《2010年新春台北之旅》- 第一天(3) – 度小月

介绍完酒店，系时候写返第一日嘅行程。我地将行李寄存系旅店之后，就即刻出发去食午餐。之前睇天气报告话台北有雨，但系呢一日就不知几好天，仲有太阳添，以为好正啦，点知之后就. . . . .日日落雨。

最近丹迪旅店嘅捷运出口系中山站3号出口，就系正新光三越本馆门口，由丹迪旅店行过去只系300米左右，不过要留意呢个出口冇扶手电梯，如果拖住行李就千其唔好行，可以行前少少去新光三越2馆隔离嘅1号出口，果度就有扶手电梯。

丹迪旅店附近天津街街口嘅观光导览地图

中山北路一段与南京东路/南京西路交界处嘅十字路口，系往来丹迪旅店与捷运站嘅必经之路。

新光三越本馆对出嘅南京西路

新光三越本馆门口，灯柱隔离就系捷运3号出口。

大年初一新光三越开门前有拜神同埋烧炮仗

入到捷运站当然系先到询问处窗口买返张悠游卡，使用悠游卡撘捷运可以有八折优惠，而且除左捷运之外乘坐公共汽车亦可以使用，好方便。悠游卡一张NT$500，其中NT$100系按金，其余NT$400可以使用，用晒可以增值，走之前可以再去返任何一个捷运站入面嘅询问处窗口退返未用余额同埋NT$100按金。我地走嘅时候每张卡退返NT$234，即系搭捷运只系用左NT$266。

* * * * * * * * * *

今日第一站系去忠孝敦化嘅度小月食午餐，其实本来系想去果度间鼎泰丰食小笼包，但系去到门口贴左张红纸写住初五启市。跟住行埋去东区粉圆，又系初五启市。

当时仲未够11点半，唯有系度小月门口等开门。台湾度小月D食物真系好好味，最中意食佢嘅担仔面，捞面同汤面都好正，NT$50一碗真系唔贵。另外虾卷同麻油鸡都系必试美食，大肠亦唔错，不过要食卤水大肠，炸大肠就麻麻。呢餐食左NT$850。

台湾嘅小S应该系度小月嘅常客，我地07年第一次去度小月时就系果度遇到佢，今次我地食完走时又撞到佢入去食嘢，真系有缘。

大年初一好多舖头都仲未开门，所以食完度小月决定坐捷运去市政府站，先到诚品书店买书。大年初一“书书声”好似唔系咁老泥，不过百无禁忌，今次系受朋友所托代为购书。

买完书之后我地再到新光三越A4嘅B2层食下午茶，就系呢间AUNT STELLA’S。夹饼加雪糕，再加埋一杯野饮，破费NT$320。

之后再买用鸡蛋壳整嘅鸡蛋布丁，NT$180一盒。上次食过觉得好好味，不过今次食落觉得味道只系一般。

买完布丁时间已经系下午3点几，所以先返丹迪旅店Check-in。

待续. . . . . .