《2009年圣诞首尔之旅》- 第二天(2) – 夜游东大门、光化门广场

今日系南怡岛消磨左成日，返到仁寺洞已经系六点，落车之后决定去东大门行下，顺便去食猪脚，因为中午冇正式食过嘢，好肚饿。

出左东大门地铁站之后，途经东大门城楼以及清溪川。

因为我地唔系shopping达人，所以东大门寻宝式嘅shopping并唔太适合我地，行左一阵之后决定去揾嘢食。

* * * * *

我地睇左旅游书，见到佢介绍嘅平安道猪脚好吸引，所以决定今晚试一试。由于旅游书嘅介绍放系东大门度，所以以为间食店位于东大门，揾左一轮先知原来猪脚食店位于东国大学入口站（东大入口站）附近，离东大门有一大段距离。

从东国大学入口站地铁站3号出口行出地面，沿行人路向前行200米左右就会见到好多间专卖猪脚嘅食店。本来打算揾旅游书介绍嘅平安道，可惜始终揾唔到，所以去左一间好多人食嘅，见佢招牌写有电视台介绍过，应该都唔差得去边。

入到去见枱枱都系一碟猪脚，所以跟住叫。猪脚有大、中、细三款，价钱分别系₩30,000、₩25,000、₩20,000。我地点左细嘅，已经足够两人食。D猪脚都煮得好入味，用生菜包住黎食好好味。

* * * * *

食饱之后见仲有精神体力，所以决定去光化门广场行下。圣诞节期间光化门广场好似举行光节，有灯饰以及激光表演。

系呢度顺便插一段，推介一下韩国嘅雪条，虽然天气只得零度左右，但系佢D雪条真系超好味，就算几冻我地都忍唔住口每日食，尤其是密瓜味超好味。

第二天行程完结