2009年台北自由行 (Day 3 – B) – 淡水

系阳明山睇完樱花之后，又坐公共汽车去返捷运剑潭站，然后坐捷运去下一个目的地：淡水。淡水上次都有去过，今次又系重游。

上次系淡水食过一间叫本港快餐嘅鱼丸好好味，今次又去同一位置间舖头再食，但系觉得味道差好处，好难食。返黎睇返张相先知原来间舖改左名，多左个“新”字，可能换左老细，唔怪得唔同味啦。

行完淡水老街，再坐船去渔人码头，原来而家连坐船都可以用悠游卡，真系好方便，所以去到台北真系记得买返张，坐捷运、公共汽车都可以用，方便快捷，临走前又可以全数退回未用余款，唔会蚀架。今次去渔人码头嘅时间因为接近黄昏，所以可以睇到好靓嘅日落景色。

游览完淡水渔人码头之后，我地选择坐公共汽车返去淡水老街，公共汽车站就系过左白色情人桥对岸，不过要留意行车方向，问清楚司机系返去淡水老街嘅先好上车。返到老街已经开始入黑。

离开淡水之后我地就去左士林夜市，所以又再一次去到捷运剑潭站。隔左咁多个月已经唔记得当晚系士林夜市食左D乜啦，因为当时冇睇相，只系记得有食我系台北嘅至爱 – 红豆牛奶绵冰。

唔知点解其他夜市揾唔到呢种绵冰，只系士林夜市有，而系士林夜市入面有两间食绵冰嘅舖头，大家系正对面。今次食呢间唔系咁好味，唔知系唔系第一次嘅关系，觉得上次食果间好味好多，但系因为已经食唔落，所以冇再试埋果间，下次去一定再试下。

经过一日丰富行程返到酒店已经好累，不过用佢个按摩浴池冲完凉又真系精神返㖞。所以趁未眼训又落街行下，扫下便利店D特色饮品，又买左件Mister Donut，跟住再试埋西门町口嘅Cold Stone炒雪糕做宵夜。

Day 3完