2012年京阪之旅(Day 4[下篇] – 日产租车难波OCAT店还车)

去到大阪只系12点几仲未够钟可以check-in，于是我地先开架车去Hotel Vista Grande Osaka放低行李。(想睇酒店介绍嘅朋友可以去睇我呢篇住@大阪Hotel Vista Grande Osaka)

然后再系大阪市内兜下，想睇下边度有樱花开左，不过兜左几个地方都唔见有，大阪城、造币局嘅樱花通通都仲未开。算吧，呢两日大阪主打shopping算啦。

兜完一轮个天开始有D雨点，所以都系先还左架车再算。还车地点系难波JR駅地下负一层(B1层)嘅日产租车なんばOCAT店，因为间店唔系街舖，要駅入地库停车场，所以系京都攞车果阵，个职员已经俾左张地图我，仲好有心机咁教左我点入去，不过听左都唔系好明。

行完一次之后觉得其实都唔系好难，下面用图解方式讲解一下，如果你又系咁啱系日产租车，又咁啱系呢间难波OCAT店还车，希望可以帮到你啦。

下图系难波OCAT周边嘅街道图，如果你由千日前通方向驶黎，就应该靠左行(图中橙色线)，系出入口处按红色线驶入停车场入口，落到去就系B1层。如果你系由图中下方驶黎(紫色线)，应该先靠右线行，系中间出入口处转右过线，按红色线驶入停车场入口。

下面呢张图片就系出入口处嘅实景，图片来自Google Map实景照片嘅截图。

下面呢张系日产租车俾嘅难波OCAT地下停车场B1层嘅平面图，入到去可以将车暂时停系红框位置，最好有个人睇住架车，然后揾个人由玻璃门入去，照箭咀咁行去租车店Counter叫人黎接收架车。

____________________

还左架车我地就沿住地下街行返去难波，途中见到有间鳗鱼饭专门店，于是就食左呢个馒鱼饭做午餐。

呢日之后嘅行程，全部都系心斋行街shopping，所以冇影到相，唯一系影左呢间g.u.，佢系Uniqlo嘅平价版副线，价钱比Uniqlo平4成左右，当然质素会差少少，但系都好抵著。间舖头就系心斋桥步行街，由戎桥向北行200米左右就会见到。

g.u.心斋桥店位置图

讲开g.u.，不如讲埋Uniqlo啦，以前系心斋桥，都会去佢系难波0101上面果间分店，不过呢间舖面积好细。今次发现原来Uniqlo系心斋桥开左另一间好大嘅分店，有四层，货物品种齐好多。Uniqlo心斋桥店就系心斋橘步行街大丸百货北馆斜对面，接近长堀通，由戎桥向北行大约600米左右。不过以而家汇率黎计，Uniqlo日本嘅价钱绝对唔会平得过香港，除非遇正大减价啦。

Uniqlo心斋桥店位置图

Day 4 End…