2013年日本关西、北陆赏樱自驾游 – Day 7：吉野山

奈良县吉野山系日本出名嘅赏樱胜景，而且开花时间一向较迟，花期亦较长，所以今次计划行程嘅时候，将吉野山放系倒数第二日先去。不过今年因为天气早左转暖，关西各地嘅樱花普遍早左开花，就连吉野山嘅樱花都早左好多日开，我地系4月11日去已经过左满开期，而且更已经凋落左大半。

2013.4.11 | 晴

呢两日Hotel Vista Grande嘅住宿并唔包早餐，所以起身后先行过去一兰拉面食碗面先。

跟住去酒店车房攞返架车出发。

今日嘅行程只系去吉野山。吉野山位于奈良县南部，距离大阪市中心大约70公里，开车个半钟左右就可以到达。从大阪去吉野山嘅高速公路只系去到奈良县嘅葛城市为止，之后仲有一段封闭式嘅国道去到橿原市。由橿原市开始需要行驶大约20公里嘅一般道路先会去到吉野山山脚，不过路面状况都OK，并唔难行。

呢度系JR吉野山駅，如果坐JR系呢度落车之后可以转坐缆车或者接驳巴士上山，但呢日因为超多人，所以唔少人选择步行上山，好辛苦啊。

呢只就系由大阪开往吉野山嘅火车。

每年4月11日同12日，系吉野山金峰山寺会举行一个叫花供忏法会嘅法会。我地去呢日正正遇着法会举行嘅第一日。本黎以为好好彩可以参与下呢D节日祭典，点知因为咁嘅原故呢日上山嘅人超超超多，吉野山上嘅游人简值系迫爆。唔单止想揾个车位泊车都揾唔到，就连架车想行快两步都好难。最后只能够无奈地开住架车以龟速围住吉野山兜左个圈就落山走人。

系吉野山山脚有两条路可以上去吉野山，一条系西面距离较短嘅15号县道，另一条就系东面需要兜一个园所以比较远嘅37号县道。呢日15号县道封闭左，车辆只能够用37号县道上山，而且因为车太多，超塞车，大排长龙。

吉野山上嘅道路系山路，路面好窄，而且山上迫满游人，人车争路，开住架车真系一步一惊心，如果一个唔小心撞到人就大件事，好在日本人都比较礼让，见到车黎都会行埋一边让你架车过，但系因为路面实际太窄，人又多，有时D人想让都揾唔到位可以走避。

系迫满人嘅窄路上行车固然危险，而更危险嘅系我竟然行错路驶左入去一条山中小路，下图GPS中粉红色嘅就系呢条小路。因为太危险冇时间影相，下面就用Google Map嘅街景图片俾大家睇下。

系呢个路口应该右转去返15号县道，但我地见左边写住有停车场，咪转入去睇下囉，点知入面所有位都已经full parking，就咁越行越入，搅到返唔到转头。

呢段山路应该系一段登山步道，因为今日多人上山，所以都有唔少人行，但路面实际太窄，而且一边系沿崖，又唔知条路通去边，又要睇住D行山人士，所以行完条路都出左一身汗。条路原来系兜一个圈最后又返返去我地驶入去果个路口。如果大家开车上黎，记得小心D，唔好向上千本或者金峰神社方向驶(留意：金峰山寺同金峰神社系两个唔同地方)。

日本由于山多，少不免多山路，今次行呢条已经唔算危险，系日本自驾咁多次，比呢条仲窄，仲危险嘅山路都行过。

俗语话无限风光在险峰，虽然行呢段山路系危险，但总算可以直接驶到高位睇到吉野山嘅满山樱花景色，虽然已经凋落，但都仲算唔错。呢个位置如果唔开车而改由巴士站或者缆车站行过黎，路程唔短而且仲系斜路，好辛苦架。

总嘅呢讲，吉野山嘅景点都系依山势分布系唔同高度嘅上腰，如果真系要漫步游览参观，一定要有行山嘅心理准备同足够体力。如果想舒舒服服，咁就要自己开车，同埋唔好选择系祭典或者周末假日呢D时间，而且驾驶技术一定要有返咁上下啊。

离开吉野山之后系附近一个道之駅食午饭。

呢度有售卖附近农民生产嘅农作物。

返回大阪途中，系大阪环状线上前面架大货车嘅帆布突然松脱，成张帆布打埋我地车头。因为当时高速行驶中，四线车道我地行中间，后面同左右两边都有车高速驶紧，想避都冇得避，只有硬食一野。好在只系块帆布，事后出左高速公路检查架车，发觉只系车头整污遭左，架车冇整化，真系执返身彩。

今日系旅程尾二日，点都要留返半日系大阪shopping下，所以返到难波先去还返架车，还车果阵职员只系check油标系唔系已经入满油，其他都冇睇，早知就唔系还车之前自己抹走之前块帆布整到D污积啦。

今晚嘅晚餐-王将饺子，最后一晚竟然食中国饺子。

最后介绍呢双布丁，好好味架，每次去日本都一定食，只系105円一个，只系Lawson先有得卖架。

– Day 7 完 –

>> 返回《2013年日本关西、北陆赏樱自驾游》总目录