2013年日本关西、北陆赏樱自驾游 – Day 6:东寻坊、日本海さかな街渔市场
今日我地会返去大阪,由加贺温泉去大阪嘅路程差唔多有270公里,如果直踩需要连续开三个半钟头车先到,比较辛苦。所以我地将佢拆成三段黎行,系路线中安排去两处景点,第一个系福井县嘅东寻坊,第二个就系敦贺市嘅日本海さかな街渔市场。
2013.4.10 | 晴,一时雨
朝早起身嘅时候发觉天气麻麻,天阴阴就黎落雨。不过都冇办法,先浸多次温泉,再去食早餐。唔知点解日本温泉旅馆嘅住客总系女多过男,所以通常男汤好清静但女汤就好多人好嘈吵。
早餐系食和洋混合嘅自助餐,味道一般,不过只温泉蛋就整得几好味。
呢盒草莓系寻日系近江町市场买落,今日系车上食。
今日行程第一站会去福井县嘅著名景点东寻坊,呢树系福井主要旅游景点,面对日本海,由加贺去大约40公里,冇行高速公路用左大约九个字时间就到。
东寻坊入口。”歓迎”果两个字系日文,同中文一样都系welcome咁嘅意思,唔好以为人地写中文啊。
进入左东寻坊之后有几个可以免费泊车嘅停车场,我地直接将架车驶上去最近海边嘅停车场。可能因为今日天气比较唔稳定,时雨时晴,所以黎东寻坊嘅游客亦唔多,场面冷清。
东寻坊前主要系一条手信街,今日只有大约一半店舖有开门。
系手信街尽头行落楼级向海边行冇几耐,就系东寻坊啦,其实只系因为海水冲蚀而造成嘅奇特地形。
离开东寻坊我地下一站去到同样属于福井县嘅敦贺市,敦贺市就系北陆自动车道旁边,唔需要专登兜路去。我地系敦贺市其实只系去一个地方,就系呢个号称日本海沿岸最大嘅渔市场-日本海さかな街渔市场。
呢个渔市场并唔系位于海边,而系座落系敦贺市郊嘅一条国道旁边。市场分为售卖手信同海产干货嘅干货区以及售卖新鲜海产嘅湿货区,市场内嘅环境好整齐干净。
渔市场入面仲有多个食海鲜丼嘅食店。
我地选择左去呢间食午饭。
走之前买左几个香喷喷嘅烩番薯上路食。
唔洗两个半钟就由敦贺返到大阪,见时间仲早,顺路去一去大阪造币局睇下有冇樱花睇。造币局系大阪樱花名所,呢度D樱花比较迟开,今年要到4月16日先开始开放俾人入去赏樱。
冇得入去唯有隔住铁闸影返几张相就走。
离开这币局之后我地就开车返去今晚入住嘅Hotel Vista Grande Osaka check-in。今次系第二次住呢间酒店,会连续住两晚,由于听日仲要用多一日车去吉野山,所以今晚未还车住,暂时将架车泊系酒店停车场。[想睇酒店介绍同住宿评价可以参考呢篇住@大阪Hotel Vista Grande Osaka]
今晚主要系心斋桥一带行下,呢间一兰拉面系24小时营业架,自从佢开左之后每次到大阪都有帮衬,不过呢度大部分时间都好多人排队,想唔排队最好系朝早九点前黎。
一兰拉面旁边呢间章鱼烧都好多人帮衬,今日行过见冇人所以第一次试试,不过味道唔系好得囉。
每次去大阪都会去蟹道乐刷一餐,不过感觉味道一次比一次差,唯一仲觉得好味嘅系以下呢样蟹膏寿司。
除左蟹膏寿司之外今餐仲食左呢D。
最后用剩返嘅汤加蛋同米煮成嘅蛋花粥,以前曾经觉得好鲜味,不过今次呢镬粥超咸。
今次唔算叫得多野,只系食左17000几円。
– Day 6 完 –
>> 返回《2013年日本关西、北陆赏樱自驾游》总目录
人气文章:
Klook / Kkday最新优惠码
Agoda最新10%折扣代码
Hotels.com最新折扣代码
Trip.com最新优惠码
永安旅游最新推广码
乐天旅行最新住宿折扣券
乐天旅行最新租车折扣券
日本乐天市场最新优惠券
Klook.com
如果喜欢这篇文章,请点个“赞”吧!