2012年京阪之旅(Day 2[上篇] – 京都二条城)

今次旅行冇乜点去plan，第二日顺其自然咁训到自己醒就起身，不过都只系八点半左右，等于我地七点半咋，可能旅行心情唔同啦，身体自己都想早D起身出去玩。

因为太早，都冇乜食店有开门，又唔想再食多次一兰拉面，所以选择左系酒店后面步行街上间Starbucks食左个简单早餐就算。

食完之后出发去第一个景点，呢个景点之前三次黎京都未有时间去，所以今次决定点都要去一去，而且呢度D樱花品种较多，可能有D会早开都未定，讲紧嘅系边度？味就系二条城囉。

由河原町去二条城只需要坐地铁两个站就到，一出地铁站就见到个城。

呢度就系入口

先系门口售票处买张入场券先，盛惠600円。

二条城系起系平地上嘅城堡，所以唔洗行一D好难行嘅石级先至去到，不过由于二条城主殿(本丸御殿)同埋起系上面嘅五层高天守阁系1750年时已经俾大火烧毁，所以系二条城度唔会有雄伟嘅城楼睇。

参观二条城重点系睇仲保存系度嘅二の丸御殿，由正门入口行冇几耐就到。

由于系世界历史遗产，而且建筑物全部系木结构，所以进入二の丸御殿需要先除鞋，跟住就可以入去感受下行系木板上发出嘅"依依"声效果，听讲系特别设计用黎方便察觉外人入侵嘅机关，不过我就觉得同地板松左时发出嘅声咁囉。

二の丸御殿里面系禁止影相架，所以呢part冇相睇。

参观完二の丸御殿跟住就入去二の丸庭园。

二の丸庭园里面呢棵包到实一实嘅系乜？

如果佢系一棵叫苏铁嘅植物，已经有好多年历史，所以要特别小心保护，包实佢系防止系冬天时冻亲。以下借用官方网页两张相片俾大家了解下：

参观完二の丸庭园二条城就基本行完啦，因为本丸御殿同天守阁已经烧左，冇嘢睇，只得返一D石墙囉。

正当想走之际，见到……咿，点解护城河边好似有D樱花咁嘅物体嘅？

嗱嗱林走过去睇下，原来真系樱花㖞。 虽然唔多，但有总好过冇啦。于是乎就系咁起世影……影影影，真可怜，下次一定要系盛开果阵再黎睇过。

开左嘅樱花就只得呢一part仔，其他大部份樱花都仲未开，只有树枝俾你睇。

小小地睇完早开嘅樱花之后，真系走得人啦。到达门口前原来有个小市集，系专为赏樱而设架，今日系第一日开。

我们又坐低食返碗热辣辣嘅红豆汤，再加一串烧小丸子。

跟住就同二条城讲bye bye啦。

To be continued……