《2010年新春台北之旅》- 第一天(4) – 美丽华影城

今年以黎最中意嘅电影系阿凡达，只可惜澳门冇3D影院，只系睇左2D。所以今次到台北其中一个节目就系去睇返次阿凡达3D。上网揾过资料，原来台北美丽华影城嘅iMax影院系东南亚最大嘅，所以一于就去见识下。

台北嘅戏院都可以网上订飞，所以出发前系澳门上网订左先，我地去睇果晚系2月14日情人节，又系大年初一，而且我地要订嘅系iMax影院，只有300几个座位，所以好多人争位。上美丽华影城嘅网页睇过原来2月10日下午6点开始就可以订2月14日开始嘅戏飞，所以果晚一返屋企就即刻上网book，但系都系慢左，好位冇晒，只订到前面第四行嘅座位。因为系iMax又系3D，所以戏飞嘅价钱都贵好多，要NT$420一张，另外加收网上订票费用每张NT$20，不过计埋都平过香港。

系网上订戏飞好简单，以下介绍一下订美丽华影城戏飞嘅方法俾有兴趣嘅朋友参考。

首先去佢线上订票网页，可以先查询场次以及查询票价。要订飞就click立即订票个icon，跟住选择戏院，要留意只有“美丽华大直影城”以及“iMax影厅”先系位于美丽华百乐园（即系有摩天轮果度），而“美丽华天母影城”系位于另一个地方架。

选择戏院之后就可以选择要睇嘅戏名（如果系3D，戏名隔离会显示3D字样），然后再选择场次，之后系跟住个画面选择“非会员登入”（好似只有台湾人先可以登记做会员），然后系全票度选择人数（如果你有优待券就系优待券度选择人数）。之后再click“下一页”，等一阵会显示座位表（如果冇咁应该系你电脑冇安装Java），系统会同你自动选择最好嘅座位，用蓝色显示，如果唔中意可以用mouse点走佢，再自己选择座位，会以绿色显示。想系美丽华iMax影院选择个靓位，可以参考呢个网页：美丽华大直影城IMAX座位表解析。

确定之后再click“下一页”，然后输入你嘅email、姓名、手机号码、信用卡号码以及信用卡种类，并且点选“我已经阅读并同意”前嘅方格，确定无误后再click“立即订票”。之后会出现“你已经成功订票囉”嘅页面，将呢一页print出来，去到售票处出示就可以正式买飞，不过要系开场40分前去到取票，否则订票就会失效架啦。戏飞钱会系买飞时先至收，系唔会系你张卡度扣钱架。

ps: 其实订票时填写嘅全部个人资料，包括email、姓名、手机号码、信用卡号码，通通都可以乱写架，系统一样会显示订票成功。

* * * * * * * * * *

美丽华百乐园系上两次去台北时都有到过，当时捷运文湖线仲未开通，所以需要先坐捷运到剑潭站，再坐商场嘅接驳巴士到美丽华。而系09年中文湖线开通之后，终于可以直接坐捷运去美丽华，唔需要转巴士。不过由中山站出发，坐捷运到美丽华百乐园所在嘅剑南路站需要转两次车，先到台北车站转一次，再到忠孝复兴转多一次，加加埋埋都需要30分钟，同以前去剑潭站转接驳巴士所用嘅时间差唔多。文湖线系木栅线向北边嘅内湖区嘅延申，所以一样都系采用细车厢，同埋大部份路段都系架空。

美丽华百乐园就位于剑南路站隔离，出左车站行过马路就系。因为系年初一再加上情人节，所以人超多。

我地先搭扶手电梯直接上去五楼嘅售票处，买之前系网上订好嘅戏飞。买飞时可以再加D钱买埋有饮品同爆谷嘅套票。

因为仲未够钟，所以先系商埸行下，不过人太多，而且亦无乜特别舖头好行。我地买左6：40果场阿凡达3D iMax戏飞，所以行到6：15就上去六楼嘅戏院入口攞爆谷同饮品，不过睇戏嘅人好多，排左好耐先攞到，好彩都冇迟入场。

终于入得埸啦，入埸时工作人员会派发3D眼镜，男女size唔同，走嘅时候工作人员会系门口收返。

我地虽然坐第四行嘅前排座位，不过个iMax银幕真系超大，所以并无太大影响，亦唔觉得有死角位，全个银幕都可以睇晒，而且真系好震撼。睇3D的确比2D正好多，不过睇得耐对眼真系几辛苦，需要耐不耐休息一下。

睇完阿凡达已经系九点几，出到街发现正在落雨，好彩早有准备带左雨伞。回程我地选择坐接驳巴士去剑潭站，先到士林夜市食完嘢，再返酒店。

第一天行程完结