《2009年初秋北海道自驾之旅》- 第六天(1) – 小樽三角市场、富良野

2009年10月1日(星期四)，天晴，气温12~20度

小樽入住嘅酒店并冇book到早餐，原因系酒店对面就系三角市场，想再试下早餐食鱼生饭嘅滋味。 

三角市场有两个出入口，呢个系系小樽駅侧边嘅出入口，另一个系系大路果边。

一眼睇晒，三角市场就系咁大。

呢间“武田鲜鱼店直营食事处”算系三角市场入面唯一食店

墙身贴满晒食客嘅相，好似好多游客去过，唔知真定假，如果有兴趣你都可以俾佢影返张黎贴墙。

一入去个老板娘就问我地边树黎，一知系中国人就俾左份中文报纸旅游版我地睇，入面介绍呢间食店，仲大赞呢碗蟹汤大件夹抵食，唉，D蟹又霉又冇味。

呢碗鱼生饭都算唔错，蟹肉鲜甜，带子好新鲜，食完好满足。

食完早餐又系时候离开小樽，今日会去富良野，为左争取时间同埋避开札幌附近繁忙嘅市区街道，所以选择由小樽至三笠嘅路段行高速公路。

今日嘅行车路线图，行车距离约180公里，行车时间大约3小时(连中途休息)。

北海道嘅高速公路真系好好行，道央高速公路全部都系有两条行车线，上下行车道之间又完全分隔，行起车黎完全冇压力，同上次和歌山嘅高速公路相比真系好好多。因为高速公路太好行，所以人人都会不自觉地超速，我地由小樽至札幌平均都系行紧时速120公里，话咁快就到札幌。

正当我地以时速120公里行驶嘅时间，突然系隔离线出现左呢位. . . . . . 交通警察

第一次系高速公路遇见交通警察，佢仲示意我地行埋左边线，唔通佢想告我超速。系告都冇办法啦，唯有听佢指示转入左边线，跟系佢后面行. . .行. . .行左一大段佢都冇咩表示。而因为有交通警察出现，其他车亦唔敢超速，大家都以80 -90公里嘅上限行驶。行左一大段我估佢应该唔系话我超速而叫我转入左边线，要我行左线嘅原因应该系因为我当时一直行紧右线，而右线系用作爬头，唔可以长期行住右线。果然，过左冇耐个交通警察终于从前面一个出口离开，而大家亦即时行返正常嘅超速速度( 110公里 +)。

高速公路上. . .

未出高速公路之前先系岩见沢休息站抖抖

经过差唔多一小时车程之后，我地系三笠出口离开高速公路改行国道，点不知，行返国道冇几耐就出事啦。出左咩事，咪又系超速囉，估唔到系高速公路冇俾人捉，落到国道就走唔甩。

日本嘅国道好多都系又直又阔，尤其是系郊区，但系唔知点解日本人将个速度限制系50公里，太唔合理啦，试想系咁嘅路面情况点控制得住对脚，好易就超速。

当我地离开高速公路之后，系国道上行左冇几耐前面就出现左个人举起红旗，原来红旗上写住“警察”，之后佢示意我地驶架车入去路边一块空地，之后有个警察用日文讲好似要求出示证件之类，我都听唔明，就用英文同佢讲我唔识日文，原来佢嘅英文都唔差，见我地系游客就好客气咁问我地边度来，之后睇下本passport，又问我地之后去边，跟住行开同另一个好似高级D嘅讲左两句，返转头就好有礼貌咁同我地解释条路限速50公里(我地当时系行紧90公里)，叫我地行慢一D，而最重要果句系“just caution, no penalty”，哗，听完呢句个人当堂定晒。本来谂住今次好麻烦，因为日本超速好似罚成3~5万円，而且仲要亲自去警察局搅手续交罚款，如果真系罚咁唔单止破财，仲会影响行程，而家唔洗罚真系谢天谢地。趁佢未反口拿拿淋走人(当然系用50公里龟速啦)，哈. . . . . .。

虽然俾人捉左超速，不过离开市镇去到郊区之后，仍然冇办法控制得住唔超速，而且其他车辆都系行80公里以上。所以决定跟住人地人，人地快我就快人地慢我又慢(其实之前果几日都系用呢个原则)，咁就算捉都捉前面架车先啦，而且相信捉超速主要系系市镇范围，郊外地区应该机会小好多。

从三笠IC去富良野会经过三笠市同籚别市，主要系山路，不过风景都几靓，尤其系位于三笠市嘅桂沢湖。

位于452号国道旁边嘅三段泷系由三笠至富良野途中嘅一处景点

三段泷同日本其他好多瀑布一样，都只系好细规模

中午12点半终于到达富良野，呢个系富良野駅出面嘅公仔。

系富良野駅影相嘅时候偷听到有几个香港人讲呢间池田屋几好食，于是近近地就去呢度医左肚先。

池田屋餐牌上嘅选择唔多，只系点左呢一set寿司，千几円。

待续. . . . . .