2010年秋日本中部自驾游 – Day 4：宫川朝市、樱山八幡宫、飞騨古川、误闯雪山

今日嘅行程会先系高山游览宫川朝市同阵屋朝市，然后再到樱山八幡宫，之后离开高山到飞騨古川，再经白川乡到富山市过一夜。而系今日嘅旅程中，我地仲遇到一件惊险嘅事：误闯雪山。想知有几惊险，睇埋落去。

寻日日间嘅天气本来好地地，但夜晚就落起雨黎，好彩到天光雨势停左，不过气温就下降左几度，可能就系呢个气温骤降嘅原因，令到我地今日有落雪嘅遭遇。

朝市当然系要一朝早去啦，先去宫川朝市，从酒店行过去并唔系好远，6分钟左右就到。

顾名思义宫川朝市就系宫川旁边，清早时间并唔系太多人。

行到咁上下先入去呢间食店食个早饭

行完宫川朝市，再去埋阵屋朝市，呢度规模唔大，只有几个摊贩。

顾名思义阵屋朝市旁边就系高山阵屋

行完两个朝市，先返去酒店check-out，跟住再去埋樱山八幡宫。

樱山八幡宫出面咁啱有个菊花展，顺便参观下。

樱山八幡宫附近仲有高山屋台会馆、樱山日光馆、狮子会馆呢D展馆，不过吸引力唔大，而且时间有限，所以冇入去参观，睇完菊花展就开车离开高山去飞騨古川。

飞騨古川离高山市唔够20公里，开车20分钟就到。飞騨古川系一个小镇仔，冇咩游客，街上好宁静。

飞騨古川最主要景点就系呢条养左好多金鱼嘅小溪

溪入面养左好多鱼

如果有兴趣喂下鱼，可以用100日元自助买包鱼粮玩下。

附近有个小寺院

买返串牛内串顶下肚先

中午果餐唔可以只系食串牛肉就算，系附近揾左间小店食碗牛肉饭。

去完飞騨古川我地下一站系计划顺路去埋白川乡，然后再到富山市。如果要行高速公路，要先行返去高山市，再经高山清见道路同东海北陆自动车道到白川乡。不过，我地一时贪近唔想行回头路，选择左行一条直接连接飞騨古川同白川乡嘅360号国道。

在较大的地图上查看360号国道

原来360号国道系一条系高山上嘅小路，条路弯弯曲曲一直爬到上山顶，虽然话系国道，但系条路只够一架车通过，路嘅一边系悬崖峭壁，另一边就系万丈深渊，旁边嘅围栏睇落又唔多稳阵。咁嘅路就算系风和日丽嘅时候都好危险，呢日仲撞正山上落左场初雪，系毫无准备又冇雪地开车经验嘅情况下，只有硬住头皮以龟速前进，因为条路实际太窄，想掉头行返落山都唔得。

最后我地用左个半小时总算行完呢条魔鬼山路落到山下，执返条命。虽然呢程路好惊险，但系山上嘅景色又真系超靓，系呢个半钟内窗外嘅景色由绿变黄，再变红，跟住变白，再变返红，然后再变黄，最后变返绿，一年四季浓缩左系呢个半小时之内，一次过睇晒，超正，只可惜太过惊唔识得影多几张相。

因为太惊而且山上又冻，落到山下可谓饥寒交迫，第一时间入左间便利店，食左呢世人觉得最好味嘅关东煮。

虽然山下就系白川乡，但系因为经历左一程惊险旅程，又耽误左唔少时间，再加上山下落紧雨，所以决定改一改行程唔去白川乡住，先去冇咁多嘢睇嘅五箇山合掌之里睇一睇，跟住就去富山投宿。

我地住系富山駅附近嘅コンフォートホテル富山駅前(Comfort Hotel Toyama)，间酒店房间虽然细D，但质素唔错，而且位置好方便，不过富山市都几乡下地方，就算火车站附近入夜之后都冇咩地方好行，食店亦唔多，今晚只系食呢D。

– Day 4 完 –

相关文章：

• 2010年秋日本中部自驾游 – Day 1：名古屋
• 2010年秋日本中部自驾游 – Day 2：土岐Premium Outlet、惠那峡
• 2010年秋日本中部自驾游 – Day 3：游下吕温泉合掌村、飞騨の里、高山古并町老街
• 2010年秋日本中部自驾游 – Day 5：立山駅、美女平、黑部峡谷观光火车
• 2010年秋日本中部自驾游 – Day 6：金沢兼六园、近江町市场、金沢21世纪美术馆
• 2010年秋日本中部自驾游 – Day 7：白川乡
• 2010年秋日本中部自驾游 – Day 8：长岛三井Outlet
• 2010年秋日本中部自驾游 – Day 9：名古屋城、荣、大须商店街
• 2010年秋日本中部自驾游 – Day 10：中部国际空港
• 名古屋酒店推介
• 住@名鉄イン名古屋桜通
• 住@スパホテルアルピナ飞騨高山 (Spa Hotel Alpina Hida Takayama)
• 住@下吕观光ホテル本馆
• 住@宇奈月温泉 ホテル黒部 (Hotel Kurobe)
• 日本中部自驾游必买：外国自驾游旅客专用的中日本高速公路ETC卡 – Central Nippon Expressway Pass
• 日本Pocket WiFi Router租借服务：主要租机公司介绍和比较
• 日本忍者WiFi九折优惠益读者