《2009年圣诞首尔之旅》- 第二天(1) – 游览南怡岛

2009年12月23日(星期三)，天晴，气温：around零度

今日主要系去南怡岛，听讲系一处因为拍摄韩剧《冬季恋曲》而出名嘅地方。按照旅游书介绍，由首尔去南怡岛主要有两种方法，一种系由首尔坐火车去加平，再转坐的士去，另一种就系直接系仁寺洞坐巴士去，不过每日只得一班车。为免交通麻烦，我地前一日已经去左买定飞（详细介绍可参考第一天内容）。因为巴士会系上午九点半出发，所以我地八点九出门口，由酒店坐的士直到去仁寺同塔洞公园。

架巴士就停系公园旁边面向仁寺洞街果边嘅马路边，车身大大只字写住仁寺洞至南怡岛船著场（日文），好易揾架。因为我地前一日已经俾晒钱买左套票，所以只需要将张收据俾个司机，等佢系张list揾到个名，跟住佢就俾左一set正式车票同入场券我地。

见仲有时间，而且车程都要差唔多1.5小时，所以先去附近M记买早餐上车食。

可能唔系旺季，架巴士只系坐左一半乘客，而司机亦系九点半准时开车。经过大约个半小时车程，巴士终于抵达南怡岛嘅码头啦。落车嘅时候司机会叫大家三点半返黎落车地点，之后四点准时开车返回首尔，不过佢系用韩文讲架，我地都系听其他乘客翻译。

南怡岛码头嘅巴士乘车处就系南怡岛购票处隔离，架巴士会一直停系度，等到四点钟。

因为我地已经买左套票，所以直接入去等船。南怡岛系系河上嘅一个小岛，由码头坐驳船五分钟就到架啦。

本来以为去南怡岛可以睇到雪景，可惜天公唔做美，我地系韩国呢几曰并冇雪落，当然冇雪景可睇，只系见到水池结冰。

如果遇到适合时间，南怡岛会系影相几靓嘅地方，例如深秋红叶季节以及满布积雪嘅时候。如果唔系呢D时节，风景只系一般。介绍就唔多讲啦，大家睇相算啦。

其实南怡岛面积都好细，基本上三小时已经行晒。因为返回仁寺洞嘅巴士系四点先开车，所以唯有被迫留足五小时。另外，岛上面并冇乜嘢食店，多数游客（包括我地）都只系食烧饼同公仔面充饥。

回程嘅时候，除左原来乘客之外，亦都有一D坐返回首尔嘅乘客上车，所以架车坐满晒。司机系四点钟准时开车，不过由于首尔市区放工时间好塞车，所以用左两小时先返到仁寺洞。

待续. . . . . .