2008年东京春季赏樱＋温泉之旅（总结篇）

八日日本东京箱根之旅终于结束啦，系4月3日零晨2点，拖住疲累嘅身躯同埋超重嘅行李，终于平安返抵家门。屋企嘅感觉真系好正，住完东京超细嘅酒店，返到屋企感觉间屋变得又大又舒服…..

虽然只系八日短短嘅行程，但系已经感觉到相当疲累，特别系回程果日，由踏上机场巴士开始，直至踏入屋企足足用左12小时，超辛苦，返黎之后抖左两日都仲未恢复元气。

自由行顾名思义就系可以好“自由”咁旅行，但自由嘅背后有一个好大嘅代价，就系“行”喇。跟鸭仔团虽则系冇乜“自由”，但系就胜在唔洗点“行”，旅游巴车你去到景点附近，到步落车参观是也，都咪话唔舒服。相反，自由行虽然可以自己话晒事，但系就一定会“行”到你死下死下，不过我就觉得自由行先可以体会到真正嘅旅游，辛苦D都值得。

去到好似东京呢D大都市，虽然交通工具四通八达，地铁同JR可以通往城市任何角落，但系其实正因为咁，行路嘅机会同路程先至又多又长。由于地方大，地铁站往往会好大，由目的地行去地铁月台往往需要几百至一二千米路程，而且又经常需要转线，由一个月台行去另一个月可能都需要几百甚至过千米路，再加上车站楼级多，行上行落都几系野。虽然冇正式计过，但相信系东京每日行路嘅路程一定比平时系澳门一个星期加埋行嘅路仲要多，所以自由行对脚骨力真系一个好多嘅考验。

讲返今次东京之旅，都总算一切顺利，起码冇冻病先。原定计划去嘅地方大部分都有去到，亦去左几个樱花名所，睇到满开嘅靓靓樱花，不过唔知系唔系同富士山冇乜缘，去东京程机虽然坐到左边窗口位，但系天气唔好，睇唔到富士山。而去箱根果两日仲落埋雨，连富士山个影都见唔到。

今年日本嘅天气有D反常，本来预测天气比上年冻，预计樱花会比上年迟开，点知东京嘅樱花未到4月已经满开晒，不过就啱啱好符合晒我地个行程，俾我地睇到满开嘅樱花，到我地4月2日走嘅时候，已经开始见到花落嘅情况啦。但系箱根就相反，因为天气太冻，山上嘅樱花一棵都仲未开。

至于天气方面，春天嘅东京都真系几难著衫下，我地去果一个星期都系9度至16度左右，中午有太阳时会有16度，都几热下架，一定要除左件褛，但系朝早同夜晚都系9度左右，如果有风嘅话都几冻，若然去台场呢类海边地区就更加冻，所以一日之内有时热有时冻，都几麻烦。

另外，原来到左春天大部分室内地方（包括酒店、商场、百货公司同埋地铁等等）都唔会再开暖气，所以唔怕去到室内会出现好似冬天时好焗嘅情况。

因为返黎之后仲未整理好D相，所以照片同游记，可能要等多几日得闲D先会post出黎。下面系今次旅程嘅使费（三个人），俾大家参考下先。

                                                                                                        港币

1. 机票+酒店                                                                              24,557

2. 机场税+燃油附加费                                                                1,773

3. 来回澳门至香港机场交通费                                                  1,170

4. 日本交通费                                                                               4,170

5. 入场劵及游乐设施                                                                   1,750

6. 早午晚三餐                                                                               5,685

旅行支出（三人，不包括购物）                                                  40,030