《2010年新春台北之旅》- 订房篇

最近几年每年农历新年嘅指定节目都系去新开嘅赌场、酒店观光,已经开始有D。所以今年趁住有连续5日假期,决定出去走一走。

 

本来经过上次圣诞节首尔之旅之后,已经打算唔再系大时大节嘅日子出游,但系到有长假期时又再心思思,所以最终都系决定照去。虽然机票酒店样样都比平时贵几成,但系旅行社照样人山人海,年三十同初一去日本已经冇晒机位,去台湾都只得年初一有机位,而且仲要23百几蚊。本来打算唔去架啦,但系又有D心有不甘,所以试下去嘉盛问下,一问之下原来air macau系年初一朝早有班加班机,来回机票连税同埋燃油附加费都只系MOP1,870,于是即系拍板买左机票先

 

ps: 相信去开台湾旅行嘅澳门人好多都知道嘉盛呢间旅行社,佢专做大陆同埋台湾机票,亦有卖package,虽然系“up up dup dup”,但系佢嘅价钱就算唔系澳门最平,都应该第二平架啦,所以去台湾好多人都帮衬佢,另外佢亦有台币换,而且兑换率比任何一间兑换店都高。

* * * * * * * * * *

 

由于唔系第一次去台湾,而且今次嘅目的亦只系打算主要去台北轻轻松松玩几日,所以买机票时心入面仲未有任何行程嘅planning。买左机票返屋企上网揾左D资料,发现原来台湾2月中已经有樱花,而日月潭系其中一处较多樱花嘅地方,所以本来打算去日月潭,可惜揾唔到酒店,唯有取消。不过都好彩,因为之后系台湾睇新闻,原来新年假期好多台湾人都涌去日月潭,搅到大塞车,好彩我地冇去到,唔系就惨

 

去过两次台湾都未试过佢嘅温泉,所以今次都好想试下浸温泉,既然去唔成日月潭,咁就系台北附近揾一个有温泉嘅地方去啦。北投、阳明山、乌来以及宜兰嘅礁溪都系台北附近比较著名嘅温泉乡,但系既然2月中台湾有樱花,所以亦想揾一处既有温泉,又有樱花嘅地方,而符合呢两个条件嘅地方就只得乌来。所以最终决定系台北住两晚,乌来住一晚温泉旅馆,决定左之后即时上网揾酒店。

 

之前两次去台湾都系买package,由旅行社订房,今次系第一次自己上网订。台湾好多酒店都有自己网页,而且好多都有提供网上订房服务。透过网上订房一般都会即时系你信用卡度扣钱,唔似得日本果D可以等到入住果阵先俾cash,不过自己系网上订房嘅价钱一定会平过通过旅行社订。

 

如果自己已经有心水酒店,可以直接上佢网页订房,亦可以上呢个香港嘅台湾酒店网,睇下有边间酒店啱心水,再入酒店网页订房,同时亦可以比较到上网订与透过agent订嘅价钱差别。(更新:建议先到HotelsCombine.com或者Wego.com查下最低房价)

 

另外,台湾有几个大嘅旅游网站都有提供网上订房服务,操作同系酒店网页订房差唔多(应该都系同一套系统)。呢D网站除左提供订房服务之外,亦提供好丰富嘅台湾旅游资料,不过因为冇咁好心机去睇咁多资料,所以呢D网站我都冇详细研究过

台湾观光资讯网(官方网站)

大台湾旅游网(TTNews)

旅游资讯王

* * * * * * * * * *

 

虽然只系一月中,离开新年仲有成个月时间,但系热门嘅酒店都已经full晒。首选嘅乌来璞石丽致同次选嘅春秋乌来(现称:馥兰朵乌来渡假酒店)系农历年后嘅成个星期都冇房,最后选择左三好米温泉会馆。咁好彩年初二果日仲剩返有一间客房,叫和风双人套房,房入面有私人温泉架,虽然房租要NT$7,200,不过旺季都冇办法,即时confirm订房。(p.s. 房间介绍留系第二日行程再写)

 

三好米温泉旅馆(3)

 

搅掂乌来住宿下一步就系揾台北市内嘅酒店。去台湾好中意住佢嘅精品旅馆,贪佢够靓又好有时代气息,房租又唔贵。其实如果唔需要用到酒店嘅其他设施,住精品旅馆真系好过住正式酒店。

 

有一间叫丹迪旅店嘅精品旅馆系网上好多人赞,上年去台北嘅时候本来都想住,可惜冇机会,所以今次first choice就系佢丹迪旅店系台北有两间,一间叫丹迪旅店天津店,位于捷运中山站附近天津街近南京东路一段嘅街口,另一间系丹迪旅店大安森林公园店,位于大安森林公园附近。我地住嘅系天津店,因为交通会方便一D。由旅店行去捷运中山站好近,出左街口沿南京东路一段向新光三越方向行,大约300左右,中间只需过一条马路(中山北路一段)。

 

唔知系唔系真系咁好彩,上到丹迪旅店嘅网页一睇,竟然系初一同初 三两 晚各有一间房剩,啱晒我地schedule,中间果日可以系佢度寄存行李,轻装去鸟来。(p.s. 房间介绍留待第一天行程再写)

丹迪旅店(3)

 

 

唔知系因为我跳左一日连续订两晚房,定系佢嘅服务真系咁好,当我系丹迪旅店网页订完房之后冇耐,佢就打长途电话过黎同我confirm,而且系入住果日又再打多次黎问我地几点到旅店。其实我一订房就已经系信用卡扣左钱,就算我唔到都冇得退款架啦。所以我觉得佢嘅服务真系唔错,入住之后亦觉得佢地好helpful好有礼貌

 

 

我将这次台北之旅的订房经验,总结在预订台湾酒店经验分享这篇文章内。另外,也按区域提供台北各区的酒店推介:西门町附近 / 台北车站附近 / 中山区 / 忠孝东路沿线 / 捷运文湖线复兴路沿线

* * * * * * * * * *

 

另一样需要出发前准备好嘅系申请入台证,因为之前已经去过两次台湾,所以申请入台证手续好简单,一系等到系台湾机场入境时即时申请,一系就系透过网上申请。透过网上申请只须填写简单个人资料,等电脑核实后就可以到澳门台北经济文化中心取证。入台证费用今年加左价,旧年去仲系收紧HK$50,而家已经加到$75

准备完成,等待出发

fb share

如果喜欢这篇文章,请点个“赞”吧!

fb share

发布留言

发布留言必须填写的电子邮件地址不会公开。 必填字段标示为 *

收到您的留言后,小弟会尽快回复。如果您在留言中提供的电邮地址正确,且已勾选同意接收电邮通知,当您的留言通过审核并有回复时,系统会寄出电邮通知您。回答您留言所查询的问题有时候需要一些时间研究,请耐心等待。另外,如果您还未赞好过本Blog Facebook专页,可以请给我一个讃吗?!就当作是我花时间和精神解答您问题的一点支持吧。谢谢!

fb share

如果喜欢这篇文章,请点个“赞”吧!

fb share