

日本桥附近街道

日本桥永代通

 

高岛屋百货

高岛屋百货

 

东京车站,呢度系背面,由于时间关系冇行去正面嘅旧车站建筑,不过第二日去左

东京车站(背面)

 

东京车站系JR总站,呢个系新干线闸口

东京车站内JR闸口

 

日本银行,行返去地铁站时影,冇时间行埋去睇

日本银行

 

酒店附近嘅水天宫神社,专保佑顺产

水天宫

 

咁样兜左一圈只系用左一个钟,返到酒店系8点钟,跟住换埋衫去join埋同事食早餐,然后开始开会……食lunch……再开会。5点3左右终于开完第一日会议,然后坐大会安排嘅巴士去到另一间位于六本木嘅酒店入面间日本餐厅食晚宴。

 

出发之前睇天气预报,话东京温度系5度至15度之间,黎到呢几日都维持系10至12度左右。不过之前听人讲东京室内都有暖气,所以都唔敢带太多衫,除左西装西裤之外,casual衫只系带左两件长袖衫,同埋一件羽绒褛。点不知都仲系感觉带错衫,因为D长袖衫同件褛都仲系太厚。

 

系东京室内嘅暖气真系太劲,连地铁站都有,一入到去感觉好焗,再坐耐D就成身汗,有时感觉就算只系著一件短袖衫系室内都会觉得热。但系一行出门口就会好冻,因为室内同室外温差好大,一冷一热,唔习惯好易早招,小弟就系咁去到last day就带埋感冒返黎做手信。

 

我谂冬天去东京最好只带一D簿身长袖衫,再加一件长褛,系室内除左件褛,出门口之前著左件褛再行出去,咁就冇咁易病,又唔怕室内热。至于羽绒,我觉得11月尾同12月都仲未需要。仲有就系千其唔好著一D难除嘅衫,例如羊毛内衣同冷衫呢类,一定唔著得,唔系出到去又热又除唔到盏死……

fb share

如果喜欢这篇文章,请点个“赞”吧!

fb share

发布留言

发布留言必须填写的电子邮件地址不会公开。 必填字段标示为 *

收到您的留言后,小弟会尽快回复。如果您在留言中提供的电邮地址正确,且已勾选同意接收电邮通知,当您的留言通过审核并有回复时,系统会寄出电邮通知您。回答您留言所查询的问题有时候需要一些时间研究,请耐心等待。另外,如果您还未赞好过本Blog Facebook专页,可以请给我一个讃吗?!就当作是我花时间和精神解答您问题的一点支持吧。谢谢!

fb share

如果喜欢这篇文章,请点个“赞”吧!

fb share