《2009年圣诞首尔之旅》- 第一天(2) – 景福宫烤肉店

食完野周围行下，行到两点几终于可以去酒店check-in啦。入到房第一时间做D乜？当然系上床训觉啦。坐夜机真系好辛苦，试过上次去北海道同埋今次去首尔之后，以后都要尽量避免坐夜机。可能年纪大左，成晚冇训第二日真系会完全冇晒精神。

就系咁，我地系酒店度冇较闹钟，训左四粒钟，一直训到七点先起身。再冲埋个热水凉，成个人精神晒先至正式出动游首尔。

* * * * *

夜晚嘅明洞真系同日间完全唔同，唔知系唔系临近圣诞节关系，成条街都系人。由于已经系八点几食晚饭时间，所以决定先医左个肚先。对于唔食得辣嘅人系韩国食野，烧烤似乎系少数可供选择嘅其中必然之选。今晚我地就决定去豪一豪，去左一间比较贵嘅烤肉店 – 景福宫。

景福宫虽然位于明洞，但系就离开明洞街购物区较远。照住地图沿明洞街向明洞教堂方向行，再过埋一条大马路(三一路)向前行少少就到，由明洞站去大约行15分钟。

可能系平日，入面并唔系有太多人客，不过连埋我地就有三枱港澳游客，睇黎大家都系跟住同一本旅游书嘅指引而来。

因为唔识佢餐牌上写D乜，所以按照旅游书介绍，要左一个两人份量嘅拼盘(₩6x,xxx)，再加多一份顶级牛肩肉(₩4x,xxx)。

先来好多前菜，一来由于太辣，二来唔想食饱左食唔落主菜，所以唔系食太多。左边碟菜系用黎包住牛肉食嘅。

呢间烤肉店系有专人帮你烧架，唔洗自己动手，烧完夹黎食就得架啦。

其实牛肉份量并唔系太多，两人食都只系啱啱够。味道方面，个人觉得只系麻麻地。

今餐食左大约₩12万，因为之前print左张coupon，有9折优惠，找数时盛惠₩10万松D。

韩国并唔系好似日本咁有好多消费折扣券可以使用，不过仍然有两个日文网有一D首尔商店嘅折扣券可以download。

SEOUL NAVI网折扣券

Konest韩国旅游情报网 (并唔系所有列出嘅店舖都有折扣券)

食店折扣券 (可按食物种类或地区搜寻，Click入你想食嘅食物种类或者地区之后就会列出店舖list)

商店折扣券 (可按商店类别或地区搜寻，Click入你想买嘅商品类别或者地区之后就会列出店舖list)

更新：关于韩国折扣券的资料，可参考<韩国折扣券大搜集>呢篇文章。

* * * * *

食完饭之后我地决定先去位于首尔站嘅乐天超市。原本系冇计划去行超市架，不过因为系澳门买错左插苏转换器，去到酒店先发现用唔到，但系明洞又揾唔到买呢类产品嘅地方，所以焗住要去乐天超市揾下有冇。

去韩国之前只知道佢地用嘅插苏系两脚圆脚果种，并冇留意原来佢嘅插座全部系圆形凹入去嘅，一定要用圆形插头先可以插到入去，而我地带左一个方形圆脚插头过去，所以根本用唔到，唯有被迫去超市买啦，好彩系乐天超市都买到一个，可惜只得一只款，而且仲要系超贵。

由明洞去首尔站只有两个站，系标示乐天超市嘅出口出到地面行冇几耐就系超市所在。睇旅游书介绍，讲到首尔嘅超市好似好大好多嘢买咁，而且仲将首尔站呢间乐天超市排名第二位。但系去到发觉呢间超市真系唔多大，货物种类又少，完全冇嘢啱买，所以我地买完插苏转换器就打道返回酒店休息。

第一天行程完结