2013年日本关西、北陆赏樱自驾游 – Day 2：大阪樱之宫公园、万博记念公园

系大阪住一晚之后，我地第二日就要向京都出发啦。第二日嘅行程主要会去大阪樱之宫公园同万博记念公园呢两个大阪嘅樱花名所，虽然知道大阪大部份地方嘅樱花都已经开始凋落，不过一场黎到冇理由唔去睇睇，就算只系得返樱吹雪都好。

2013.4.6 | 雨

一早起身，先去丰田租车店攞车先。朝早街上面仲系好少人。

呢间位于难波车站附近嘅丰田租车店地方几大，里面车辆数目都唔少。租车店系地图上嘅位置可以参考呢度。

去到租车店大约只系用左15分钟就搅好晒手续，开车返Cross Hotel泊好架车，然后先系戎桥旁边间Lotteria快餐店食个早餐先。

今日天气认真麻麻，个早餐都未食完就已经落起雨黎。

行程第一站先去黑门市场行行先，好在呢度有瓦遮头，出面落紧大雨都可以照行。呢日系星期六，所以有开门嘅舖头会比平日多，如果系weekday去，因为有唔少舖头唔开门，会冇咁热闹。

系黑门市场买左生果之后，就开车到今日行程嘅第一个赏樱景点 – 樱之宫公园。樱之宫公园系大阪市内的樱花名所，位于大阪城附近，前往嘅交通都好方便，不过附近泊车位并唔多，如果系樱花满开期间去，自驾的话可难较难揾到位。但系我地去呢日因为已经过左满开期，再加上落住雨，所以就算系星期六公园内都只得小猫三几只。

如果唔落雨，樱吹雪嘅景色都唔错架，当大风吹D樱花落黎果刻，满天都系粉红色嘅樱花花瓣，再加上满地粉红色嘅樱花，好浪漫架。

系樱之宫公园影完相之后，开始向下一站万博记念公园进发，万博记念公园都系大阪樱花名所之一，位于大阪市北面，开车行高速公路大约45分钟就到。

去到万博记念公园嘅时候天气比系大阪时仲差，唔单止一路落雨，而且因为地方空旷，仲劲大风，几乎连人都企唔稳。所以我地只系系公园中央嘅大阳の塔附近影下樱花就算。不过呢度嘅情况同樱之宫公园一样，樱花已经凋落得七七八八啦。

万博记念公园嘅标志性建筑 – 大阳の塔

大阳の塔旁嘅樱花大道，满开时呢度真系超靓架，可惜……

原本嘅行程计划中系plan左要去京都淀川河川公园背割堤睇樱花，呢度系一个种左好多樱花树嘅河堤，开花果阵好靓架，不过我地去到果阵横风横雨，而且因为实行人潮管制，封左旁边个停车场，要泊去好远嘅临时停车场再行过去，咁嘅天气咁嘅环境点行啊。

由于天气太过恶劣，我地决定放弃淀川河川公园背割堤呢个景点，提早去京都嘅酒店check-in先。我地系京都会留宿两晚，因为叠住星期六嘅关系，呢两晚要系京都揾一间两晚都有房可以连住嘅酒店好难，最后总算揾到呢间位于京都駅后面嘅酒店，叫新・都酒店，酒店质素同位置都好好，不过由于京都酒店太full，所以价钱比平时正常价格贵左三成。[想睇酒店介绍同住宿评价可以参考呢篇住@京都 新・都酒店]

系酒店check-in好之后都仲系不停落雨，唯有去有瓦遮头嘅河原町一带嘅寺町通步行街同锦市场行下。

最后去返河原町通度果间丸龟制面食晚餐，呢间舖头上年住京都Best Western Hotel Kyoto果阵发现，我觉得好好食，不过似乎唔系咁啱同行家人嘅口味。

最后，返酒店食完上午系大阪黑门市场买嘅草莓宵夜就系雷雨声中进入梦乡啦，希望第二日起身会见到好天啦。

– Day 2 完 –

>> 返回《2013年日本关西、北陆赏樱自驾游》总目录