2009年台北自由行 (Day 1) – 宝格利时尚旅馆、西门町、饶河街夜市

继2007年之后，2009年三月又去左第二次台湾，今次只系去台北hea五日，基本上都系去返上次去过嘅地方。其实呢次行程应该系北海道之旅之前写完post出黎，不过因为工作关系未有时间，而之后又提唔起劲写，所以一拖再拖。而家趁住刚刚写晒首尔圣诞之旅嘅余兴，顺便补返呢次台北之旅嘅网志。另一个推动补写呢次游记嘅原因，系黎紧农历新年将会第三次到访台北，所以希望可以系发表下次台北旅游网志之前，先完成第二次台北之旅嘅游记。不过由于事隔太耐，好多细节都唔系记得太清楚，所以只可以概略咁写。

费话少讲，快快进入正题. . . . .

由于已经去过一次，所以唔需要再好似第一次咁搅咁复杂既申请入台证手续，可以选择到步时系机场办入台证，或者通过网上申请。因为怕到步时人多要排队，所以选择上网申请，申请手续相当简单，只须到网上申办入台证网址填写基本资料，提交申请之后过 一两 分钟就有批核，之后记低个批核number，带埋身份证Passport同HK$75费用去到出证地点（澳门系位于皇朝广场嘅台北经济文化中心）取证就得架啦（叫人代领亦可以）。

今次去台北坐中午12点几由澳门起飞嘅air macau航机，到达桃园机场差唔多系下午3点。自从两岸直航之后，Air Macau生意差左好多，系咁蚀钱，所以样样都要cut cost，你睇下，呢个就系今次航程既飞机餐既全部，净系得盒饭，以前有嘅面包同生果通通欠奉。不过已经好过圣诞节去首尔果次啦，果次只系每人派得个包食，可怜

出到机场大楼第一时间揾巴士出市区，不过就俾国光巴士个售票员呃左，搅到好鬼庆。虽然上次去台湾已经差唔系两年前嘅事，不过仲依稀记得有机场巴士直达西门町嘅主要酒店门口。但系当我地去到国光巴士嘅counter问佢时，个售票员话冇巴士去西门町，仲好肯定咁话间间巴士公司都冇车直达西门町，又话架巴士就开，系咁催我地快D买车飞，就系咁俾佢搅到失晒魂，买左飞。点知买左之后因为架车full晒上唔到巴士。澳门航空系系桃园机场嘅第一航厦，而国光巴士系由第二航厦嘅上车点开过黎，所以车上已经坐左好多人，剩返嘅座位唔多，而且多数系单丁位，最后等左好耐先有第二班车。

等车期间我地先发现原来隔离counter嘅飞狗巴士系会直达西门町主要酒店门口架，我地上次就系坐飞狗。不过系网上见好多人话飞狗D司机技术唔好，比较危险，坐国光好D，但系我嘅经验就觉得冇乜嘢，而且飞狗D巴士大D新D，座位又舒服D，同埋佢系由第二航厦开出，所以一定有位坐，最重要系佢可以直接去到西门町，如果住西门町一带嘅酒店，就唔洗坐去台北车站再转车咁麻烦。

今次book左位于西门町中华路一段嘅宝格利时尚旅馆，book佢嘅原因，系见佢系新开只有年几嘅精品酒店，睇佢网页D相又好有style，离西门町同捷运站又几近，所以一连四晚都住佢。但系住落觉得唔系太好，第一系呢间嘢似俾人偷情嘅时钟酒店多D，如果一家大细住唔系咁好；第二系佢个冲凉房唔系太得，虽然佢嘅卖点系有个按摩浴池，但系除左呢样之外，浴室内嘅其他设备就唔系太掂，尤其是佢个冲浴花洒，唔系唔出水就系漏水；第三系佢嘅地点，虽然系离西门町捷运站只有3分钟路程，不过就系位于离西门町中心较边缘嘅地方，并唔系一落衔就有店舖可以买嘢果只，稍为唔方便。

系酒店check-in完放好行李之后，先系西门町行下，又系例牌食返碗阿宗面线。

夜晚时段去左饶河街夜市揾食，先坐捷运到市政府站，顺道系新光三越行左一阵，然后就坐的士去饶河街。其实系台北坐的士并唔会贵，今次有四个人去，所以好多时都搭的士，计起黎仲平过坐捷运。

饶河街夜市上次冇去过，听朋友讲几好行所以咪去试下。不过我就觉得麻麻地，因为条街主要系一D卖杂货嘅摊位，食卖食嘅只系夹系卖杂货嘅摊位之间，隔几档先有一间，唔得集中，所以比较唔好行。不过呢度嘅十全排骨我觉得好正，比起士林夜市嘅仲好味。

Day 1完