2012年双台风夹击下的台湾之旅(Day 1[上篇] – 乘高铁往台中)

虽然台风正在慢慢迫近台湾，但系机票一早已经买左，唯有硬住头皮照去啦，上到机先知原来人人都系咁照去，全机full晒，好似当台风冇到咁。

出发时正值端午节临近，机场都放左D节日装饰。

Check-in完仲未够钟上机，又去机场贵宾室抖抖，顺便食埋个早餐，几个月冇去，原来而家贵宾室改左新规矩，以前攞住张VISA或Master金卡可以无限任用，而家改左要睇签帐额黎定可以使用次数，而且间间银行唔同计法。

今次又系坐复兴航空，贪佢机票平D，而且时间又好D，可以早D去又晏D返，不过食物就认真麻麻。

今次都系用返呢本旅游书，不过系今年新版，但点解抽起晒顶泰丰嘅介绍呢？起先仲以为顶泰丰执左？

出发之前几日，发生左桃园机场俾雷电击中嘅事件，而天气报告又话今日台湾有雷雨天气，好担心降落果阵会唔会击中我地。但系果日全程都冇风冇雨㖞，天气预报好似唔多准。

原来桃园机场第一航厦做紧改建工程，有D已经完工嘅部份已经开始使用，真系新好多同大过旧时好多。

新嘅入境大堂。

新嘅公共汽车站改左系入境大堂下一层，地方大左好多。

我们今日会坐高铁去台中，所以会先坐705号公共汽车去高铁桃园站，上车前先系呢个2号售票柜位买飞先，一位NT$30。

买左飞就系出面上车，公共汽车班次好密，好快就有一班，所以唔洗急。

大件行李可以放系车中间车门对住嘅空位，因为架车系直达高铁站，中途冇上落客，所以唔会有问题。

出面天朗气清，唔似有打风㖞。

高铁桃园站离桃园机场唔系好远，坐左15分钟左右就到。

入到车站先排队买车飞先，虽然有自动售票机，但系唔见有人用，都系排队系counter买简单D，又唔系太耐。

我地买嘅系标准车厢嘅指定席车票，由桃园去台中每位NT$540，高铁虽然都有自由席车票，不过只系平得好少。

入闸啦，月台只有两个，一个北上去台北，一个南下去高雄，我地去台中当然就系南下啦。

今次只系第二次住台湾高铁，对上一次已经系2007年嘅事。

入闸前系7-11买左饭团医肚。

沿途并唔见有落雨，不过个天就有少少阴。

由桃园站去到台中站只需要38分钟，同车票上预计嘅时一样，我地系14:35到达台中站。

台中站果然系大站，地方比桃园站大好多。

车站入面有和运租车同格上租车呢两间租车公司嘅counter，本来都预约左系呢度攞车，不过由于台风关系最后都系取消左。

我地系台中订左住碧根行馆，酒店系逢甲夜市，从高铁台中站去有接驳巴士，只要有高铁车票就可以免费坐车(优惠只系去到2012年12月31日)。接驳巴士车站系6号出口，由车站大堂落一层就系。

如果想睇详细D嘅接驳巴士资料，又或者想睇关于碧根行馆嘅介绍同住宿评价，可以参考呢篇《住@台中碧根行馆(Beacon Hotel)》，呢度唔再重复。

讲住咁多先，台中嘅行程留返下一篇再讲。

待续……