《2009年初秋北海道自驾之旅》- 第三天(2) – 函馆、Comfort Hotel Hakodate

系北海道，国道以及道道嘅质量都非常之唔错，虽然国道限速50公里，不过一般系郊外行80~ 90公里都唔系问题，不过系有民居嘅路段最好唔好超过 60公里，因为可能有测速，我地就俾警察叔叔捉左一次超速(详情等第六日行程先慢慢讲)。所以今次六日车程都好少行高速公路，除左由小樽去富良野以及返回札幌果两程，因为果两程所经过嘅路段太多城镇，行国道太难超速，而且又多红绿灯位。

系郊外嘅国道同道道上虽然都不时有红绿灯位，不过呢D红绿灯需要过马路嘅人按掣先会转灯，所以一般都系长绿。除左某D重要路段之外，国道同道道一般都系双线双向行车，即系有对头车，中间用黄实线或者白色虚线隔开果种。系白色虚线嘅路段可以爬头，不过最好等到有一段大直路，确定好远之外嘅对面线冇来车，先好爬，同埋亦要留意你后面有冇车爬紧头，爬头时亦记得要打灯。

由登别至函馆之间虽然有一段高速公路，但系高速公路只系去到八云为止，所以行高速公路所减少嘅行车时间并唔系太多，而且道南嘅5号国道经过嘅城镇并唔系太多，所以行国道同行高速公路嘅时间相差无几。另外，从大沼公园至函馆之间有一段叫函馆新道嘅免费高速公路，都可以悭到一D行车时间。

由于系室兰揾地球岬阻左D时间，再加上落雨关系，所以比原定预算迟左到达函馆，下午4点半左右先到今晚入住嘅Comfort Hotel Hakodate。

Comfort Hotel Hakodate正门(第二朝影)

Comfort Hotel Hakodate房间

Comfort Hotel Hakodate洗手间

同札幌比较函馆嘅酒店都平好多，今次住呢间叫Comfort Hotel Hakodate，7,500円，送函馆朝市“きくよ食堂”早餐券每人1050円，即系净房价只系5400円，好抵住。而泊车要另外俾钱，泊酒店停车场(室外，系离酒店100米外嘅一块空地)一晚500円。

系酒店check-in完之后仍然不停落雨，根本冇办法去景点游览，所以决定去室内嘅地方行下。

海鲜市场，位于金森仓库隔离(海鲜市场侧边有个停车场，下午6点之后系免费架，如果去金森仓库一带可以泊系呢度。)

海鲜市场里面，系购买手信嘅集中地。

金森仓库，多数卖工艺品，冇咩特别嘢值得行。

虽然个天不停落雨明知上山都唔会有机会睇到夜景，但系一场来到而且系函馆只会停留一晚时间，今晚唔去都唔知几时先有下次机会，所以都系决定上函馆山撞下机会。如果系日间，可以自己开车上去函馆山，不过下午6点之后就唔得，只可以坐缆车上山。函馆山缆车站外面有免费停车场，可以泊低架车。去函馆山之前记得系酒店大堂攞返张割引券啊，又或者上佢网下载都得。

上到山上果然不出所料. . .，你睇，当晚著名嘅函馆山百万夜景就只得. . .

睇唔到函馆山夜景系今次旅程嘅最大遗憾，不过个天要咁都冇法子啦，唯有去食返D好嘢补偿返。系网上见过好多人推介函太廊寿司，今晚就决定食呢间。上函太郎个网页并未发现佢有割引券之类，不过原来佢都有一个每人送一碗蟹汤嘅割引券架，呢张割引券我地系系函馆山缆车站度发现架，应该其他地方都会有。

其实函馆市区真系好细，函太郎虽然系海边，但系由函馆山缆车站出发唔洗10分钟车程就到架啦，而且佢有自己停车场，泊车绝无问题。函太郎嘅寿司真系好正，用料好新鲜，我就最中意佢嘅带子，真系好好味好有口感。而且佢嘅价钱好抵，可能系回转寿司站，价钱大众化，绝对超值。可惜挂住食唔记得影相，走嘅时候又因为落雨睇唔到外面。

第三天行程结束。