2007年大阪、京都五天自由行（Day 2–游览京都 [Part 2]）

10点55分，小火车到站上车啦。

小火车黎啦

坐嵯峨小火车同系台北瑞芳坐小火车去十分好相似，都系一边系山一边系溪流，不过系嵯峨野嘅风景就靓好多啦。

山下溪流

中途嘅车站

嵯峨野除左坐小火车之外，仲可以坐船漂流，沿途见有好多架船，好似好正，不过要用成两个钟先漂玩，唔够时间玩，下次去再玩呢样

沿途风景

车厢内，企系度个kawaii日本妹妹仔系帮人影相架，不过唔知几钱张，如果佢问你你可以唔影嘅；仲有前面开车个车长沿途会一路唱d日本歌，好过引架，听讲佢好出名架，同埋好多电视台都访问过佢

11点3小火车终于到达终点站龟冈，呢度好似系农村，周围好多田。出左车站照指示牌行去JR马堀车站，大约行10~15分钟就到。由于马堀唔系大站，所以火车班次唔系咁多，要等到11点52分先有车去京都站，而且只系普通车，要坐差唔多半个钟先到。

12点4左右终于到左京都站，跟住先去10楼嘅京都拉面小路医医肚。

京都站入面

京都站出面

京都拉面小路

拣左一轮最后食左呢间（见最多人排队）

两大碗拉面，分别系800円同850円，d蛋好好味，但云吞就唔系好掂

食完野再系京都站入面个伊势丹空中走廊行左一阵，不过冇咩好睇，跟住1点半左右就系车站门口度个巴士站坐100号巴士去清水寺，由京都站去清水寺坐左3个字车（因为好多红绿灯，等转灯都用左一半时间）。坐巴士单程一律收费220円，上车前要准备好散银，到站落车就放入收银箱。如果冇散银都唔紧要，车上有部自动唱钱机，放入纸币就会同你唱散佢架啦。因为今次系京都计划只会坐一至两程车，所以冇买pass，如果有打算系京都市内去多个景点，而且需要坐多程巴士嘅话，可以系巴士站个售票处买张巴士1日券，售价500円。

1点9左右巴士到左五条坂站，按钟俾钱落车（车上有显示下一站名称，而且呢个站好多人落）。跟住行返转头去到个十字路口，见到对面有牌写住清水寺，过马路直上斜路就系。其实清水寺附近嘅指示牌唔系太清楚，好多分叉路口都冇指示牌，所以最好揸住地图对准方向行就稳阵d。

由巴士站行斜路上去清水去都行左成3个字

去京都有唔少女游客钟意试下著住和服去参拜

清水寺入口

清水寺入面

清水寺本堂

地主神社

地主神社入面嘅恋占之石，好多日本学生妹玩

音羽之滝，去清水寺必饮

清水寺大约行左两个钟，3点9左右离开清水寺之后，沿清水坂、三年坂、二年坂行去八坂神社，沿途有好多店舖好多野睇同好多野买，大约行左一个钟多d。

清水寺对出嘅清水坂

三年坂（产宁坂）

八坂神社侧门

5点左右离开八坂神社，一出正门就系祇园嘅四条通大街，然后行去花见小路通（由八坂神社正门向前行左手面第一条街，百年面油纸王对面）睇下有冇艺妓，可能太早冇咩野睇。跟住系祇园行行下，见有间叫茶寮都路里嘅舖头好多人排队，见d绿茶雪糕好似好好味，于是又排埋一份，不过食落唔好味嘅，最后连相都冇影。跟住再行多阵，去到四条大桥附近见对面有好多人排队，行过去睇下原来系排队买烧丸子，于是又排埋一份，不过埋到去佢好似用日文问要咩酱，今次冇野可以指唔识点沟通，好彩最后总算买到几串热辣辣嘅串烧小丸子黎试下，真系几好味，不过贵左d。

祇园（由八坂神社正门影过去）

花见小路通

偷影到艺妓

祇园一段

好多人排队买烧小丸子，不过好似全部都系日本人

烧紧嘅小丸子，好好味

从祇园过左四条大桥之后就系京都嘅商业中心区河原町，只系一河之隔但系呢度嘅繁华同对岸祇园至清水寺一带嘅古色古香有好大分别。呢区只系去左河原町通同新京极通附近行下买下野，其实同心斋桥冇咩分别。行行下都唔系咁想行，于是到7点半左右去左旅游书介绍嘅鱼心寿司食King-sized寿司，原来都唔系好贵，食饱饱都系3千几円。

好大旧鳗鱼寿司

虾寿司

原本计划系京都玩到10点先返大阪，但系见河原町冇咩好行，于是食完寿司就决定走人。本来谂住系京都站坐JR火车返梅田，不过行行下发现原来河原町系阪急电车京都嘅总站，虽然行车时间耐d，不过唔洗坐车去京都站转车咁麻烦，所以最后决定系河原町直接坐阪急电车返去梅田。

入到月台，最快班车系8点38分嘅快速急行，用左45分钟就返到梅田，然后转地铁去难波站，10点返到酒店，跟住冲凉休息，完成第二日行程啦。