2008年东京春季赏樱＋温泉之旅（第三天） – 上野恩赐公园、迪士尼乐园

2008年3月28日（上午天晴，下午有雨，气温9~16度）

行程：上野恩赐公园 _ 迪士尼乐园 _ 新宿

今年可能好多人都俾东京嘅天气玩死，本来今年天气比上年冻左，人人都估今年樱花会比往年迟开，我地出发之前都系咁谂架，点知去到3月尾东京嘅气温突然回暖，搅到D樱花突然间开晒，比上年仲早左开花。

原先我地系计划尽量等到最后果几日嘅行程先去睇樱花架，点知系日本夜晚睇电视见到有报导上野公园嘅樱花已经满开，仲影到好多人去左赏樱花添，所以我地亦都将个行程做左改动，将原来计划系4月1日先去嘅上野恩赐公园改系今日去先。

去上野可以系新宿坐山手线，唔洗转车，大约25分钟就到。由于中途用左一D时间去左小田急旅游服务中心买定之后去箱根嘅车票同Free Pass，所以差唔多9:30先去到上野。之后就先去左一兰拉面食左个拉面做早餐，再入去上野恩赐公园睇樱花。

一兰嘅拉面果真几好味，不过就贵D，呢碗就要950円

上野恩赐公园上年12月头都黎过，当时系红叶季节尾，仲可以见到小小红叶，今次黎到发现原本两边系红叶树嘅动物园通变成一条好靓嘅樱花大道。

今次去到上野恩赐公园动物园通见到嘅景色

再黎多张密D嘅

大路两边一早就俾人霸晒位，应该系等到夜晚开赏樱Party

上野恩赐公园最靓嘅樱花地带主要集中系动物园通，另外清水观音台嘅樱花因为有间寺庙衬托，亦都好靓，我地大约行左一个钟多D就走啦，因为仲要赶住去迪士尼乐园玩啊。

由上野去迪士尼我地坐地铁日比谷线去到八丁堀再转JR京叶线去舞滨站，系东京要转车最好系揾D细站，因为行少D，如果去东京站呢D大站转车，一定会行到脚仔软架。

系JR舞滨站落车就系迪士尼架啦，不过要睇清楚，左边去Disney Sea，右边先系去Disneyland。去到迪士尼已经系中午12点左右，于是拿拿林争取时间入去玩囉。不过入到去真系被佢吓一跳，超多人，度度都要排好长龙，连系车仔档买个雪糕都排左成15分钟，我地去果日已经系星期五，如果星期六日可能仲多人啊。

JR舞滨站门口

迪士尼乐园入口

迪士尼乐园内，唔知点解呢一区同大阪环球影城好似一模一样咁

迪士尼乐园城堡

BB车停泊区

由于人太多，所以都玩得唔系太多游戏。好多人都话东京嘅迪士尼好玩过香港果个，我自己就觉得香港迪士尼好D，其实东京果个都几旧，D设施其实都out out地，而且亦冇咁靓。另外东京迪士尼入面冇乜指示牌，每个设施出门又冇牌介绍，好多时都唔知自己身在何处。

下午3点半有个大巡游，好早已经霸晒位

等等下开始有点雨点，死! 冇带伞

大巡游

雨中迪士尼乐园

大巡游系微雨中进行，大约进行左半个钟，但系大家都好守秩序，坐定定睇完先走去揾地方避雨。不过D雨落下停下又再落下咁，而且越落越大，系咁嘅情况下唯有提早走人，大约5点就离开迪士尼坐车返去，最后又返返新宿D百货公司同商场Shopping，就算出面落雨都唔怕，不过原来打算去千鸟渊睇樱花嘅行程就要被迫押后囉。