2008年东京春季赏樱＋温泉之旅（第五天 [2]） – 箱根町、芦之湖、海贼船

因为已经系午饭时间，去到箱根町开始肚饿啦。箱根町海贼船码头出面有间卖手信嘅专门店，楼上有间几大下嘅食店架，我地就系呢度食左系箱根嘅第一餐。呢间野真系好多游客食，仲见到有个旅行团系度食添，不过有个男侍应就真系冇乜礼貌。我地入到去以为系就咁坐低然后叫野食，但原来系要先系个Counter度写低个名同人数，再等佢地同你安排坐位架，第一次去鬼知咩，但个男侍应就表现得好唔耐烦咁，可能太多野做做到好燥。

我叫左呢个猪扒（豚）饭，虽然受到唔好对待，但个饭真系好好味

食完个Lunch之后个天仲系落紧毛毛雨，不过因为离下一班船仲有几长时间，所以决定先去附近嘅箱根关所参观。

箱根町

箱根关所系以前江户时代嘅海关，地方都好细，不过都参观左成个钟，由箱根町港码头行去都要行5分钟时间。购买箱根Free Pass时会有一本小册子，入面有一页系优惠券黎架，去到指定景点买入场券时，用优惠券可以有8折至9折优惠架。

箱根关所城门

箱根关所入面

由山丘上嘅瞭望台影落黎嘅箱根关所，一眼见晒就系咁多

行完箱根关所返到箱根町港码头时间啱啱好，我地坐2点40分班船，有箱根Free Pass唔洗买飞，就咁入去就得。其实系箱根无论系船、吊车、缆车同电车，入闸嘅时候都冇乜人理，有D闸有入闸机，你可以插张箱根Free Pass入去，但其实插唔插都冇所谓架，一样入到，有D就会有工作人员系度，不过有时佢地都费事睇你张Pass。

箱根町港候船室，地方好细架

系箱根町等上船嘅游客并唔系太多，不过有个旅行团有30几人，令到人数睇落好似几多，个团应该系马来西亚华人团，因为佢地有D讲普通话又有D讲广东话，不过原来佢地只系坐一阵，跟住就要系元箱根落船坐返旅游巴走，鸭仔团真系好赶。

雨中等上贼船

从船上望返箱根町码头

因为只船系由桃源台开出，先停箱根町再去元箱根，而系桃源台黎嘅乘客大多数都系去元箱根落船，所以系箱根町就只有上客冇落客。我地一上到船见到架船满晒，仲以为全程都要企。好彩架船行左10分钟就到元箱根，跟住哗哗声D人上晒岸，而系元箱根上船嘅人又唔多。所以之后由元箱根去桃源台果程架船冇乜人，大把位任坐，而且影相仲冇人同你争位，只可惜落住雨。

海贼船上

海贼船控制室

船内座位，除左一般船舱，仲有个VIP房，不过要俾几百円先入得，冇乜必要

元箱根港

芦之湖景色

芦之湖上另一只游览船

由元箱根行左大约30分钟就到达桃源台，可惜天气唔好冇机会见到富士山嘅真面目。

桃源台港

系桃源台上岸之后，可以有两条路线去仙石原一之汤，一条系直接坐巴士去仙石原，另一条系先坐吊车同登山缆车去强罗，再转巴士去仙石原。因为时间尚早，而且想早D试下坐吊车同登山缆车，所以我地选择左第二条路线。

如果天气好系吊车上系有好大机会见到富士山架，可惜今日天雨，能见度好差。登山吊车系分开两段黎行架，一段由桃源台去大涌谷，中间会经过姥子站，可以上落客架，去到大涌谷就一定要落车，之后再坐由大涌谷去早云山嘅另一段吊车，全程加埋都要超过半小时。

大涌谷登山吊车车站

因为我地计划第二日先去大涌谷参观，所以今次就冇系大涌谷停留，直接去早云山转搭登山缆车去强罗。

早云山登山缆车车站

由早云山去强罗嘅登山缆车系一条直路，路程唔算长，路轨两边有好多樱花树，如果开满樱花一定会好靓，可惜当时一朵都唔见有开。