2008年东京春季赏樱＋温泉之旅（第二天[2]） – 浅草寺、隅田川游览船、台场

由筑地去浅草要行返去原来个地铁站，先坐日比谷线去上野，再转银座线。

仲见世通嘅入口 – 雷门

通往浅草寺嘅手信街 – 仲见世通

浅草寺正门

浅草寺内

浅草寺大殿

浅草寺都真系几商业化，除左卖手信仲有好多小食大排档。行完浅草寺我地就过去位于隅田川吾妻桥傍边嘅游览船码头，准备坐游览船去台场，顺便畅游隅田川。

隅田川，两边开左好多樱花，好靓架

由浅草去台场嘅船飞，票价1,220円，不过由浅草去台场冇船直去，要先坐去日之出栈桥码头，再转另一只船，全程大约一个钟，船飞系冇定时间架，开船有位就上得

游览船，有几种唔同款式，最多系呢款

系隅田川上坐船赏樱花真系几正架，夜晚系酒店见电视都有播。我地3点半左右已经到左台场，一上岸就系台场海滨公园，隔离就系商场Aqua City Odaiba，商场后面就系富士电视台。

台场海滨公园，后面系富士电视台，前面矮D嘅系Aqua City Odaiba

从船上影彩虹桥

去到台场因为时间仲早，我地就先去左富士电视台参观，由地下坐扶手电梯上到去有个展览馆，展出嘅野好似系佢地制作嘅节目资料，不过对日剧冇乜认识，行左一阵就走人囉。

之后去Aqua City Odaiba行，同样冇乜野啱，但系为左等入夜睇彩虹桥变色，焗住行左一粒钟，最后决定先去位于Aqua City Odaiba嘅拉面国技馆食dinner，不过果度D拉面真系好难食。

彩虹桥夜景，听讲会转色，不过等左好耐都冇野睇

可能系海边风大关系，入夜之后台场非常之冻，所以我地食完dinner就坐车返酒店啦，今次要坐一程私铁去新桥站，再转地铁返新宿，返到新宿都只系7点过D，听人讲D大百货公司系关门前会有寿司大平卖，所以我地都去左伊势丹地库嘅美食广场睇下有冇乜野正野，原来日本百货公司真系好多食物卖架，有糕点、鱼生、寿司，总之就乜都有，不过D价钱冇乜点平。

行完百货公司之后再去埋药房shopping，不过原来东京嘅药房系冇家屋清洁用品之类嘅野卖架。之后行左去百果园睇下有乜生果做消夜，不过呢度D生果一D都唔平。