2011年冲绳快闪观礼之旅(Day 3[下篇]–冲绳美丽海水族馆)

系Nakamura Soba食完面之后，我地继续起程前往冲绳美丽海水族馆，路程40公里左右，主要沿住国道58号线同449号线行驶，大约要行一个钟左右。呢段路大部份都系沿住海边黎行，风景都好靓架，不过因为太累，乘客们都训晒觉。

在较大的地图上查看2011年冲绳自驾之旅行车路线和景点位置

冲绳美丽海水族馆(冲縄美ら海水族馆)位于冲绳北部本部町嘅海洋博公园入面，园入面除左冲绳美丽海水族馆以外，仲有海豚剧场、海龟馆、海牛馆、海洋文化馆、冲绳乡土村同埋植物园等等好多设施，地方好大，不过因为时间有限，我地只可以参观最出名嘅水族馆。

前往冲绳美丽海水族馆如果坐巴士，需要先坐118号快速巴士到名护总站，再转坐65、66或70号巴士去到“记念公园前”站落车。

如果自己开车，从恩纳出发的话要行大约一个钟，如果由那霸出发，大约就需要2个钟左右。海洋博公园入面有多个停车场，最近冲绳美丽海水族馆而且又最大嘅系北停车场，亦即系P7停车场，Mapcode系553 075 743。

自驾游参考：

冲绳美丽海水族馆Tel.: 098-048-3748 | 冲绳美丽海水族馆Mapcode: 553 075 743

我地到达冲绳美丽海水族馆嘅时候都已经接近4点，系出面影完一轮相就入去准备买飞入场啦。

去到大堂，见到大家都企晒系度，等乜呢？原来等紧够钟。

原来系下午4点后入场嘅入场券有七折优惠，时间仲有一两个字，冇理由唔等埋先。入场券大人原价系,1800円，七折之后系1,260円，我地咁多人都悭左唔少。

冲绳美丽海水族馆地方唔大，两个钟头已经足够，水族馆冬天系下午6点半关门，4点入场仲有2个半钟有足够时间慢慢行同买埋手信啦。

除左参观唔同海洋生物嘅各个展区之外，冲绳美丽海水族馆嘅主要卖点，系佢嘅巨型鱼缸同埋每日两次嘅喂食鲸鲨表演，时间分别系下午15:00同17:00。

另外参观鱼缸顶部亦系唔应该错过嘅节目，不过开放时间只限10:00至14:30同埋17:30至关门呢两段时间，计划行程之前记得夹好佢嘅时间表啊。

我地系水族馆留到最后一刻，买埋手信先走人，原来等到关门先走沿路有成排工作人员排晒队欢送架。

离开冲绳美丽海水族馆我地返去恩纳食dinner，今次去左一间叫海の家嘅居酒屋小店，呢间都系睇旅游书介绍，真系冇介绍错，味道超正，不过偏咸，而且份量好少，但价钱超贵。呢Part相唔知去左边，冇相睇。

自驾游参考：

海の家Tel.: 098-966-2180 | 海の家Mapcode: 206 314 394

– Day 3 完 –